تمد ەلدەرى اراسىندا ازىرگە بالاماسى جوق «رينگ كورولى» سپورتتىق ءتۋرنيرى پەتروپاۆلدا وسىمەن ءۇشىنشى رەت وتكىزىلىپ, حالىقارالىق سيپات الۋىمەن ەرەكشەلەندى.
وبلىستىق اكىمدىكتىڭ قولداۋىنا سۇيەنگەن دەنە شىنىقتىرۋ جانە سپورت باسقارماسى ەلىمىزدىڭ وڭىرلەرىنەن جانە رەسەيدەن جينالعان بوكس ارداگەرلەرى اراسىندا ءتورت كۇندىك ىرىكتەۋ جارىسىن ۇيىمداستىرىپ, كىل مىقتىلار اقتىق سايىسقا جولداما الدى. كۇرزى جۇدىرىق يەلەرى اراسىندا 3 حالىقارالىق دارەجەدەگى سپورت شەبەرىنىڭ, 13 سپورت شەبەرىنىڭ, ازيا ويىندارىنىڭ چەمپيوندارى مەن جۇلدەگەرلەرىنىڭ بولۋى بوكس دەسە, ىشكەن اسىن جەرگە قوياتىن جانكۇيەرلەردىڭ زور قىزىعۋشىلىعىن تۋدىردى.
تارتىستى باسەكەنى ايماق باسشىسى قۇمار اقساقالوۆ, بوكستان ەۋروپا جەڭىمپازى, الەم كۋبوگىنىڭ كۇمىس جۇلدەگەرى سەرىك نۇرقازوۆ تاماشالادى.
شارشى الاڭعا ءبىرىنشى بولىپ نۇر-سۇلتان قالاسىنىڭ 36 جاستاعى وكىلى, جازعى وليمپياداعا قاتىسۋشى ميرجان راحىمجانوۆ پەن 63 جاستاعى اتىراۋلىق اديك بەرمەشوۆ كوتەرىلدى. 64 كيلو سالماق بويىنشا كۇش سىناسقان ەكەۋى دە جاقسى دايىندىقپەن كەلگەندەرىن بايقاتتى. ءبىرىنشى راۋندتان كەيىن م.راحىمجانوۆ وزىنەن 27 جاس ۇلكەن اعاسىنا ىنىلىك ىزەتپەن جول بەردى. ونىڭ بۇل قادامىنا جينالعاندار ۇلكەن قوشەمەت كورسەتتى.
پەتروپاۆلدىق مۇرات قۇرمانعوجينوۆ (69 كگ) بىلتىرعى ءتۋرنيردىڭ جەڭىمپازى رۋستام جاقىپوۆتى بىردەن اۋىر سوققىنىڭ استىنا الىپ, جەرگە سۇلاتىپ سالدى. قالعان سالماقتار بويىنشا استانالىق الەكساندر لۋچشەۆ (75 كگ), قاراعاندىلىقتار قۋانىش يسەمباەۆ (81 كگ), تيمۋر بايسەركەەۆ (91 كگ-عا دەيىن) جەڭىس تۇعىرىنىڭ ەڭ بيىك ساتىسىنا كوتەرىلدى.
ال 91 كيلودان جوعارى اسا اۋىر سالماقتا قوس رەسەيلىك سەرگەي تانناگاشەۆ پەن سايران سمايىلوۆ قولعاپ ءتۇيىستىردى. اسكەريلەر اراسىندا الەم چەمپيونى س.سمايىلوۆ جەرلەسىنىڭ بويشاڭدىعىنا, قولدارىنىڭ ۇزىندىعىنا قاراماستان, ءابجىل قيمىل تانىتىپ, ايلاسىن اسىردى. ءسويتىپ, وتكەن جىلى الاڭ يەسى اندرەي بەيسەنباەۆتان ۇتىلىپ قالعان ەسەسىن قايتاردى. وعان «رينگ كورولى-2019» بەلدىگىن قۇمار ىرگەباي ۇلى سالتاناتتى تۇردە تارتۋ ەتتى.
جەڭىمپازدار مەن جۇلدەگەرلەرگە اقشالاي سىيلىقتار دا تاپسىرىلدى.
سولتۇستىك قازاقستان وبلىسى