ارالدىڭ ازاماتى – اسپاننىڭ اقيىعى

تەڭىز قولتىعىنداعى قاراپايىم «قاراتەرەڭ» اۋىلىنان 25 ۇشقىش شىققان ەكەن, سول ابزال اعالارى سەكىلدى ماناستىڭ دا مەجەسى بيىك بولاتىن. سول مەجەسى دەگەنىنە جەتتى.

ول ارال قالاسىنداعى №13 ورتا مەكتەپتىڭ تۇلەگى. قازاقى تاربيەدەن شىققان تالانتتى ۇل اقتوبە قالا­سىن­دا­عى اۋە-قورعانىس كۇشتەرىنىڭ اسكەري ينستيتۋتىندا وقىپ, «ۇشۋ اپپاراتتارىن پايدالانۋ. مايدان اۆياتسيالىق-كوماندالىق تاكتيكاسى» ماماندىعىن الدى. ءسويتىپ شىمكەنت قالاسىنداعى 55652 اسكەري بولىمىنە ۇشقىش بولىپ ورنالاستى. 2008 جىلدان بەرى وقۋ-جاتتىعۋدا ابدەن شىڭدالىپ, كاسىبي مامان دارەجەسىنە كوتەرىلگەن. مىنە, سونىڭ ناتيجەسى ازاماتتىڭ ابىرويىن اسقاقتاتتى.

رەسەيدىڭ ريازان قالاسىندا وتكەن حالىقارالىق ارميا ويىندارىنا ءار مەملەكەتتىڭ ساربازدارى جينالدى. ولار اسكەري ۇشاقتى يگەرۋدەگى مىقتىلىعى مەن ەپتىلىگىن سىنعا سالدى. مايور ماناس داۋلەتباەۆ قازاقستان قۇراماسىنىڭ ساپىندا ونەر كورسەتتى. ماناس جالعىز ەمەس, جانىندا ارىپتەسى دميتري كوروبكين بار. بۇلارعا بەرىلگەن تاپسىرمانىڭ ءبىرى – فيزيكالىق دايىندىق, پيلوتتىق تەحنيكانى جانە نىساناعا ءدال سوققى جاساۋ مەن جوعارعى اەروباتيكانى كاسىبي شەبەرلىكپەن ورىنداۋ ەدى.

ارينە, دودادا دارابوزدار دارا شىعادى. قازاقستاندىق ەكيپاج «جوي­عىش اۆياتسيا» جانە «تىكۇشاق» اتا­لىمى بويىنشا العى شەپتەن كو­رىن­دى. قورىتىندى ەسەپتە قازاقستان ءۇشىن­شى ورىن الدى. ال جەكەلەي سىندا ارالدىڭ ازاماتى, اسپاننىڭ اقيىعى – ماناس­تىڭ الدىنا تۇسەر جان بولمادى.

– جالپى, قورىتىندى بويىنشا رەسەيلىك جانە قىتايلىق ۇشقىش­تار­دان كەيىنگى ورىنعا تۇراقتادىق. سايىس 3 كەزەڭنەن تۇردى. ءبىرىنشى دەنەشىنىقتىرۋ بولسا, ەكىنشى جەردەگى نىسانالاردى ىزدەپ تابۋ, ال ودان كەيىن اۆياتسيالىق قارۋ-جاراقتى پايدالانۋ ارقىلى نىساندى جويۋ. مىنە, وسى كەزەڭدەردەن سۇرىنبەۋگە تىرىستىق. ەڭ باستىسى, جاتتىقتىرۋشىنىڭ تاپسىرماسى ءساتتى ورىندالدى, – دەيدى ول.

التىن جۇلدە العان ماناس داۋلەت­باەۆ «سۋ-25» اسكەري ۇشاعىن تىزگىن­دە­گەن تالانتتى ۇشقىش. ول بۇل كۇندە مىندەتىن مۇلتىكسىز ورىنداپ, قىز­مەتىنە ادالدىعىمەن كورىنىپ كەلەدى.

قانىبەك ءابدۋوۆ

قىزىلوردا