«الماتىدا شاعىن جانە ورتا بيزنەستى دامىتۋ ءۇشىن جەڭىلدەتىلگەن جاڭا باعدارلاما بويىنشا كاسىبىن ەندى باستاعان كاسىپكەرلەردىڭ جىلىنا 7 پايىزبەن نەسيە راسىمدەۋىنە مۇمكىندىك بار», دەپ حابارلادى الماتى قالاسى اكىمدىگىنىڭ ءباسپاسوز قىزمەتى.
ەل ەكونوميكاسىنىڭ درايۆەرى اتانعان الماتىدا جىل باسىنان بەرى جۇزدەگەن كاسىپكەر سۋبسيديا الىپ ۇلگەرگەن.
حالىققا جولداۋىندا ەل پرەزيدەنتى قاسىم-جومارت توقاەۆ شاعىن جانە ورتا بيزنەستى مەملەكەتتىك-قارجىلاي قولداۋ جۇيەسىن قايتا قاراۋدى ۇسىنىپ, كاسىپكەرلىكتى قولداۋعا 250 ميلليارد تەڭگە ءبولۋدى تاپسىردى. بۇل قاراجات «بيزنەستىڭ جول كارتاسى» باعدارلاماسىن دامىتۋعا جۇمسالماق. بۇل ەكەۋارا كەلىسىمنىڭ ارقاسىندا جۇزەگە اسادى. ياعني, الدىمەن مەملەكەت كاسىپكەرگە اياقتان تۇرۋعا سەپتەسسە, كەيىن بيزنەس يەسى سالىق تولەپ تۇرادى. ماسەلەن, الماتىدا 187 مىڭ شاعىن جانە ورتا بيزنەس نىسانى بار. جىل سايىن قالا قازىناسى سالىق ەسەبىنەن 67 پايىزعا تولىعىپ وتىرادى.
«الماتى «بيزنەستىڭ جول كارتاسى» باعدارلاماسى بويىنشا الدىڭعى قاتاردا تۇر. اسىرەسە, سۋبسيديالاۋ, كەپىلدىك جاساۋ. وعان قوسا, الماتىدا كاسىپكەرلىكتى ناقتى دامىتاتىن 3-4 ايماقتىق باعدارلاما بار. جانە دە «الماتى فينانس» اتتى جاڭا باعدارلاما جاساقتالىپ جاتىر. وندا جىلدىق پايىز الماتى قالاسى ءۇشىن 7 پايىزدى قۇرايدى», دەيدى «دامۋ» كاسىپكەرلىكتى دامىتۋ قورى اق باسقارۋشى ديرەكتورى ايمان سارسەنعاليەۆا.
«دامۋ» قورى – مەملەكەتتىك باعدارلامالاردى ىسكە اسىراتىن قوزعاۋشى كۇش. مەكەمە كاسىپ باستاعاندارعا دا, بيزنەستى جۇرگىزىپ جۇرگەندەرگە جان-جاقتى قولداۋ كورسەتەدى. وندا باس اياعى 42 باعدارلاما بار. ماسەلەن, بيزنەسكە جاڭا كەلگەندەرگە «بيزنەستىڭ جول كارتاسى» باعدارلاماسى اياسىندا 2 جارىم ملرد تەڭگەگە دەيىن سۋبسيديا بەرىلەدى. سونداي-اق قىزمەت ەتىپ جۇرگەن كومپانيالارعا قولداۋ 4 باعدارلاما بويىنشا كورسەتىلەدى.
«جاڭادان ىسكە قوسىلعان «قاراپايىم زاتتار ەكونوميكاسى» تۋرالى ايتار بولساق, قازىردىڭ وزىندە ماقۇلدانعان جوبالاردىڭ سانى ارتتى. ناقتىراق ايتساق, 14 جوبا. وزگەرىستەر دە ەنگىزىلىپ جاتىر. جاپپاي كاسىپكەرلىكتى ارتتىرۋ بويىنشا 150 شاقتى جوبانى قارجىلاندىردىق. بانكتەردە بوس رەسۋرستار ءالى دە بار. سايكەسىنشە كولەم جىل سوڭىنا دەيىن ۇلعالايادى. «بيزنەستىڭ جول كارتاسى» باعدارلاماسىن كوپ اراسىندا تانىمال. وسى ۋاقىتقا دەيىن 100 جوبانى قارجىلاندىرىپ, باعدارلاما اياسىندا كەپىلدىك بەردى», دەيدى «دامۋ» كاسىپكەرلىكتى دامىتۋ قورى ايماقتىق فيليال ديرەكتورى سۆەتلانا نازاريۋك.
مەملەكەتتىك قولداۋعا يە بولعانداردىڭ قاتارىندا مىنا دامىتۋ ورتالىعى دا بار. مەكەمە 2-دەن 17 جاسقا دەيىنگى بالالارعا مەكتەپتەن تىس ءبىلىم بەرۋگە اتسالىسادى. جەڭىلدەتىلگەن سۋبسيديالاۋ مەن نەسيە كەپىلدىگىنىڭ ارقاسىندا جاس كومپانيا 15 ادامدى جۇمىسپەن قامتىپ وتىر.
مەملەكەت تاراپىنان «بيزنەس جول كارتاسى» بويىنشا «ەڭبەك» باعدارلاماسىمەن كومەك العان بولاتىنبىز. ەڭ كومەگى تيگەنى وسى «دامۋ» قورىنان بەرىلگەن كومەك», - دەدى كومپانيا ديرەكتورى ءاسيما سۇلتانوۆا.
قازاقستاندا جاڭادان كاسىپ اشۋعا قولايلى جاعداي جاسالعان. ونىڭ ايقىن دالەلى - ەلىمىز «Doing business» اتتى الەمدىك كورسەتكىشتەگى 25-ورىنعا جەتكەنى.
ەستە بولسا, وسىعان دەيىن 28-بولعان ەدى.