دەنساۋلىق ساقتاۋ ءمينيسترى تۇركىستان وبلىسىنداعى ءىس-ساپارى بارىسىندا ايماقتاعى مەديتسينا قىزمەتكەرلەرىمەن كەزدەستى. بۇل تۋرالى ۆەدومستۆونىڭ ءباسپاسوز قىزمەتى حابارلادى.
ەلجان ءبىرتانوۆ دارىگەرلەرگە دەنساۋلىق ساقتاۋ سالاسىن قارجىلاندىرۋدىڭ مىندەتتى الەۋمەتتىك مەديتسينالىق ساقتاندىرۋ ء(مامس) اياسىنداعى جاڭا مودەلىن ءتۇسىندىردى. ول مەديتسينالىق كومەككە قاجەتتى قارجى تاپشىلىعىن جويۋعا, جەكە كلينيكالاردى تارتۋعا, دارىگەرلەر مەن ورتا مەديتسينالىق قىزمەتكەرلەردىڭ جالاقىسىن كەزەڭ-كەزەڭىمەن ارتتىرۋعا مۇمكىندىك بەرەدى. سونداي-اق مينيستر مەديتسينالىق كومەكتىڭ ەكى پاكەتىن ەگجەي-تەگجەيلى ءتۇسىندىردى.
- تەگىن مەديتسينالىق كومەكتىڭ كەپىلدەندىرىلگەن كولەمى سول كۇيدە قالادى, ال مەديتسينالىق ساقتاندىرۋ اياسىندا قوسىمشا كونسۋلتاتسيالىق-دياگنوستيكالىق قىزمەتتەر, دارىلىك پرەپاراتتار جانە كۇردەلى وپەراتسيالاردان كەيىن وڭالتۋ سىندى قىزمەتتەر كورسەتىلەدى,- دەدى ەلجان ءبىرتانوۆ.
وبلىستاعى اۋرۋحانا مەن ەمحانا باسشىلارىنىڭ الدىندا ءسوز سويلەگەن ە. ءبىرتانوۆ مەديتسينالىق رەفورما جايلى حالىققا كەڭىنەن اقپاراتتىق-ءتۇسىندىرۋ جۇمىستارىن جۇرگىزۋ قاجەت ەكەنىن ايتتى. مىندەتتى الەۋمەتتىك مەديتسينالىق ساقتاندىرۋدىڭ ءساتتى ىسكە قوسىلۋى دارىگەرلەردىڭ ءمامس-ءتى قالاي قابىلدايتىنىنا جانە جاڭا جۇيەنىڭ ارتىقشىلىقتارىن ءوز پاتسيەنتتەرىنە قالاي جەتكىزەتىنىنە بايلانىستى بولادى.
سونىمەن قاتار, مينيستر تۇركىستانداعى گراند رويال قوناق ءۇيىنىڭ اۋماعىندا بولعان جارىلىستان زارداپ شەككەن 5 ناۋقاس ەم قابىلداپ جاتقان قالالىق ورتالىق اۋرۋحاناعا دا باردى.
اۋرۋحانانىڭ باس دارىگەرى جانبولات دىلدابەكوۆتىڭ ايتۋىنشا, 10 قىركۇيەكتە اۋرۋحاناعا شۇعىل تۇردە 5 ادام تۇسكەن. جاراقاتتانىپ, تەرىسى كۇيىك شالعان ءۇش ناۋقاس تراۆماتولوگيا بولىمىنە جاتقىزىلدى. دەنەسىنىڭ 36 پايىزى كۇيىپ قالعان ءبىر پاتسيەنت جانساقتاۋ بولىمىندە. ۆەدومستۆو باسشىسى ورتاشا اۋىر كۇيدە جاتقان ناۋقاستاردىڭ جاعدايىن ءبىلدى.
- زارداپ شەككەندەرگە قاجەت ءدارى-دارمەك بار, ەمدەلۋشىلەدىڭ جاعدايى قاۋىپتى ەمەس,- دەدى جانبولات دىلدابەكوۆ.
ەلجان ءبىرتانوۆ جارالانعان ناۋقاستارعا ءتيىستى مەديتسينالىق كومەك كورسەتۋدى تاپسىردى جانە ناۋقاستاردىڭ جاعدايىن جەكە باقىلاۋىنا الدى.