كەنشىلەر استاناسىندا «التىن قازىنا» جانە «شەبەرلەر قالاسى» اتتى رەسپۋبليكالىق ەكى بايقاۋدىڭ وبلىستىق كەزەڭىنە قاتىسقان جۇمىستاردىڭ كورمە-بايقاۋى اشىلدى.
«رۋحاني جاڭعىرۋ» باعدارلاماسى اياسىنداعى بۇل مادەني شاراعا قاتىسۋ ءۇشىن ءوڭىردىڭ بارلىق مەكتەپتەرىنەن وقۋشىلار قولىنان شىققان 150-دەن استام جۇمىس تۇسكەن بولاتىن. ال ولاردىڭ ىشىندەگى ەڭ ۇزدىكتەرى عانا وبلىستىق بەينەلەۋ ونەرى مۇراجايىنىڭ تورىنەن ورىن الدى.
كورمە-بايقاۋدى قاراعاندى وبلىستىق ءبىلىم بەرۋ باسقارماسى مەن «سارىارقا دارىنى» بالالارعا قوسىمشا ءبىلىم بەرۋ ايماقتىق عىلىمي-پراكتيكالىق ورتالىعى ۇيىمداستىردى.
«سارىارقا دارىنى» ورتالىعى باسشىسىنىڭ ورىنباسارى سايات بالماقاەۆ بۇل بايقاۋلاردىڭ بەينەلەۋ ونەرى مەن بالالار شىعارماشىلىعىن دامىتۋعا جانە قولداۋعا باعىتتالعانىن اتاپ ءوتتى.
– جۇمىستار جەتى اتالىم بويىنشا ۇسىنىلدى. قازىلار القاسى ءبىر اپتا بويى بۇل جۇمىستاردى باعالايتىن بولادى. جەڭىمپازداردى سەرتيفيكاتتارمەن, ديپلومدارمەن جانە ۇيىمداستىرۋشىلاردىڭ سىيلىقتارىمەن ماراپاتتايمىز. ۇزدىك شىققان جۇمىستار الدىمىزداعى قاراشا ايىندا شىمكەنت قالاسىندا وتەتىن رەسپۋبليكالىق بايقاۋعا ۇسىنىلاتىن بولادى. قاتىسۋشىلاردىڭ جاسى 11 مەن 16 جاس ارالىعىندا, – دەدى ول.
وسىمەن ءۇشىنشى جىل قاتارىنان ۇيىمداستىرىلىپ كەلە جاتقان كورمە-بايقاۋعا قاتىسۋشىلار اراسىندا قاراعاندى, تەمىرتاۋ, اباي, ساران قالالارىنىڭ جانە جاڭاارقا, بۇقار جىراۋ, قارقارالى اۋداندارىنىڭ وقۋشىلارى بار.
قاراعاندى وبلىسى