قىزىلوردادا «Qazaq Epos» رەسپۋبليكالىق اعارتۋ جوباسى اياسىندا ۇيىمداستىرىلعان «تۇلپار ءمىنىپ, تۋ العان!» بايقاۋىنىڭ وبلىستىق كەزەڭى ءوتتى. ەلباسىنىڭ «بولاشاققا باعدار: رۋحاني جاڭعىرۋ» جانە « ۇلى دالانىڭ جەتى قىرى» ماقالالارىنداعى مىندەتتەردى ارقاۋ ەتكەن شاراعا «قوبىلاندى باتىر» جىرىنىڭ ماراباي جىراۋ جىرلاعان نۇسقاسىن جاتقا ايتۋدان اۋدان مەن قالادا وتكەن ىرىكتەۋلەردەن وزىپ شىققان 27 وقۋشى قاتىستى.
بىلتىر قازاق ەپوستارىنىڭ اراسىنداعى شوقتىعى بيىك «الپامىس باتىر» جىرىن ايتۋدان باستالعان سايىس بيىل «قوبىلاندى باتىرعا» ۇلاسىپ, «Qazaq Epos» قوعامدىق قورىنىڭ بۇل باستاماسىن كۇللى رەسپۋبليكا قولداپ اكەتكەنى بەلگىلى. وسكەلەڭ ۇرپاقتى حالقىمىزدىڭ رۋحاني اسىل مۇراسىمەن سۋسىنداتىپ, ەرلىك پەن ەلدىككە تاربيەلەپ, باتىرلىققا باۋليتىن بايقاۋعا بيىل وبلىس بويىنشا 2733 بالا قاتىسىپتى. سولاردىڭ اراسىنان وزىپ شىققان 27 ورەننىڭ ونەرىن بەلگىلى جىراۋ, قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى الماس الماتوۆ باستاعان قازىلار القاسى باعالادى.
سايىس الدىندا قاتىسۋشىلارعا ساتتىلىك تىلەگەن قازىلار القاسىنىڭ توراعاسى 132 بەت, 5206 جولدان تۇراتىن جىردى جاتقا ايتۋ وڭاي ەمەستىگىن اتاپ ءوتتى. ء«بىز قازاق جىرىن بەلگىلى ءبىر دەڭگەيگە دەيىن جىرلادىق, ەندى ونى ءارى قاراي جالعاۋدى وسى جاستارعا تاپسىرامىز. بۇل ۇلتتىڭ جادىن جاڭعىرتىپ, وتكەنىمىزدى ونەگە ەتۋدىڭ جارقىن باستاماسى» دەگەن جىراۋ ءسوزى شارا ماڭىزىن ايشىقتاي ءتۇستى.
شارتقا سايكەس, وقۋشىلار ساحنادا العاشىندا جۇپتاسىپ ونەر كورسەتتى. وسى سىننان ىرىكتەلگەن 8 وقۋشى ەكىنشى اينالىمدا جىردىڭ ىشىندەگى كونەرگەن, تاريحي سوزدەردىڭ ماعىناسىن اشىپ, سىنىبىنا سايكەس قازاق ادەبيەتى وقۋلىعى بويىنشا ازىرلەنگەن سۇراقتارعا جاۋاپ بەردى. ەپوستاعى ەسكى سوزدەردى تاراتا ايتىپ, ساۋالدارعا بارىنشا تياناقتى جاۋاپ بەرگەن ورەندەردىڭ تالابىنا ريزا بولدىق. قازىلار بۇل سىندا تەڭ تۇسكەن 8 بالانى كەلەسى اينالىمعا شىعارىپ, وندا وقۋشىلار جىردىڭ بەلگىلى ءبىر تۇسىن جاتقا ايتۋدان جارىستى.
بەس ساعاتقا سوزىلعان سايىس قورىتىندىسىندا وبلىس اكىمىنىڭ ورىنباسارى ناۋرىزباي بايقاداموۆ جەڭىمپاز جۇلدەسى – 1000 000 تەڭگەنى قازالى اۋدانىنداعى №129 مەكتەپتىڭ 10 سىنىپ وقۋشىسى گۇلزيرا قونىسبايعا تابىستادى. ەكىنشى ورىن بايگەسى – 600 000 تەڭگەنى قارماقشى اۋدانىنداعى №272 ورتا مەك- تەپتىڭ 8 سىنىپ وقۋشىسى دايانا تولىباەۆا الدى, ءۇشىنشى ورىن قازالىلىق ورەننىڭ ۇلەسىنە ءتيىپ وتىر. وسى اۋدانداعى №170 مەكتەپتىڭ 7 سىنىبىندا وقيتىن گاۋھار ازەن 300 000 تەڭگەنى يەلەندى.
وسى كۇنى ۇستازدار كۇنىنە وراي وتكەن كەشتە وقۋشىلاردى جىر سايىسىنا دايىنداعان جەتەكشىلەرىنە دە ەرەكشە قۇرمەت كورسەتىلدى. وبلىس اكىمى قۋانىشبەك ىسقاقوۆ جەڭىمپاز وقۋشىنىڭ مۇعالىمى گۇلفايرۋز الىشەۆاعا 2 000 000 تەڭگە, جۇلدەگەر شاكىرتتەردى جارىسقا ازىرلەگەن مەرەكە قايناروۆا مەن جادىرا كوشەكباەۆالارعا 1 200 000 جانە 600 000 تەڭگەنىڭ سەرتيفيكاتتارىن سالتاناتتى جاعدايدا تابىس ەتتى.
مۇرات جەتپىسباەۆ,
جۋرناليست
قىزىلوردا