حالىقتىڭ سەنىمدى وكىلى بولعان سوڭ ەل ىشىنە ءجيى بارىپ, قاراپايىم ادامدارمەن كەزدەسىپ تۇرامىز. اڭگىمە بارىسىندا ولاردىڭ ايتقان وي-پىكىر, ءوتىنىش-تىلەكتەرىنەن قوعامدا بولىپ جاتقان وقيعالاردىڭ جاقسى-جاماندى سيپاتتارىن انىق بايقاپ وتىراسىڭ.
«حالىق ايتسا, قالت ايتپايدى» دەگەن. سونداي كەزدەسۋلەردە كوتەرىلگەن ماسەلەلەردى وي تارازىسىنان وتكىزە كەلە, جۇرتتىڭ جانايقايىنا قۇلاق ءتۇرىپ, ءاربىر ايتقان ءسوزىن ساناپ تىڭدايتىن ۋاقىت جەتكەن ەكەن-اۋ دەگەن تۇجىرىمعا تابان تىرەيسىڭ. ەلباسىنىڭ ءوزى «ەل بىرلىگى – ەڭ اسىل قاسيەت» دەپ بەكەردەن-بەكەر ايتقان جوق.
كەشەگى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا مەملەكەت باسشىسى قاسىم-جومارت توقاەۆ «ەلىمىزدىڭ قوعامدىق-ساياسي ءومىرىن جاڭعىرتپاي, تابىستى ەكونوميكالىق رەفورمالاردى ىسكە اسىرۋ مۇمكىن ەمەس», دەپ اتاپ ءوتتى. مۇنداي تاعدىرشەشتى مالىمدەمە ەلىمىزدە جاڭا ساياسي قۇرىلىمنىڭ ىرگەتاسى قالانا باستادى دەگەندى اڭعارتقانداي. سايىپ كەلگەندە, بۇل يگى ارەكەت قوعام, حالىق جانە بيلىك اراسىندا ءتيىمدى بايلانىس ورناتۋعا قىزمەت ەتسە, وندا مۇنىڭ الەمدىك قوعامداستىق الدىندا ابىروي-بەدەلىنە كىرشىك تۇسىرمەۋدى ۇلى ماقسات ەتكەن ەلىمىز ءۇشىن مىقتى تىرەك بولارى ءسوزسىز.
ەل پرەزيدەنتىنىڭ ء«بىز بۇعان ەلباسى ساياساتىنىڭ ساباقتاستىعىن ساقتاپ, جۇيەلى رەفورمالار جۇرگىزۋ ارقىلى قول جەتكىزە الامىز», دەگەن سوزىندە بايسالدى ساياسات, ساليقالى وي جاتىر. قولداعى باردى ۇقساتا الماي, قۇت-بەرەكەسىن قاشىراتىنداردى تالاي كورىپ ءجۇرمىز. وسى تۇرعىدان العاندا, ارتقا جالتاقتاي بەرمەي, ەرتەڭگى كۇننىڭ نەسىبەسىن ەلدىڭ جولىنا ارناعان اۋقىمدى جوبالاردىڭ جەمىستى ناتيجەسىنەن ىزدەۋ ءبىز كۇتكەن جاقسى ءومىردىڭ نىشانى بولۋى كەرەك.
ءيا, بيلىك پەن حالىقتىڭ اراسىندا سىندارلى ديالوگ ورناسا, ايتىلعان اششى شىندىق پەن وتكىر سىننىڭ ءجۇزى مىلقاۋ جارتاسقا ءتيىپ مايىرىلماي, ءتيىستى تاراپتىڭ ار-وجدانىن وياتىپ, كۇش-جىگەرىن جاقسى ىستەرگە قايراسا, بۇگىنگى قوعامدا ۇستەمدىك قۇرا باستاعان نارازىلىق اتاۋلىنىڭ الدىن الۋعا بولۋشى ەدى.
راس, مەملەكەت باسشىسى ايتقانداي, قوعامدىق-ساياسي تۇرعىدا جاڭعىرعان ەلدىڭ عانا بوساعاسىنان قۇت كەتپەيدى. بيلىگى مەن قوعامى ءتىل تابىسقان مەملەكەتتە حالىقتىڭ كوكەيىندە جۇرگەن ماسەلەلەر – جەر تۋرالى داۋ-دامايدى رەتتەۋ, الەۋمەتتىك جاعدايدى وڭالتۋ, تۋعان ءتىلدىڭ بولاشاعىن باياندى ەتۋ, ءبىلىم ساپاسىن ارتتىرۋ جانە باسقا دا تولىپ جاتقان پروبلەمالار كەزەڭ-كەزەڭىمەن شەشىمىن تاباتىنىنا سەنىم مول. سوندا عانا ءبىز, پرەزيدەنت ايتقانداي, «قارقىندى دامىعان جانە ينكليۋزيۆتى ەكونوميكا» قۇرا الامىز.
ءسوزىمىزدى تۇيىندەر بولساق, بەرەكە مەن بىرلىك, اقىل مەن پاراسات بۇگىنگى قيىندىقتاردى تىزە بۇكتىرىپ, جاقسى كۇندەرگە جەتەلەيتىن الەۋەتتى كۇش ەكەنىن ەستەن شىعارماعان ءجون.
بەكزات التىنبەكوۆ,وبلىستىق ءماسليحاتتىڭ دەپۋتاتى, وبلىستىق قوعامدىق كەلىسىم كەڭەسىنىڭ توراعاسى. Nur Otan پارتياسى ساياسي كەڭەسىنىڭ مۇشەسى
قاراعاندى وبلىسى