جاقىندا ەۋرازيالىق دامۋ بانكىنىڭ ينتەگراتسيالىق زەرتتەۋلەر ورتالىعى تاراپىنان ەۋرازيالىق ەكونوميكالىق وداق ەلدەرىنە ورتاق ۆاليۋتا قولدانىسقا ەنگىزىلۋى مۇمكىن ەكەنى ايتىلعان بولاتىن. LS-ءتىڭ وسى ماسەلەگە قاتىستى سۇراعىنا جاۋاپ بەرگەن ۇلتتىق بانك ورتاق ۆاليۋتاعا قاتىستى بولجامداردى جوققا شىعاردى.
– ۆاليۋتالىق وداق قۇرۋ جانە ورتاق ۆاليۋتانى قولدانىسقا ەنگىزۋ قاراستىرىلىپ جاتقان جوق. سونىمەن قاتار اقشا-نەسيە ساياساتىن جۇرگىزەتىن ورتالىق بانك قۇرۋ دا قاراستىرىلمايدى. ەادب ەۋرازيالىق ەكونوميكالىق وداقتىڭ جۇمىسشى ورگانى ەمەس, ونىڭ قىزمەتى كەلىسىمشارت بويىنشا قاراستىرىلماعان,– دەلىنگەن ۇلتتىق بانكتىڭ جاۋابىندا.
باس بانك ەادب-نىڭ قىزمەتى وداققا مۇشە مەملەكەتتەردە ينفراقۇرىلىمدىق جوبالاردى قارجىلاندىرۋ مەن ونەركاسىپتىك وندىرىستەردى قولداۋعا عانا باعىتتالعانىن اتاپ ءوتتى.
ەادب-نىڭ ينتەگراتسيالىق زەرتتەۋلەر ورتالىعىنىڭ باسشىسى ەۆگەني ۆينوكۋروۆ وداققا مۇشە مەملەكەتتەر رەسەيمەن اراداعى قارجىلاي وپەراتسيالاردى رۋبلمەن جۇرگىزەتىنىن, ال ءوزارا وپەراتسيالاردى دوللارمەن جۇرگىزەتىنىن ايتا كەلىپ, ورتاق ۆاليۋتا وسى ولقىلىقتى جويۋعا كومەكتەسەدى دەگەن پىكىر بىلدىرگەن بولاتىن. «ايماقتىق اقشا بىرلىگى ءبىرىنشى كەزەكتە ساۋدا اعىندارىنا قىزمەت كورسەتۋگە كەرەك» دەلىنگەن ونىڭ پىكىرىندە.
وسى ورايدا, وداق ەلدەرىنە ورتاق ۆاليۋتا ەنگىزۋ تۋرالى اڭگىمە بۇعان دەيىن دە بىرنەشە رەت كوتەرىلگەنىن ايتا كەتەيىك.