ەلوردادا دەمالىس كۇنى قايدا بارۋعا بولادى

قر قك ۇلتتىق اسكەري-پاتريوتتىق مۋزەيىندە «1939 جىل. ەكىنشى دۇنيەجۇزىلىك سوعىستىڭ باستالۋى» تاريحي-دوكۋمەنتالدىق كورمەسىن تاماشالاي الادى. ەكسپوزيتسيا رف قازاقستانداعى ەلشىلىگى مەن نۇر-سۇلتانداعى رەسەي عىلىم جانە مادەنيەت ورتالىعىمەن ۇسىنىلدى. كورمەگە كەلۋشىلەر ەكىنشى دۇنيەجۇزىلىك سوعىستىڭ باستالۋى تۋرالى سىر شەرتەتىن وقيعالار, كسرو-نىڭ قاتىسۋىمەن انتيگيتلەرلىك كواليتسيانىڭ ءساتسىز تۇستارى تۋرالى باياندايتىن قۇجاتتار مەن سۋرەتتەردى كورە الادى. ەكسپوزيتسيا 1938 جىلدىڭ 29 قىركۇيەگىنەن 1939 جىلدىڭ 1 قىركۇيەگىنە دەيىنگى ارالىقتاعى ميۋنحەن كەلىسىمى كەزەڭىن قامتيدى. كورمە ساعات 11.00-دەن 20.00-گە دەيىن 30 قىركۇيەككە دەيىن ىستەيدى. كىرۋ تەگىن.

7 قىركۇيەكتە «استانا وپەرانىڭ» كامەرالىق زالىندا قازاقستاندا تۋىپ-وسكەن امەريكالىق ديريجەر جانە پيانيست, قر ەڭبەك سىڭىرگەن قايراتكەرى تەمىرجان ەرجانوۆتىڭ العاشقى فورتەپيانولىق جەكە كونتسەرتى وتەدى. باعدارلامادا موتسارتتىڭ «فانتازيا», شۋماننىڭ «كارناۆال», ە. گريگانىڭ «يز ۆرەمەن حولبەرگا», شوپەننىڭ «باللادا № 4» شىعارمالارى ورىندالادى. كونتسەرتتىڭ باستالۋى 18.00-دە, بيلەت باعاسى - 500 تەڭگە.

كەلەسى كۇنى «استانا وپەرا» تەاترىنىڭ جەتەكشى ءسوليسى, قازاقستاننىڭ ەڭبەك سىڭىرگەن ءارتىسى جاننات باقتاي شاقىرادى. كورەرمەندەر دج.روسسيني, ج.وففەنباح, ج.ماسسنە, ي.شتراۋس, ف.لەگار, ە.كۋرتيس, ك.دجەنكينس, ا.ءادبىنۇروۆ جانە ت.ب. كومپوزيتورلاردىڭ شىعارمالارىن, حالىق اندەرى مەن كلاسسيكالىق وپەرا شەدەۆرلەرىن, اريالار, دۋەتتەر مەن تريولاردى تىڭداي الادى. كەش بارىسىندا ساحناعا «جاڭا وپەرا» ماسكەۋ تەاترىنىڭ ءسوليسى ياروسلاۆ ابايموۆ, قازاقستاننىڭ ەڭبەك سىڭىرگەن قايراتكەرلەرى مەدەت چوتاباەۆ پەن سۇندەت بايعوجين جانە ازامات جالتىركوزوۆ ونەر كورسەتەدى. كونتسەرت 8 قىركۇيەكتە ساعات 18.00-دە «استانا وپەرا» تەاترىندا وتەدى. بيلەت باعاسى - 500 تەڭگەدەن باستالادى.

وسى كۇنى «جاستار» سارايىنىڭ جازعى ساحناسىندا داستۇرگە اينالعان «اشىق ەسىك كۇنى» وتەدى. كونتسەرتتىك-ساۋىقتىق باعدارلامادا «روۆەسنيك» ەسترادالىق بي ءانسامبلى, «ۆوسكرەسەنە» سپورتتىق بي كلۋبى, «AstCityBallet» زامانۋي بالەت مەكتەبى, «رادۋگا» ۇجىمى, «ۆرەميا» تەاترى, «م-ارت» تەاتر ستۋدياسى, «Jas-Art» ەسترادالىق ۆوكال تەاترى, «Sound Gold» زامانۋي ۆوكال ستۋدياسى جانە ت.ب. شىعارماشىلىق ۇجىمدار ونەر كورسەتەدى دەپ جوسپارلانعان. شارا كەزىندە بالالاردى «جاستار» سارايىنىڭ كەز كەلگەن سەكتسياسىنا تەگىن جازۋعا بولادى. اشىق ەسىك كۇنى 8 قىركۇيەكتە ساعات 13.00-دە باستالادى.

ەلوردالىقتار كۇتىپ جۇرگەن ەلەۋلى وقيعانىڭ ءبىرى «Astana Marathon 2019» حالىقارالىق مارافونى بولادى دەسەك قاتەلەسپەيمىز. ۇيىمداستىرۋشىلار ەكى قاشىقتىق – 42,2 كم (قاتىسۋ 18 جاستاپ باستاپ) جانە 10 كم (16 جاستان باستاپ) دايىنداپ قويدى.

جۇگىرۋ تاڭعى 07.00-دە باستالىپ, 13.00-دە اياقتالادى. جارىس مارەسى ەكسپو كورمە كەشەنىنە قاراما-قارسى رىسقۇلوۆ پەن تۇركىستان كوشەلەرىنىڭ قيىلىسىنداعى P-5 تۇراعىندا ورنالاسقان. ونىڭ باعدارى بەيبىتشىلىك جانە كەلىسىم سارايى, ازىرەت سۇلتان مەشىتى, بايتەرەك, نازارباەۆ ۋنيۆەرسيتەتى, استانا ارەنا سياقتى قالانىڭ نەگىزگى ايشىقتى جەرلەرى كورىنەتىندەي ەتىپ ويلاستىرىلعان. ءار 5-ءشى شاقىرىمدىق بەلگىدە ۇيىمداستىرۋشىلار سۋ مەن بانان بەرىپ, 42,2 كم جۇگىرەتىن جەلاياقتارعا يزوتونيكالىق سۋسىندار ۇسىناتىن بولادى.

ايتا كەتەيىك, «Astana Marathon 2019» قاتىسۋ ءۇشىن ەشقانداي مەديتسينالىق انىقتاما نەمەسە سەرتيفيكاتتىڭ قاجەتى جوق.