كۇز كەلىپ, جىل اياعىنا تاياعان ۋاقىت – تەلەۆيزيا سالاسىنداعى جاڭا ماۋسىمنىڭ, جاڭا باستامانىڭ, جاڭا جوبالاردىڭ باستالاتىن كەزى. ءدال وسى كەزەڭدە تىڭ تۋىندىلاردىڭ تۇساۋى كەسىلىپ, جاڭا باعدارلامالار مەن ءتۇرلى تەلەحيكايا قالىڭ كورەرمەنگە جول تارتادى. وسىعان وراي ءبىز «حابار» اگەنتتىگى باسقارما توراعاسىنىڭ ءبىرىنشى ورىنباسارى – رينات كەرتاەۆپەن سۇحباتتاسقان ەدىك.
– رينات دۋمان ۇلى, «حابار» اگەنتتىگى جاڭا ماۋسىم شىمىلدىعىن اشتى. دايىندىق قىزۋ بولعان سياقتى؟
– راحمەت. راسىندا, ءار جاڭا ماۋسىم كەز كەلگەن تەلەارنا ءۇشىن العا جىلجۋعا سەرپىن بەرەدى. بۇل ءبىز ءۇشىن دە كورەرمەن كوزايىمىنا اينالۋ, ولاردى قۋانتۋ جولىنداعى ۇلكەن مۇمكىندىك. سول سەبەپتى دە اگەنتتىك توراعاسى ەرلان بەكحوجين باستاعان «حابار» شىعارماشىلىق ۇجىمىنىڭ دايىندىعى جىلداعىدان جوعارى. قازان ايىنىڭ تۋرا ماعىناسىنداعى قايناعان شاعى وسى ءسات بولىپ جاتىر. كوپشىلىك كورەرمەندى اۋقىمدى جوبالار, تەلەحيكايالار جانە فيلمدەرمەن قۋانتپاق نيەتپەن جاڭا ماۋسىمنىڭ شىمىلدىعىن اشىپ, باستاپ كەتتىك.
– جۋىردا اقپارات جانە قوعامدىق دامۋ ءمينيسترى داۋرەن اباەۆ بيىلعى «Junior Eurovision Song Contest» (بالالار ەۋروۆيدەنيەسى) حالىقارالىق ءان بايقاۋىنا ەرجان ماكسيم قاتىسىپ, ەل نامىسىن قورعايتىندىعىن حابارلاعان بولاتىن. سونداي-اق مينيستر, قازاقستاننىڭ بۇل دوداعا ەكىنشى مارتە قاتىسۋعا مۇمكىندىك العانىنا «حابار» اگەنتتىگىنىڭ ەلەۋلى ەڭبەگى بار ەكەنىن اتاپ ءوتتى. دايىندىق قالاي بولىپ جاتىر؟ تولىعىراق توقتالىپ وتسەڭىز...
– ءيا, راسىندا «حابار» اگەنتتىگى – 2016 جىلدىڭ 1 قاڭتارىنان باستاپ «Junior Eurovision Song Contest» حالىقارالىق ءان بايقاۋىن ۇيىمداستىراتىن ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى. وتكەن جىلدان بەرى اتالعان بايقاۋعا ءوز مەملەكەتىمىزدىڭ اتىنان ۇمىتكەرىمىزدى ۇسىنۋعا مۇمكىندىك الدىق. ەستەرىڭىزدە بولسا, «بالالار ەۋروۆيدەنيەسى - 2018» ءان سايىسىنا العاش رەت ەلىمىزدىڭ نامىسىن دانەليا تۋلەشوۆا قورعادى. بيىل ەرجان ماكسيم باق سىناعالى وتىر. بۇگىندە ەرجان رەسەيدىڭ اتاقتى كومپوزيتورى يگور كرۋتويدىڭ ماسكەۋدەگى مۋزىكالىق اكادەمياسىندا ءبىلىم الۋدا. جاقىندا الماتى قالاسىندا وتكەن ءباسپاسوز وتىرىسىندا «Junior Eurovision» ءان بايقاۋىنا دايىندىعى جونىندە وي بولىسكەن بولاتىن. حالىقارالىق ونەر دوداسىنىڭ شارتى بويىنشا قاتىسۋشىلار ەش جەردە جاريالانباعان, ۇزاقتىعى 3 مينۋتقا دەيىنگى كومپوزيتسيانى تابيعي داۋىستا ورىنداۋى قاجەت. ەرجان «ارمانىڭنان قالما» دەپ اتالاتىن ءانىن قازاقستاندىقتارعا تانىستىرىپ, تۇساۋىن كەستى. قازىرگى تاڭدا 24 قاراشا كۇنى پولشانىڭ گليۆيتسە قالاسىندا وتەتىن «Junior Eurovision Song Contest» فينالىنا ەرەكشە نازار اۋدارىپ وتىرمىز. ەرجان نۇر-سۇلتان قالاسىنا كەلىپ, وسى جەردەگى رەسمي دەلەگاتسيامەن بىرگە پولشاعا اتتانادى. ول وزىنە ارتىلعان جاۋاپكەرشىلىك پەن ۇكىلەگەن ءۇمىتىمىزدى ءتۇسىنىپ ءجۇر. سوندىقتان جەرلەسىمىزگە سەنىم ءبىلدىرىپ, قولداۋ كورسەتكەن دۇرىس.
