كەنشىلەر استاناسىندا «استانا» حالىقارالىق قارجى ورتالىعىنىڭ دەلەگاتسياسى مەملەكەتتىك ورگاندار, «اتامەكەن» ۇلتتىق كاسىپكەرلەر پالاتاسى, سونداي-اق قاراعاندى وبلىسىنىڭ اكادەميالىق توپتارى وكىلدەرىمەن كەزدەسۋ وتكىزدى.
كەزدەسۋ بارىسىندا قارجى جانە ينۆەستيتسيا سالاسىنداعى زاماناۋي مامانداردىڭ جەتىسپەۋشىلىگى اڭگىمەگە ارقاۋ بولدى. سونىمەن قاتار قارجى قىزمەتتەرىن تۇتىنۋشىلاردى قورعاۋ جونىندە تۇرعىنداردىڭ حاباردار بولۋ دەڭگەيىن كوتەرۋ, بيزنەستى جۇرگىزۋ شارتتارى جانە ينۆەستيتسيا نەگىزدەرى تۋرالى اقپاراتتاندىرۋدى ارتتىرۋ سياقتى وزەكتى ماسەلەلەر تالقىلاندى.
شارا بارىسىندا جاستار مەن اكادەميالىق توپتاردىڭ قارجىلىق جانە ينۆەستيتسيالىق مادەنيەتىن قالىپتاستىرۋ, ينۆەستيتسيا نەگىزدەرى تۋرالى اقپارات بەرۋ ماقساتىندا جەرگىلىكتى جوعارى وقۋ ورىندارى ستۋدەنتتەرى مەن وقىتۋشىلارى ءۇشىن دارىستەر ۇيىمداستىرىلدى.
قاتىسۋشىلار الدىندا ءسوز سويلەگەن احقو باسقارۋشى ديرەكتورى, دەلەگاتسيا باسشىسى ايدار قازىباەۆ قارجى سالاسىندا قاجەتتى زاماناۋي بىلىممەن قارۋلانعان مامان كادرلاردىڭ جەتىسپەيتىنىن تىلگە تيەك ەتتى.
– سوندىقتان ءبىز اكادەميالىق توپتارمەن كەزدەسۋ بارىسىندا ولاردىڭ وزدەرىنىڭ بىلىمدەرىن, ىنتالارىن حالىقارالىق قارجى سەرتيفيكاتتارىنا قاراي بەيىمدەۋى كەرەكتىگىن ايتامىز. نەگە دەسەڭىز, الەمگە جوعارى ءبىلىم ەمەس, سەرتيفيكاتتىڭ كوبىرەك بولعانى كەرەك. ءبىز دەكاندار مەن رەكتورلارعا قارجى فاكۋلتەتتەرىنىڭ جوعارى كۋرسىنداعى ستۋدەنتتەردى سەرتيفيكاتقا سىناق تاپسىرۋعا دايىندالۋىنا ارنالسا دەگەن تىلەك ايتامىز, – دەدى ايدار قازىباەۆ.
ەسكە سالساق, ينۆەستيتسيالاۋدىڭ نەگىزدەرى تۋرالى اقپاراتپەن قامتاماسىز ەتۋ جانە قارجىلىق قىزمەتتەردى تۇتىنۋشىلاردى قورعاۋدى ماقسات ەتكەن بۇل ءىس-شارا ءداستۇرلى تۇردە قازاننىڭ ءبىرىنشى اپتاسىندا الەمنىڭ 80 ەلىندە وتكىزىلەدى.
قاراعاندى