الماتى سىبايلاس جەمقورلىققا قارسى قىزمەتى ىسىراپشىلدىقپەن كۇرەسپەك. وسىعان بايلانىستى «جەڭىلدەتىلگەن اس بەرۋ ءمازىرىن» بەكىتۋگە ۇسىنىس جاساپ وتىر. وعان ارنايى جۇرگىزىلگەن زەرتتەۋ سەبەپ بولعان. ياعني, ساۋالناماعا قاتىسقان رەسپوندەنتتەردىڭ 80 پايىزدان استامى جەرلەۋ راسىمدەرى كەزىندە كەڭ داستارحان جايۋ داستۇرىنە قارسى شىققان كورىنەدى.
«الماتى ازاماتتىق قوعام ينستيتۋتتارىنىڭ حالىق اراسىندا جەرلەۋ شىعىندارى تۋرالى ساۋالناما جۇرگىزىلدى. رەسپوندەنتتەردىڭ 80 پايىزدان استامى ىسىراپقا جول بەرىلەتىنىنە قارسى شىقتى. الايدا مامانداردىڭ ايتۋى بويىنشا, قيىن جاعدايدا تۇرعانىنا قاراماستان ەلدەن قالماۋدىڭ امالىن ويلاپ, جەرلەۋ, اس بەرۋ شىعىندارىن قىسقارتپايدى. كەرىسىنشە, «مەن نەگە ودان قالامىن؟» دەپ, جوعارى دەڭگەيدە ۇيىمداستىرۋعا تىرىسادى», دەدى الماتى قالاسى بويىنشا سىبايلاس جەمقورلىققا قارسى قىزمەتتىڭ پرەۆەنتسيا جانە پاراساتتىلىق باسقارماسىنىڭ باسشىسى ەلنار يىگىلىكوۆ.