سونىمەن قاتار «حابار» اگەنتتىگى ازيا-تىنىق مۇحيتى حابار تاراتۋ وداعىنىڭ مۇشەسى رەتىندە, بۇكىل الەمگە تانىمال ديماش قۇدايبەرگەنگە جاپونيادا وتەتىن حالىقارالىق ازيا-تىنىق مۇحيتى تەلەفەستيۆالىنە («ABU TV Song Festivals») قاتىسۋدى سەنىپ تاپسىردى. بۇل رەتتە ءبىزدىڭ ۇسىنىسىمىزدى قولداپ, ەل اتىنان ۇلكەن شاراعا قاتىسۋعا بارا جاتقان ديماش قۇدايبەرگەنگە العىسىمىزدى بىلدىرەمىز. جالپى, «حابار» اگەنتتىگى قاشاندا دارىندى ازاماتتارىمىزعا قولداۋ ءبىلدىرىپ, كومەكتەسىپ كەلەدى.
– الەمنىڭ ەڭ ۇزدىك جوبالارىنىڭ ءبىرى «Got Talent» «حابار» ارناسىنىڭ ەفيرىنەن ءجۇرىپ جاتىر. اتالعان جوبا تۋرالى كەڭىرەك ايتىپ وتسەڭىز؟
– راس, وسى كۇزدىڭ باستى جوبالارىنىڭ ءبىرى – Central Asia’s Got Talent شوۋى. بۇل – ورتالىق ازياداعى ەڭ اۋقىمدى, ەڭ ءىرى ونەر الاڭى. جوباعا قازاقستانمەن قاتار قىرعىز, وزبەك جانە تاجىك اعايىنداردىڭ ونەرپازدارى قاتىسادى. وسى ۋاقىتقا دەيىن اتالعان فورمات ليتسەنزيا ارقىلى الەمنىڭ 70 ەلىندە تاراعان. سونداي-اق الەمدەگى ەڭ ءساتتى تەلەۆيزيالىق فورمات رەتىندە گيننەستىڭ رەكوردتار كىتابىنا ەنگەن.
سول سەبەپتى شوۋ ءبىزدىڭ كورەرمەن ءۇشىن دە قىزىقتى بولارىنا سەنىمىم مول. بۇل بايقاۋدىڭ باستى ەرەكشەلىگى – قاتىسۋشىلاردىڭ جاسى مەن تالانتىنا شەكتەۋدىڭ جوقتىعى. ونەر الاڭىندا ءانشى, ءبيشى, تسيرك, يلليۋزيا ونەرىنىڭ وكىلدەرى جانە باسقالار دارىنىن كورسەتەدى. وعان قوسا ورتالىق ازياعا ورتاق جوبا بولعان سوڭ شوۋ بىزدە «حابار», وزبەكستاندا «Zoʻr TV», قىرعىزستاندا «كترك» جانە تاجىكستاندا «تۆ سافينا» تەلەارنالارىنان كورسەتىلەدى. ياعني, جەڭىمپازدى وسى ەلدەردىڭ كورەرمەندەرى بىردەي تانيدى دەگەن ءسوز. قىزىقتىڭ ءبارى الدا دەپ ويلايمىن. جىل سوڭىنا دەيىن جارتىلاي فينال, فينال تىكەلەي ەفيردە كورسەتىلەتىن بولادى. شىن مىقتىنى سول تىكەلەي ەفيردە كورەرمەندەرمەن بىرگە انىقتايمىز.
