قىزمەتتىك مىندەتتەرىن اتقارۋ كەزىندە قازا تاپقان پوليتسيا قىزمەتكەرلەرىنە ارنالعان ەسكەرتكىشتىڭ سالتاناتتى اشىلۋى بولدى. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى حابارلادى.
ەلىمىزدە تاۋەلسىزدىك العان ساتتەن باستاپ قىزمەتتىك بورىشىن ورىنداۋ كەزىندە 2264 پوليتسەي اجال قۇشقان, ونىڭ ىشىندە 785 پوليتسەي قىلمىسكەرلەردىڭ قولىنان قازا تاپقان. قوستاناي وبلىسى بويىنشا 42 ءتارتىپ ساقشىسى قىزمەتتە ءجۇرىپ كوز جۇمعان, ونىڭ 11-ءى قىلمىسكەردى قۇرىقتاۋ كەزىندە ەرلىكپەن كوز جۇمدى. بۇل ەسكەرتكىش تاقتا سول مارقۇمداردىڭ قۇرمەتى ءۇشىن ورناتىلىپ وتىر.
ەسكەرتكىشتىڭ اشىلۋ راسىمىندە جينالعان جۇرت سەرتىنە بەرىك بولعان باتىرلاردى ءبىر مينۋت ۇنسىزدىكپەن ەسكە الدى. «ەر ەسىمى – ەل ەسىندە» دەگەن وسى, الداعى ۋاقىتتا مۇنداي ەسكەرتكىش تاقتا بىرقاتار اۋداندا پايدا بولماق.
ء«بىز ءوز قىزمەتىنە ادال بولعان, ەل تىنىشتىعى ءۇشىن ءومىرىن قيعان ارىپتەستەرىمىزدىڭ ارۋاعىنىڭ الدىندا باس يەمىز. ولاردىڭ ەرلىگى – بۇگىنگى پوليتسەيلەرگە ۇلگى. ىشكى ىستەر ورگانىنا كەلگەن ءاربىر جاس وسى تاقتا الدىندا وتان ءۇشىن انت بەرەدى» دەدى وبلىستىق پوليتسيا دەپارتامەنتى باستىعىنىڭ ورىنباسارى, پوليتسيا پولكوۆنيگى ارداق قابىكەن ۇلى.
ءىس-شارا سوڭىندا اۋداندىق ءتارتىپ ساقشىلارى تاس بەلگىگە قۇرمەت كورسەتىپ, جينالعان جۇرت گۇل شوقتارىن قويدى.
قوستاناي وبلىسى,
فەدوروۆ اۋدانى