قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ شۆەيتساريا كونفەدەراتسياسىنىڭ قازاقستانداعى ءتوتەنشە جانە وكىلەتتى ەلشىسى ستەفان نەللەندى قابىلدادى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋدە ءماجىلىس توراعاسى قازاقستان مەن شۆەيتساريا ءارىپتەستىك بايلانىستى نىعايتىپ كەلە جاتقانىن ايتا كەلىپ, ەكى ەل اراسىنداعى ساۋدا اينالىمى قارجى داعدارىسى كەزىندە باسەڭدەگەنمەن, الداعى كەزەڭدە جوعارى قارقىنعا يە بولاتىنىنا سەنىم ءبىلدىردى.
قازاقستان مەن شۆەيتساريا اراسىنداعى ىنتىماقتاستىق بايلانىستىڭ دامۋىنا ەشقانداي كەدەرگى جوق. تاراپتار وسىنداي ورتاق پىكىر ايتتى.
ەلشى سوڭعى جىلدارى ەكى ەل اراسىنداعى بايلانىستىڭ جاڭا دەڭگەيگە كوتەرىلگەنىن, مۇناي سالاسىن يگەرۋدە بىرلەسە اتقاراتىن ىستەر كوپ ەكەنىن ايتتى.
ءماجىلىس توراعاسى قازاقستاننىڭ ەقىۇ-عا توراعالىق ەتۋى جانە باسقا دا ەلىمىزدىڭ سىرتقى ساياساتتاعى ۇستانعان كوزقاراسى جايلى اڭگىمەلەدى.
تاراپتار ساۋدا-ەكونوميكالىق اينالىمدى جاقسارتىپ, تاجىريبە الماسۋ ەكى ەل پارلامەنتتەرى اراسىنداعى دوستىق توبىنىڭ جۇمىسىن جانداندىرىپ, بايلانىستى دامىتۋ ماڭىزدى ەكەنىن ايتتى.
كەزدەسۋ سوڭىندا ءماجىلىس توراعاسى ەلشىنىڭ قازاقستانداعى مارتەبەلى قىزمەتىنە تابىس تىلەدى.