– جاڭا ماۋسىمدا «حابار» تەلەارناسىنان تاعى دا قانداي جاڭا جوبالار شىعادى؟
– جاڭا ماۋسىمداعى جاڭا باعدارلامالارعا كەلەتىن بولسام, «پاتريوت», «جاۋىنگەر», «ولجالى وتباسى», «نوۆىي كۋرس», «پرايم تايم» سىندى باعدارلامالاردى كورەرمەنگە ۇسىندىق. سونىمەن بىرگە ء«بىلىم», «Art global», «رەليگيا سەگودنيا», «بولشايا نەدەليا» باعدارلامالارىن ءارى قاراي جالعاستىرامىز. كورەرمەن كوزايىمىنا اينالعان «قاراقاتپەن شاي», «قىزىق times», «تاريح.تۇلعا.تاعدىر» جوبالارى دا ەفير اجارىن اشا تۇسپەك.
تىڭ تاقىرىپتار مەن الەۋمەتتىك ماسەلەلەردى جان-جاقتى زەرتتەيتىن, سان-ساۋالدارعا جاۋاپ ىزدەيتىن, حالىقتىڭ مۇددەسىنە قىزمەت ەتەتىن – ء«بىزدىڭ نازاردا», ونىڭ ورىس تىلىندەگى نۇسقاسى – «نارودنىي كونترول» ءوز جۇمىسىن جالعاستىرادى. قوعامنىڭ وزەكتى ماسەلەلەرىن تالقىلايتىن «Qoǵamdyq talqylaý» توك-شوۋى ءار سەيسەنبى سايىن تىكەلەي ەفيردە حالىققا ۇسىنىلىپ وتىر. ينتەراكتيۆتى الاڭ رەتىندەگى بۇل جوبانى – بەلگىلى ساياساتتانۋشى, جۋرناليست, جۇرگىزۋشى – سايات جوكەن مەن اگەنتتىگىمىزدىڭ تەلەجۇرگىزۋشىسى, جۋرناليست – جانسايا قوجاحمەتوۆا تىزگىندەۋدە. «بولشايا نەدەليا», «داۆايتە گوۆوريت» جوبالارى دا تىكەلەي ەفيردە شىعىپ جاتىر. ءبىر ەرەكشەلىك سول – قوعامدىق, ساياسي, ديسكۋسسيالىق فورماتتاعى باعدارلامالاردى live فورماتىندا كوپتەپ شىعارىپ جاتىرمىز.
وسى رەتتە ەلباسى نۇرسۇلتان نازارباەۆ پرەزيدەنتتىك وكىلەتتىگىن ۋاقىتىنان بۇرىن توقتاتقاننان كەيىنگى ءوزىنىڭ العاشقى سۇحباتىن «حابار» اگەنتتىگىنە قازان ايىندا بەرگەنىن ايتقىم كەلەدى. جالپى, قوعامداعى وزەكتى دەگەن ماسەلەلەردى, اكتۋالدى تاقىرىپتاردى وپەراتيۆتى تۇردە تاراتىپ, كونسترۋكتيۆتى سىن نەگىزىندە زەرتتەپ, سونى شەشۋگە ۇمتىلىپ جاتىرمىز. بۇل – باعدارلامالارداعى دا, جاڭالىقتارداعى دا باستى ترەند دەۋگە بولادى.
