ءال-فارابي اتىنداعى قازاق ۇلتتىق ۋنيۆەرسيتەتىندە كورنەكتى مەملەكەت جانە قوعام قايراتكەرى, xالىق جازۋشىسى ءابىش كەكىلباەۆ اتىنداعى اۋديتوريا اشىلدى. اسىل ءسوزدىڭ قاسيەتىن ەمگەن وسكەلەڭ ۇرپاقتى ءابىش الەمىنە جەتەلەيتىن ءدارىسحانا زاڭعار جازۋشىنى ەڭ العاش قاناتتاندىرعان فيلولوگيا فاكۋلتەتىنىڭ قابىرعاسىنان سالتانات قۇردى.
ءدارىسحانا تورىندە داۋلەتيار دارىن يەسىنىڭ بەكزات بولمىسىن كوز الدىڭا اكەلەتىن ايشىقتى پورترەتى ىلىنگەن. سان الۋان تاقىرىپتا, ءار قيلى جانردا قالام تەربەگەن جازۋشىنىڭ شىعارماشىلىق جولىن, ءومىر جىرىن, كوڭىل سىرىن تانىتاتىن ءتۇرلى ەستەلىكتەر مەن كىتاپتار كەكىلباەۆتىڭ ۇلت رۋحانياتىنا قوسقان تەڭدەسسىز ۇلەسىن تانىتىپ تۇرعانداي. ۋنيۆەرسيتەت ۇستازدارى مۇندا وتەتىن كۇندەلىكتى دارىستەردە تالىمگەرلەردى ءسوز زەرگەرىنىڭ شىعارماشىلىعىمەن ەتەنە تانىستىرۋ جوسپارلانعانىن ايتادى.
«سۋرەتكەر جازۋشى ءابىش كەكىلباەۆ ۋنيۆەرسيتەت قابىرعاسىندا جۇرگەن كەزدىڭ وزىندە جازعان العاشقى شىعارمالارىمەن-اق ادەبي قاۋىم مەن وقىرمان جۇرتشىلىقتىڭ نازارىن وزىنە اۋدارا بىلگەن كەسەك تۇلعا. بۇگىن قۋانىشىمىز ەرەكشە. ويتكەنى اۋديتورياعا كىرىپ-شىققان سايىن, ونىڭ قاسىنان وتكەن سايىن ءبىزدىڭ ستۋدەنتتەرىمىز تەبىرەنەتىن شىعار دەپ ويلايمىن. ءابىشتىڭ شىعارمالارىنىڭ ەڭ كەرەمەتى – ءابىشتىڭ كەز-كەلگەن سويلەمى قايتالانبايتىن سويلەم. مىڭ قالامگەر ءابىشتىڭ ءبىر سويلەمىن قايتالاي المايدى» - دەيدى ءال-فارابي اتىنداعى قازۇۋ پروفەسسورى بەيسەنعالي قابي ۇلى.
جازۋشىنىڭ جارى كلارا جۇماباەۆا مەن قاناتتاس-قالامداسى دۋلات يسابەكوۆ لەنتاسىن قيعان اۋديتوريانىڭ سالتاناتتى اشىلۋ ءراسىمى ء «ابىش كەكىلباەۆ – زامانانىڭ زاڭعار تۇلعاسى» اتتى رەسپۋبليكالىق عىلىمي-پراكتيكالىق كونفەرەنتسياعا ۇلاستى. وندا عالىمدار مەن جازۋشىلار كەكىلباەۆتىڭ قالامگەرلىك, قايراتكەرلىك ءھام ازاماتتىق تۇلعاسى تۋرالى تەبىرەنە تولعاپ, كوزىن كورگەندەر جارقىن ەستەلىكتەرىمەن ءبولىستى. جازۋشى سماعۇل ەلۋباي, پروفەسسور جانعارا دادەباەۆ, م.و. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ, فيلولوگيا عىلىمدارىنىڭ دوكتورى تەمىرحان تەبەگەنوۆ ءوز باياندامالارىنا تانىم-تاعىلىمى تەرەڭدە جاتقان ءابىش شىعارماشىلىعىن ارقاۋ ەتتى.
جيىن سوڭىندا جازۋشىنىڭ جارى كلارا جۇماباەۆا ءسوز الىپ, قالامگەردىڭ ستۋدەنتتىك جىلدارداعى بەلسەندىلىگى مەن وسكەن ورتاسى جايلى, انا تاربيەسىنىڭ وڭ ىقپالى تۋرالى ويلارىمەن ءبولىستى.
–جازۋشىنىڭ جارى بولۋ قيىن. بىراق سونى جەڭۋ كەرەك. وتباسى بەرەكەلى بولماسا, ازامات وسپەيدى. ازاماتتىڭ ويلاعان ويى دا جۇزەگە اسپايدى. ءابىشتىڭ اناسى 98 جاسقا كەلىپ قايتىس بولدى. سول كىسىنىڭ وسيەتىمەن مەن 50 جىل ابىشپەن بىرگە ءجۇردىم. بارلىق شارۋاسىن ىستەدىم. تولەن مەن دۋلات مەنى «كلارا باتەڭكەسىنىڭ باۋىن بايلاپ, كويلەگىنىڭ ىلگەگىن سالىپ جۇمىسقا جىبەرەدى» دەپ ازىلدەيدى. ودان مەن جامان بولعان جوقپىن. قاسيەتتى شاڭىراقتا جالاۋىن كوتەرگەن بۇگىنگى شارا ءابىشتىڭ ارۋاعىنا عانا ەمەس, بۇكىل قازاق ادەبيەتىنە جاسالعان قۇرمەت دەپ ەسەپتەيمىن», - دەدى كلارا جۇماباەۆا.