انتقا ادالدىعىنان اينىماعان

ەر ازاماتتاردىڭ وزدەرى تا­ۋە­كەل ەتىپ, بارا بەرمەيتىن قوعام تى­نىشتىعىن ساقتاۋ, ادام­دار­دىڭ قاۋىپسىزدىگىن قامتا­ماسىز ەتۋ جولىندا تالماي قىزمەت اتقا­رىپ, قازاق ايەل­دەرىنە ءتان اقى­لىنا كوركى ساي ارۋلاردى كور­گەندە ريزا­شى­لى­عىڭ­دى جاسىرا المايسىڭ. نار جۇگىن­دەي ۇلكەن سەنىم ارتىلعان جاۋاپ­كەر­شىلىك مىندەتى مەن ۇر­پاق ءوسى­رۋ سەكىلدى انالىق پارىزىنا قىلاۋ تۇسىرمەي قاتار الىپ ءجۇ­رۋ ەكىنىڭ ءبىرىنىڭ قولىنان كە­لە بەرمەسى انىق. يىعىنا پولكوۆنيك پوگونىن تاققان, جەتى جىلدان بەرى وبلىستىق پوليتسيا دەپارتامەنتىنىڭ شتاب باستىعى سەكىلدى اسا جاۋاپتى لاۋازىمدى ءمىنسىز اتقارىپ كەلە جاتقان ساۋلە انداعۇلوۆا – تال بويىنا مەيىرىمدىلىك, قاي­رات­كەرلىك, ىزدەنىمپازدىق, بى­لىم­دىلىك قاسيەتتەردى تو­عىس­تىر­عان ەرەكشە جان. ول ماۋەلى شاڭى­راقتاعى ەكى ۇل, ەكى قىز­دىڭ تۇلا­بويى تۇڭعىشى بول­عان­دىق­تان با, جاستايىنان اتا-انانىڭ قول­عا­ناتىنا اينالىپ, ەرتە ەسەيدى. اكەسى تىنىشتىق دۇي­سەكين سانالى عۇمىرىن ىشكى ىستەر سالاسىنا ارنادى. ەڭبەك جولىن قاتارداعى ءتارتىپ ساق­شى­سىنان باستاپ, وتىز جىلعا جۋىق ىستىق-سۋىعىن بىردەي كوردى. ومىردەن كورگەن-تۇيگەنى مول قاريا «ادال بولىڭدار, بىرەۋدىڭ الا ءجىبىن اتتاماڭدار. ماڭداي تەرمەن تاپ­قان ناننىڭ قادىرىن بىلىڭدەر» دەگەن كوشەلى مىنەزىنەن اينىعان ەمەس. ءالى كۇنگە دەيىن بالالارى مەن كەلىندەرىن, نەمەرەلەرىن جاقسىلىققا, يماندىلىققا ۇن­دەپ, جامان داعدىلاردان ساقتان­دى­رىپ وتىرادى.

ساۋلە مەكتەپ بىتىرگەننەن كە­يىن اكە جولىن جالعاستىرۋ تۋرا­لى ىشكە بۇككەن سىرى, تۇپكى­لىك­تى تاڭداۋى تۋرالى ەشكىمگە ءتىس جارمادى. تەرگەۋشى بولسام دەگەن اسقاق ارمانمەن رەسەي­دىڭ توم زاڭ ينستيتۋتىنا قۇ­جات تاپسىردى. الايدا, جولى وڭعا­رىلماي ەلگە ورالدى. تۋمى­سى­نان جىگەرلى, ماقساتشىل قىزدىڭ ودان تاۋى شاعىلىپ, تاۋانى قايتپادى. ءبىر جىلداي اعا پيونەر ۆوجاتىي بولىپ ىستەپ ءارى ءبىلىمىن تولىقتىرىپ, پەتروپاۆل قالاسىنداعى پەدينستيتۋتقا ءتۇستى. قوستاناي وبلىسى, ناۋ­رىزىم اۋداندىق كامەلەتكە تول­ماعاندار ءىسى جونىندەگى ينسپەك­تسيا ءبولىمىنىڭ ەسىگىن يمەنە اشقا­نى ءالى كۇنگىدەي ەسىندە. وندا­عىلار جاس ماماندى كانىگى كوز تانىسىنداي قۇشاق جايا قار­سى الدى. تاجىريبەسىزدىگىنە, ءتىپتى باسقا ماماندىق يەسى ەكەن­دىگىنە قاراماستان وزىنە لايىق قىزمەت ۇسىنىلىپ, ۇر­شىق­شا ءۇيىرىپ اكەتتى. ودان كەيىنگى ءومىر جولى قىزىلجار وڭىرىمەن تىعىز بايلانىستى. تەرگەۋشى, اعا تەرگەۋشى, ءبولىم باستىعى, باسقارما باستىعىنىڭ ورىنباسارى سەكىلدى شىڭدالۋ باس­پال­داقتارىنان ءوتتى. مول تا­جىريبە جيناقتاعانى ەس­كە­رىلىپ, 2012 جىلى تەرىسكەيلىك بۇ­رىم­دىلار اراسىنان ال­عاش بولىپ وبلىستىق پوليتسيا دە­پار­تا­مەنتىنىڭ شتاب باس­تى­عى­نا تا­عاي­ىندالدى.

