بۇگىن ۇكىمەت ۇيىندەگى ءباسپاسوز كونفەرەنتسياسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى جەڭىس قاسىمبەك قازاقستاننىڭ ينۆەستيتسيالىق ساياساتىن ىسكە اسىرۋ بارىسى تۋرالى ايتتى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
ۆيتسە-پرەمەر مەملەكەت باسشىسىنىڭ جولداۋىندا نەگىزگى باسىمدىقتاردىڭ قاتارىندا شيكىزاتتىق ەمەس سەكتورعا شەتەلدىك ينۆەستيتسيالاردى تارتۋ مىندەتى قويىلعانىن اتاپ ءوتتى.
«قازاقستاننىڭ تاۋەلسىزدىگى كەزەڭىندە الەمنىڭ 120-دان استام ەلىنەن $330 ملرد شەتەلدىك ينۆەستيتسيا تارتىلدى. ينۆەستيتسيالاردىڭ نەگىزگى بولىگى – 50%-دان استامى – ەۋروپالىق وداق ەلدەرىنە تيەسىلى, ونىڭ ىشىندە: شۆەيتساريا – 25,8 ملرد, فرانتسيا – 16,1 ملرد, يتاليا – 8,7 ملرد, نيدەرلاندى – 90,4 ملرد, بەلگيا – 7,6 ملرد, گەرمانيا – 5,2 ملرد. امەريكا قۇراما شتاتتارىنا تىكەلەي شەتەلدىك ينۆەستيتسيالاردىڭ 15% نەمەسە 48,4 ملرد كەلەدى. شامامەن 5%– ۇلىبريتانيا مەن قحر ينۆەستيتسيالارىنان تۇرادى», — دەدى جەڭىس قاسىمبەك.
1 تامىزداعى جاعداي بويىنشا قازاقستاندا شەتەلدىك قاتىسۋمەن 19 مىڭ زاڭدى تۇلعا جانە بولىمشەلەر جۇمىس ىستەيدى, ولاردىڭ ىشىندە كاسىپورىنداردىڭ 35,3%-ى رەسەيلىك, 9,5% – تۇرىك, 5,7% – وزبەك, 5,6% – قىتاي, 3,1% – نەمىس كاپيتالىنىڭ قاتىسۋىمەن.
2010 جىلدان بەرى شەتەلدىك ينۆەستيتسيالار بويىنشا قازاقستاندىق وكىلەتتى ورگاندار 650-گە جۋىق جوبالاردى قاراستىردى. ونىڭ ىشىندە ەۋروپالىق وداق ەلدەرىنىڭ ينۆەستورلارى ۇسىنعان جوبالار سانى – 185, رەسەي فەدەراتسياسى – 111, تۇركيا – 80 جانە قحر – 55 جوبا جانە ت.ب. ۇسىنىلعان جوبالاردان باسىمدىق زاماناۋي تەحنولوگيالاردىڭ ترانسفەرتىن قامتاماسىز ەتەتىن, قازاقستاندىق قامتۋى جوعارى, قر ازاماتتارى ءۇشىن بارىنشا كوپ جۇمىس ورىندارىن قۇرۋدى قامتاماسىز ەتەتىن جوعارى تەحنولوگيالى جوبالارعا بەرىلەدى. وسى كەزەڭدە $16,2 ملرد سوماسىنا 235 جوبا ىسكە اسىرىلدى (قالعاندارى قاراستىرىلۋدا), ونىڭ ىشىندە 133 جوبانى ەۋروپالىق وداق پەن رف ەلدەرى جۇزەگە اسىرعان.
«الەمدەگى تۇراقسىزدىق جانە سانكتسيالىق قارسىلىق جاعدايلارىندا ينۆەستورلار ينۆەستيتسيالىق احۋالى تۇراقتى ەلدەردى تاڭدايدى. ءاربىر ەل ءوزىنىڭ ينۆەستيتسيالىق رەيتينگىن كوتەرۋگە تىرىسادى, سەبەبى, ەلگە كاپيتال عانا ەمەس, جاڭا زاماناۋي تەحنولوگيالار دا كەلەدى», — دەدى قر پرەمەر-ءمينيسترىنىڭ ورىنباسارى.
كوپتەگەن ينۆەستورلاردىڭ ءبىرى قحر 15 جوبانى قارجىلانجىرىپ, ىسكە اسىردى, بۇل 2010 جىلدان بەرى جۇزەگە اسىرىلىپ كەلە جاتقان جوبالاردىڭ جالپى سانىنان 6%-عا جۋىعىن قۇرايدى.
بۇگىنگى كۇنى يندۋستريالاندىرۋ جانە ينۆەستيتسيالار سالاسىنداعى بىرلەسكەن قازاقستاندىق-قىتايلىق جوبالار ءتىزىمى جالپى سوماسى $ 27,6 ملرد قۇرايتىن 55 جوبانى قامتيدى.
2015 جىلدان قازىرگە دەيىن $3,9 ملرد سوماسىنا 15 جوبا ىسكە قوسىلدى. جوبالار ەكونوميكانىڭ جوعارى تەحنولوگيالى سالالارىندا ىسكە اسىرىلادى: ماشينا جاساۋ, حيميا ونەركاسىبى, ەنەرگەتيكا, بالامالى ەنەرگەتيكا جانە اوك. 3828 قازاقستاندىق جۇمىس ورنى قۇرىلدى.
«وسى جوبالاردىڭ بارلىعى ەلىمىزدىڭ ءارتۇرلى ايماقتارىندا ەكسپورتقا باعدارلانعان زاماناۋي تەحنولوگيالاردى قولدانادى, قازاقستاندىقتارعا جۇمىس ورىندارىن اشادى. مۇندا جۇمىس ىستەپ تۇرعان زاۋىتتاردى كوشىرۋ تۋرالى ەمەس, تەحنولوگيالار ترانسفەرتى تۋرالى ايتىلىپ تۇر. يندۋستريالىق-ينۆەستيتسيالىق ىنتىماقتاستىقتىڭ قازاقستان-قىتاي باعدارلاماسىن ىسكە اسىرۋ ناتيجەسىندە 20 مىڭعا جۋىق جاڭا جۇمىس ورىندارىن قۇرۋمەن بىرگە, شەتەلدىك نارىقتارعا ەكسپورتتاۋعا باعدارلانعان, قوسىلعان قۇنى جوعارى وتاندىق ساپالى ءونىمدى شىعارۋعا قابىلەتتى بىرقاتار جوعارى تەحنولوگيالىق كاسىپورىندار قۇرىلادى دەپ كۇتىلۋدە», — دەپ تۇيىندەدى جەڭىس قاسىمبەك.