ءحVىىى عاسىردىڭ ەكىنشى جارتىسى 1755 جىلدارى تسين يمپەرياسى جوڭعار حاندىعىن جەر بەتىنەن جويىپ جىبەردى دە, قازاق ۇلىسى قىتايداعى مانجۋلار اۋلەتى باسقارعان پاتشالىقپەن بەتپە-بەت ءتۇيىستى.
وسى تۇستا قازاق حان-سۇلتاندارى مەن تسين يمپەراتورى اراسىندا حات-حابار الماسۋ ءىسى جولعا قويىلدى. بۇل ءۇردىس 1754 جىلدان باستاپ, 1780 جىلدارعا دەيىن ۇزدىك-سوزدىق جالعاسقان سىڭايلى.
جۋىقتا بەيجىڭدە قىتاي تىلىندە 2006 جىلى جارىق كورگەن «تسين پاتشالىعى تۇسىنداعى قىتاي-قازاق قاتىناستارى جايلى ارحيۆتىك قۇجاتتار» اتتى ەكىتومدىق ەڭبەكتى كورىپ قالدىق. وسى كىتاپتىڭ ءبىرىنشى تومىندا 1754-1762 جىلداردى قامتيتىن 269 ءتۇرلى ءىس-قۇجات, ەكىنشى تومىندا 1762-1764 جىلدارعا تيەسىلى 239 ءتۇرلى ءىس-قۇجات جيناقتالعان كورىنەدى.
وسى ەڭبەكتىڭ 199-بەتىندە: «قازاقتىڭ ابىلپەيىز ءباھادۇر سۇلتانىنىڭ مانجۋ حانىنا جولداعان حاتى» دەگەن قۇجات تۇر. حات كونە ويرات-موڭعول تىلىندە جازىلعان. حات يەسى «ابىلپەيىز سۇلتان كىم» دەگەنگە توقتالساق, بۇل كىسى ورتا ءجۇزدى باسقارعان ابىلمامبەت حاننىڭ بالاسى. قازاق تاريحىندا بۇل تۇلعاعا قاتىستى «قىتايمەن ديپلوماتيالىق بايلانىس ورناتىپ, قازاق-قىتاي قاتىناسىنىڭ دامۋىنا زور ۇلەس قوسقان ءھام جوڭعارعا قارسى سوعىستا ابىلاي حان ساياساتىن قولداۋشى» دەگەن باعا بەرىلىپتى. 1783 جىلى دۇنيەدەن وتكەن ەكەن.
جوعارىداعى حاتتى قازاق سۇلتانى تسين پاتشاسىنىڭ مۇراگەرى نۋ امبىعا (لاۋازىمدى اتاق) 1758 جىلى جولداعان كورىنەدى. حاتتا «ابۋلپەيىستىڭ حاتى. نۋ امبى جانە ساراي نوياندارىنا سالامات بولسىن. مالىمدەيمىن: بۋرۋدتىڭ جانە ءۇش سەرىگىن كەرى قايتارعاندا, ولاردىڭ ات-كولىگى مەن ازىعىن قاداعالاۋدى وتىنەمىن» دەلىنىپ, حاتتىڭ سوڭىنداعى جۇزىك-تابان موردە «ابۋ-ل-فايز-باحادۋر-سۋلتان» دەگەن بەلگى بادىزدەلىپتى.
اتالعان حاتپەن تانىسقان كونە ۇيعىر-موڭعول جازۋىنىڭ مامانى, استانالىق جاس ادەبيەتشى-عالىم اسىلبەك بايتان ۇلى, بۇل قۇجات سول كەزدەگى شەكارالىق كەرۋەنشىلەرگە قاتىستى جولدانعان حات, مۇنداعى «بۋرۋد» دەپ وتىرعانى – قىرعىز-حاكاستار, ياعني بۇلاردى رەسەي وكىمەتى ويراتتاردان بوساعان جەرگە قونىستاندىرۋ ءۇشىن حاكاسيادان ايداپ اكەلگەن جۇرت ەدى دەيدى.