– ءبىز وتباسىندا ءتورت بالامىز. اسقار تاۋ اكەمە ماڭگىلىك قارىزدارمىن. ءبارىمىزدى تار­تىپ­كە, جاۋاپكەرشىلىككە, باستاعان ءىستى اياقسىز قالدىر­ماۋ­عا, وتىرىك ايت­پاۋ­عا, شىنشىل بولۋعا ۇيرەتتى. وسىنداي دارەجەگە جەتۋىمە ۇل­كەن ىقپال ەتكەن حايدار كا­شە­نوۆ, ەرسايىن سارقۇلوۆ, اباي عاليەۆ سەكىلدى اعا­لا­رى­ما العىسىم شەك­سىز. مازاسىز قىزمەتتىڭ ەرتە كەتىپ, كەش كەلە­تىن قيىندىعىن جولداسىم سەرىك, بولاشاق زاڭگەر ۇلىم ءمىر­بولات تا ءتۇسىنىپ, قول­دان كەل­گەن كومەكتەرىن اياماي­دى. قاراپ وتىرسام, جارتى عۇمى­رىمدى ىشكى ىستەر سالاسىنا ارناپپىن. از با, كوپ پە – وعان ۋاقىت تورەشى, –دەگەن سۇحبات­تا­سىمىزدىڭ ءسوز ساپتاسىنان جۇ­مىس پەن وتباسى تىزگىنىن قاتار ۇستاي ءجۇرىپ الماتى زاڭ اكا­دەمياسىن سىرتتاي ءبىتىرىپ العا­نىن بىلدىك. دەپارتامەنتتىڭ بار­لىق ۇيىمداستىرۋ, اعىمدىق جۇ­مىستارىن جوسپارلاۋ, باقى­لاۋ, قاداعالاۋ شتاب ارقىلى جۇ­زە­گە اساتىندىقتان, كەز كەلگەن ىسكە الدىمەن ءوزى تىكەلەي اتسا­لى­سادى. قاراماعىنداعى 31 قىز­مەت­كەردەن دە جاۋاپكەرشىلىك پەن جەدەلدىلىكتى ءبىرىنشى كەزەكتە تالاپ ەتىپ وتىرادى. بۇعان ونىڭ قوعامدىق نەگىزدە اتقاراتىن ءىس-شارالارىن قوسساق, جۇمىس جەتىپ ارتىلادى.

ايەلدەر كە­ڭە­سىنىڭ ءتورايىمى رەتىندە تۇر­­مىسى تومەن, اسىراۋىندا مۇ­گە­دەك بالالار بار 13 وتبا­سى­­ن ءوز قامقورلىقتارىنا العان. رەسەي فەدەراتسياسىنىڭ قور­عان, تۇمەن, ومبى وبلىستارى ىشكى ىستەر مينيسترلىكتەرى وكىل­دەرىمەن بىرلەسىپ وتكىزگەن ۇي­لەستىرۋ توبىنىڭ وتىرىسىن­دا «كورشى باقىلاۋى» باع­دار­لا­ما­سى جايلى سالي­قالى بايانداما جاساپ, ەكى ەل پوليتسەيلەرىنىڭ قويان-قولتىق ارالاسۋىنا ۇيىت­قى بولعان. جۋىردا تىكەلەي ەفير­دەگى كورسەتىلىم بويىنشا كە­زەكتى «قاۋىرت جەلى» بايلانىسى ۇيىمداستىرىلىپ, شتاب باستىعى ەكى ساعاتتىق ونلاين-كونفەرەنتسيا بارىسىندا قىلمىستىق قۇقىق بۇزۋ­شى­لىق­تار تۋرالى وتىنىشتەرگە, قابىلداۋ, تىركەۋ, كەزەكشى بو­لىم­دەرگە جۇگىنۋ, وقيعا ورىندارىنا جەدەل توپتار مەن نارياد­تار­دىڭ شىعۋ ءتارتىبى, تاعى باسقا كوپتەگەن ماسەلەلەرگە ناق­تى جاۋاپ بەردى. ونىڭ ءار سوزى­نەن پوليتسەي ماماندىعى وتە جاۋاپ­تى, قوعام تىنىشتىعى ءجىتى باقىلاۋدا ەكەنى انىق اڭعارى­لىپ تۇرادى.

ساۋلە تىنىشتىققىزىنىڭ ءىنىسى المات, ءسىڭلىسى گۇلميرا اكە­لەرىنىڭ, اپالارىنىڭ جولىن قۋىپ, اۋلەت اتىنا كىر كەل­تىر­مەۋ­دى باستى مۇرات سانايدى.

سولتۇستىك قازاقستان وبلىسى