فورۋمدى ۇيىمداستىرۋشىلار ەلىمىزدە مۇگەدەكتىگى بار جاندار ءۇشىن ىڭعايلى ورتا قۇرۋ ماسەلەسى وتە وزەكتى ەكەنىن كۇن تارتىبىنە شىعارىپ جاتىر.
«الماتى ايەلدەر كلۋبى» مەن «ينكليۋزيۆتى قازاقستان» قوعامدىق بىرلەستىگىنىڭ باسشىسى بەنت-انات بەيسەمباەۆا جۋرناليستەرمەن كەزدەسكەن كەزدە مۇگەدەكتىگى بار ادامدار جەكە وزدەرى ەلىمىزدى ينكليۋزيۆتى ەتىپ جاساي المايتىنىن ايتتى. ونى تەك قوعام بەلسەندىلەرىمەن جانە ازاماتتىق قوعام قۇرۋشى ازاماتتاردىڭ قاتىسۋىمەن عانا جۇزەگە اسىرا الادى.
«بۇگىنگى فورۋمعا جاپونيا, فرانتسيا, گەرمانيا ەلدەرىنىڭ مۇگەدەكتەر قوعامىنىڭ باسشىلارىن شاقىردىق. الدىمەن ولارعا بارىپ جاعدايدى كوردىك, ياعني ولاردىڭ تاجىريبەسىمەن تانىستىق. ولاردا مۇگەدەكتىگى بار جاندار وزدەرىن كەمتار سەزىنبەۋ ءۇشىن بار جاعداي جاسالعان. ولار دەنى ساۋ ادامدارمەن قاتار جۇمىسقا بارىپ, وزگە دە قوعامدىق شارالارعا ەش قيىندىقسىز قاتىسا الادى. سوندىقتان بىزگە بۇل باعىتتا اتقاراتىن جۇمىس ءالى كوپ» دەدى ول جۋرناليستەرمەن كەزدەسكەن كەزدە.
جيىن بارىسىندا كەدەرگىسىز تۋريزم, مۇگەدەكتەردىڭ قولجەتىمدىلىگى جانە مۇگەدەكتىگى بار ادامداردى جۇمىسقا ورنالاستىرۋ ماسەلەسى قارالادى. سەبەبى ەلىمىزدە مۇگەدەك جانداردىڭ ءتۋريزمى ءۇشىن ەشقانداي جاعداي جاسالماعان. ويتكەنى قوناقۇيلەردە ولارعا ارنالعان نومىرلەر تاپشى. ءبىر قوناقۇيدە ءبىر عانا ورىن بەلگىلەنگەن.
ءسوز اراسىندا ول قولجەتىمدىلىك جاعى دا اقساپ تۇرعانىن, پاندۋس, ارنايى كوتەرمەلەر, ينۆوتاكسيلەر جەتكىلىكسىز ەكەنىن ايتتى. مۇگەدەكتىگى بار ادامداردىڭ ءوز ماماندىعى بويىنشا جۇمىسقا ورنالاسۋى قيىن.
«فرانتسيا مەن گەرمانيادا ولاردىڭ ءبارى جۇمىس ىستەيدى. ول جاقتا ارباعا تاڭىلعان ادامدار وزدەرىن كەمتار سەزىنبەيدى, بارىنە قولجەتىمدىلىك بار. بىزدە دە سونداي بولسا دەيمىز. قازىر ەلىمىزدە مەملەكەتتىك ەمەس مەكەمەلەر مۇگەدەكتەرگە قامقورلىق كورسەتۋ ماقساتىندا ولاردى جۇمىسقا الا باستادى. مۇنداي كەزدە ولار جاريا سالىپ, كوپشىلىككە بىلدىرە بەرمەيدى. الايدا جاريالاۋ كەرەك دەپ ويلايمىن, بۇل پيار ءۇشىن ەمەس, وزگەلەر دە سولاي ىستەۋ ءۇشىن قاجەت. ءبىزدىڭ «ايەلدەر» كلۋبى بەس جىلدان بەرى ءار جۇما سايىن قارتتارعا تەگىن نان تاراتىپ كەلەمىز. كەيبىرى ءبىزدى وزدەرىن جارنامالاعىسى كەلىپ ءجۇر دەپ ايتىپ جاتادى. بۇل مۇلدە ولاي ەمەس, ەلىمىزدە جاعدايى بار ادامدار دا وسىلاي جاساسا دەگەن ويمەن اتقارىلىپ جاتىر. قازاقستاندا جاعدايى تومەن ادامدارعا كومەكتەسكىسى كەلەتىندەر بار, الايدا ونى قالاي جاساۋ كەرەكتىگىن بىلمەي جاتادى. مىنە سوندايلار بىزدەن ۇلگى الىپ جاتسا جامان بولماس ەدى», دەدى بەنت-انات بەيسەمباەۆا.