قازاقستاندىقتاردىڭ جەكە مالىمەتتەرىنىڭ تارالۋىنا قاتىستى قر ىشكى ىستەر مينيسترلىگى تەرگەۋ جۇمىستارىن جۇرگىزۋدە, دەپ حابارلايدى قازاقپارات مينيسترلىكتىڭ ءباسپاسوز قىزمەتىنە سىلتەمە جاساپ.
«ىشكى ىستەر مينيسترلىگىنە شەتەلدىك سەرۆەرلەردە قازاقستاندىقتاردىڭ جەكە دەرەكتەرىنىڭ تارالۋ فاكتىسى بويىنشا شارالار قولدانۋ تۋرالى «تساركا» (كيبەر شابۋىلداردى تەرگەۋ جانە تالداۋ ورتالىعى) زاڭدى تۇلعالار بىرلەستىگىنەن شاعىم ءتۇستى.
وسى اقپاراتتى تەكسەرۋ ءۇشىن ىشكى ىستەر ورگاندارى قر قك 211-بابى 1-بولىگى (قولجەتىمدىلىگى شەكتەلگەن ەلەكتروندىق اقپاراتتىق رەسۋرستاردى قۇقىققا سىيىمسىز تاراتۋ) بويىنشا سوتقا دەيىنگى تەرگەۋ جۇمىستارىن باستادى», دەلىنگەن حابارلامادا.
مينيسترلىكتىڭ مالىمەتىنشە, قازىرگى كەزدە اتالعان دەرەكقوردىڭ يەلەرى مەن دەرەكتەردى تاراتقانداردى انىقتاۋ بويىنشا جەدەل شارالار جانە تەرگەپ-تەكسەرۋ ءجۇرىپ جاتىر.
ەسكە سالا كەتسەك, كەشە «تساركا» زتب Facebook-تەگى پاراقشاسىندا 11 ملن قازاقستاندىقتىڭ جەكە مالىمەتتەرىنىڭ تارالۋىنا قاتىستى قر ءىىم-ءنىڭ رەسمي حاتىن جاريالادى. ايتا كەتەرلىگى, قر ورتالىق سايلاۋ كوميسسياسى ءوز سەرۆەرلەرىنەن دەرەكتەردىڭ تارالىپ كەتۋىن جوققا شىعارعان بولاتىن.