– بۇگىندە وتاندىق تەلەحيكايالاردىڭ, وتاندىق كينوفيلم ونىمدەرىنىڭ سانى ارتىپ كەلەدى. بۇل كوڭىلگە قۋانىش ۇيالاتادى. ال وسى وتاندىق كينوونىمدەرگە قىزىعۋشىلىق تانىتاتىن كورەرمەندەردىڭ سۇرانىسى قانداي؟
– بۇگىندە كورەرمەننىڭ تالعامى مەن تالابى جوعارى. قازاقتىلدى اۋديتوريانىڭ سۇرانىسى ارتپاسا, كەمىگەن ەمەس. وسى تۇرعىدان, اقپارات جانە قوعامدىق دامۋ مينيسترلىگىنىڭ قولداۋىمەن ءتۇسىرىلىپ جاتقان «حابار» اگەنتتىگىنىڭ فيلمدەرى قاشاندا كورەرمەننىڭ وڭ باعاسىن الىپ كەلەدى. بيىلعى جاڭا ماۋسىمدى «بالتاكولدە باقىتىم», «قارلىعاش ۇيا سالعاندا 2» تەلەحيكايالارىمەن باستادىق. قىركۇيەكتىڭ ەكىنشى جارتىسىنان بەرى قاراي «مادەنيەت ءۇيى» مەن «راۋزا» تەلەحيكايالارى, «كوكجال» دراماسى كورەرمەنگە جول تارتتى. ءارى قاراي, قاراشا ايىندا «ارمانداستار» كومەدياسى, «كەبەنەك» دراماسى مەن «دالا قىراندارى» كورەرمەن نازارىنا ۇسىنىلادى. «بەكزات», «قالامگەر» سىندى بىرقاتار جاڭا كوركەم فيلمدەردىڭ تۇساۋى كەسىلدى. بارلىق كينوتۋىندىلارىمىزدا قالانىڭ, اۋىلدىڭ ءومىرىن, تىنىس-تىرشىلىگىن كورەرمەنگە كورسەتۋدى باستى ماقسات ەتىپ كەلەمىز. ءتىپتى بۇل تەلەحيكايالارىمىزدى شەتەلدىك تەلەارنالاردا كوپتەپ ساتىپ الۋدا. «حابار» اگەنتتىگى تۇسىرگەن «انا جۇرەگى», «اعا», «وگەي جۇرەك» سىندى سەريالدارىمىزدى كورشىلەس وزبەك ەلىنىڭ تەلەارنالارى ساتىپ الىپ, ءوز تىلدەرىندە دۋبلياج جاساپ, كورسەتىپ جاتىر. سونىمەن بىرگە ولار Youtube جەلىسىندە دە كوپ قارالىپ, ۇلكەن ىقىلاسقا يە بولىپ جاتقانى جاسىرىن ەمەس.
جۋىردا عانا «حابار» اگەنتتىگىنىڭ تاپسىرىسىمەن تۇسىرىلگەن «التىنشى بەكەت» («شەستوي پوست») اتتى تەلەحيكايا 80-گە جۋىق كارتينانىڭ ىشىنەن مولدوۆاداعى توعىزىنشى «تەفي-دوستاستىق» حالىقارالىق تەلەۆيزيالىق فەستيۆالىنىڭ جەڭىمپازى اتاندى. فيلم 2010 جىلى قاتاڭ رەجىمدەگى تۇزەتۋ كولونياسىنان قاشقان سوتتالۋشىلار تۋرالى شىنايى وقيعا جەلىسىمەن تۇسىرىلگەن بولاتىن.
«حابار» اگەنتتىگىنىڭ تۋىندىلارى جۋىردا وتكەن MIPCOM حالىقارالىق اۋديوۆيزۋالدى نارىعىنا شىعارىلدى. كورمە جىل سايىن كانن قالاسىندا وتەدى. وندا دۇنيە ءجۇزىنىڭ ەفيرلىك, كابەلدىك, تسيفرلى جانە جەرسەرىكتىك تەلەۆيزيا جانە راديوحابار تاراتۋ سالاسىنداعى فيلمدەر مەن باعدارلامالار وندىرۋشىلەرى باس قوسادى. كانن فەستيۆالى اياسىنداعى كورمەگە قاتىسۋداعى ماقساتىمىز – وتاندىق كورەرمەندەرگە قىزىقتى بولاتىن ءونىمدى تابۋ. سونىمەن قاتار اگەنتتىك وندىرگەن تۋىندىلاردى الەمدىك نارىققا شىعارۋ. وندا بىرنەشە تەلەكومپانيامەن كەلىسسوزدەر جۇرگىزىلدى. شەتەلدىك ونىمدەردى تاراتۋ جونىندە ۇسىنىستار الدىق.
– كوركەم فيلم دەپ قالدىڭىز, بۇل تۋىندىنى كينوتەاترلاردان كورەمىز بە؟
– ءيا, جوعارىدا ايتىپ وتكەنىمدەي, وتكەن جىلدان باستاپ «حابار» اگەنتتىگى ءوز فيلمدەرىن ۇلكەن ەكراندارعا شىعارۋدى قولعا الدى. ەلباسىنىڭ «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» باعدارلامالارى اياسىندا ءبىراز دۇنيەلەر اتقارىلىپ جاتىر. وعان دالەل – قىركۇيەك ايىندا جارىققا شىققان كەڭەس داۋىرىندەگى پارتيا يدەولوگياسىنىڭ قىتىمىر قىسىمىندا قالعان قازاق قالامگەرلەرىنىڭ ءومىرى تۋرالى «قالامگەر» تاريحي دراماسى, قازان ايىنىڭ باسىندا ەلىمىزدىڭ كينوتەاترلارىنان كورسەتىلگەن – بەكزات ساتتارحانوۆتىڭ ءومىرى مەن سپورتتاعى جەتىستىگى تۋرالى «بەكزات» ءفيلمى. «قالامگەر» تاريحي دراماسىنىڭ دا, «بەكزات» بيوگرافيالىق كينوتۋىندىسىنىڭ دا سەريالدىق نۇسقاسى تاۋەلسىزدىك مەرەكەسى قارساڭىندا ەفيرگە شىعادى دەپ جوسپارلانۋدا. «حابار» اگەنتتىگى بايوپيك جانرىندا سەريالدار ءتۇسىرۋ داستۇرىنە قاشاندا بەرىك, سول ءداستۇردى جالعاستىرىپ جاتقانىمىزدىڭ ءبىر بەلگىسى رەتىندە مۇحاممەد حايدار دۋلاتيعا ارنالعان «دۋلاتي» تەلەحيكاياسى تاۋەلسىزدىك مەيرامى كۇنىندە كورەرمەن نازارىنا ۇسىنىلادى دەپ وتىرمىز. تاريحىن ۇمىتپاعان, ۇلىلارىن ۇلىقتاعان ەلدىڭ كەلەشەگى كەمەل, بىرلىگى مىعىم بولاتىنى ءسوزسىز عوي. ال ءبىز وسى تۋىندىلارىمىز ارقىلى بۇگىنگى ۇرپاققا ەل ەرلەرىنىڭ ەسىمىن تاعى ءبىر مارتە ۇلىقتاعىمىز كەلدى.
– اگەنتتىكتە تاعى قانداي جاڭالىقتار بولىپ جاتىر؟
– «حابار» ارناسىنداعى جاڭالىقتاردىڭ فورماتىن دا وزگەرتىپ جاتىرمىز. جاڭالىقتاردىڭ تاقىرىپتارى, ولاردى بەرۋ فورماسى وزگەردى. قوعامداعى ماڭىزدى, وزەكتى, وتكىر الەۋمەتتىك ماسەلەلەر ەندى ءجيى كوتەرىلەدى. مەملەكەتتىك مەكەمەلەردىڭ, شەنەۋنىكتەردىڭ, قۇزىرلى ورگانداردىڭ قاتەلىكتەرىن, جۇمىسىنداعى كەمشىلىكتەردى اشىق كورسەتەمىز, زەرتتەۋ جۇرگىزىپ, كونسترۋكتيۆتى نەگىزدە ەل اۋزىنداعى ماسەلەلەردىڭ ءمان-جايىن انىقتاپ, كىنالى تاراپتى اشىق ايتامىز, قوعامدىق تارتىپكە شاقىرامىز. الەۋمەتتىك پروبلەمالاردى شەشۋگە تىرىسامىز. بۇل – جاڭالىقتاردىڭ باستى ترەندى. «حابار» مەن «حابار 24» ارنالارىنىڭ جاڭالىقتارىندا ساراپتاماعا باسىمدىق بەرىلىپ, تىكەلەي ەفيرلەر كوبەيىپ جاتىر. ءبىر ماتەريالعا تەك بىرجاقتى پىكىر بەرمەي, بىرنەشە ساراپشىنىڭ ءتۇرلى پىكىرىنىڭ ايتىلۋىن قاداعالاۋدامىز.
اگەنتتىككە قاراستى تەلەارنالاردا سپورتتىق جاڭالىقتارعا دا ءجىتى نازار اۋدارىلۋدا.
– «حابار» اگەنتتىگى قۇرامىنا ءتورت تەلەارنا كىرەتىن ۇلكەن مەديا كومپانيا. وزگە ءۇش ارنادا نەندەي وزگەرىستەر بار؟
– دۇرىس ايتاسىز. اگەنتتىككە قارايتىن «حابار 24» تەلەارناسى تاۋلىگىنە 24 ساعات اقپارات تاراتاتىن قازاقستانداعى العاشقى تەلەارنا. ساعات سايىن حالىقتى سوڭعى جاڭالىقتارمەن قۇلاعدار ەتىپ وتىرادى. جاڭا ماۋسىمنان باستاپ «حابار 24» ارناسى تىكەلەي ەفيردە حابار تاراتۋدىڭ ۋاقىتىن كوبەيتۋدە. اۋقىمدى شارالاردىڭ ۇستىنەن, وقيعا ورىندارىنان تىكەلەي ەفيردە اقپارات جەتكىزەمىز. «حابار 24» بىردەن-ءبىر اقپاراتتىق ارنا بولعاندىقتان, مەملەكەتتىك, قوعامدىق ماڭىزى بار وقيعالاردى نەگىزگە الا وتىرىپ, اناليتيكالىق باعدارلامالاردىڭ, live فورماتىنداعى جوبالاردىڭ, جۋرناليستىك زەرتتەۋلەردىڭ, تىكەلەي ەفيرلەردىڭ سانى ارتۋدا.
«Kazakh TV» – HotBird 13B, Galaxy 19 ي AsiaSat 5 جەرسەرىكتەرىنىڭ بايلانىسى ارقىلى 4 قۇرلىقتاعى 118 مەملەكەتتى ەفيرىمەن قامتىپ وتىرعان ەلىمىزدەگى تۇڭعىش ۇلتتىق جەرسەرىكتىك تەلەارنا. تەلەارنادا شىعىپ جاتقان دۇنيەلەر 100% وتاندىق ءونىم. قازىر 300 ميلليون كورەرمەنگە ءداستۇر, تاريح جانە ەلدىڭ تۋريستىك جانە ينۆەستيتسيالىق الەۋەتى سەكىلدى سان سالانى قامتيتىن ءتۇرلى باعدارلامالارىن ۇسىنىپ كەلەدى. جاڭا ماۋسىمدا ارنانىڭ قورجىنى «Qazaq live» باعدارلامالار توپتاماسىمەن تولىقتىرىلدى. «Qazaq live» تسيكلى اياسىندا ەفيرگە جول تارتقان جوبالارعا توقتالاتىن بولسام: كوشپەلى وركەنيەت تاريحى مەن ەۋرازيا ەلدەرىنىڭ ءوزارا قارىم-قاتىناستارى جايلى «Keń dala» جوباسى, قازاق ادەبيەتى تۋرالى, قازاق ادەبيەتىنىڭ قارىمى مول قالامگەرلەرى مەن ولاردىڭ شىعارمالارى تۋرالى «Book club» باعدارلاماسى, قازاقستاننىڭ ايتۋلى كۇندەرى تۋرالى «Important dates in Kazakhstan» جوبالارى. سونىمەن قاتار كوشپەلى وركەنيەت كەزەڭىندە جاسالىنعان مۋزىكالىق اسپاپتار تۋرالى «Folk art», تامارا اسار تىزگىندەيتىن ۇلتتىق ءداستۇرىمىز تۋرالى – ء«داستۇر», اينۇر تۇرسىنباەۆا جۇرگىزەتىن تۇركى حالىقتارىنىڭ اس مازىرىنە ارنالعان – «تاعام» كورەرمەنگە جول تارتتى جانە «Kazakh TV» تەلەارناسىنىڭ ۇلتتىق ويىندارعا قانىق ەڭ اۋقىمدى جوباسى – «The nomads» رەاليتي-شوۋىنىڭ جاڭا ماۋسىمدا كورەرمەنگە جول تارتقانىن اتاپ وتكىم كەلەدى.
اگەنتتىككە قاراستى, ەلىمىزدىڭ كينو جانە تەاتر ونەرىنە ارنالعان – «El اrna» تەلەارناسىنا توقتالىپ وتسەم, ارنانىڭ كينو قورجىنى تۇركى الەمى ەلدەرى مەن ورتالىق ازيا مەملەكەتتەرىنىڭ «التىن قورىندا» ساقتالعان لەنتالارمەن تولىقتى. «El اrna» ارناسىنىڭ بيىلعى باستى جاڭالىعى – ەلىمىزدىڭ جەتەكشى تەاترلارىنىڭ سپەكتاكلدەرىن كورسەتە باستاۋى. وسى ورايدا زاماناۋي قويىلىمداردان بولەك, وتكەن جىلداردا تۇسىرىلگەن تەلەسپەكتاكلدەردى دە تاماشالاۋعا بولادى. بۇل دا كورەرمەنمەن قاۋىشۋدىڭ بىردەن-ءبىر قۇرالى دەپ بىلەمىز.
– اڭگىمەڭىزگە راحمەت.
اڭگىمەلەسكەن
ميراس اسان,
«Egemen Qazaqstan»