كەشە شامامەن ساعات 11.00-دە «وحوتزووپروم» ءوب» رمقك ورتالىق وڭىرلىك فيليالىنىڭ ينسپەكتورلارى اقمولا وبلىسى, جارقايىڭ اۋدانىنىڭ اۋماعىندا تابيعاتتى قورعاۋ زاڭناماسىن بۇزعانداردى انىقتاپ, جولىن كەسۋ بويىنشا جۇرگىزىلگەن ءىس-شارا بارىسىندا كيىكتەردى كوزدەگەن براكونەرلەرگە كەز بولعان. ەكى ينسپەكتور ارام پيعىلدى ازعىنداردىڭ ىزىنە تۇسكەن. ولاردىڭ تىزگىندەگەن كولىگى – اق ءتۇستى «نيۆا». كولىكتىڭ مەملەكەتتىك ءنومىرى ناقتىلانباعان, بىراق قوستاناي وبلىسىنا تيەسىلى ەكەنى بەلگىلى بولعان. وسى كولىكتىڭ قىر سوڭىنا تۇسكەن ينسپەكتورلارعا وق اتىلىپ, ەكەۋى دە اۋىر جاراقات الادى. ولاردىڭ ءبىرىنىڭ جاعدايى تىم قيىنداپ, ەس-ءتۇسسىز قالعان. وقيعا ورنىنا سانيتارلىق اۆياتسيا شاقىرىلىپ, جارالانعاندار دەرجاۆين قالاسىنىڭ اۋداندىق اۋرۋحاناسىنا جەتكىزىلگەن. بۇل تۋرالى العاشقى حاباردى اۋىل شارۋاشىلىعى مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىنىڭ ءباسپاسوز قىزمەتى تاراتتى.
كەيىننەن قاندىقول براكونەرلەردىڭ وعى تيگەن ينسپەكتورلاردىڭ بىرەۋى اۋرۋحاناعا بارا جاتقان جولدا جان تاپسىرعانى ءمالىم بولدى. ول – 1976 جىلى 24 قاڭتاردا دۇنيەگە كەلگەن نۇرتازينوۆ قانىش سەرىك ۇلى. قاراعاندى وبلىسى, ۇلىتاۋ اۋدانى, قوسكول اۋدانىنىڭ تۇرعىنى قانىش «وحوتزووپروم» مەكەمەسىنە 2016 جىلدىڭ 5 قاڭتارىندا جۇمىسقا تۇرعان. ونىڭ ارتىندا ايەلى, ءۇش قىزى جانە 2011 جىلى تۋعان ۇلى قالدى. مارقۇمنىڭ دەنەسىن تۋعان اۋىلىنا جەتكىزۋ جايى قاراستىرىلىپ جاتىر. بۇل تۋرالى ەكولوگيا, گەولوگيا جانە تابيعي رەسۋرستار مينيسترلىگى حابارلادى.
ال جارالانعان ەكىنشى ينسپەكتوردىڭ ەسىمى – وسپانوۆ سامات كوشبەرگەن ۇلى. ول 1975 جىلى اقمولا وبلىسىندا تۋعان. ساماتقا دەرجاۆين اۋداندىق اۋرۋحاناسىندا وتا جاسالدى.
مەملەكەت باسشىسى قاسىم-جومارت توقاەۆ براكونەرلەردىڭ قولىنان قازا تاپقان ازاماتتىڭ وتباسىنا كوڭىل ايتتى. بۇل تۋرالى قازاقستان پرەزيدەنتى Twitter-دە «براكونەرلەرمەن ارپالىستا ەرلىكپەن قازا بولعان قورىقشى قانىش نۇرتازينوۆتىڭ جاقىندارىنا شىنايى كوڭىل ايتامىن. قاسكويلەر ۇستالىپ, جاۋاپقا تارتىلادى. كيىكتەردى اتقانى ءۇشىن جازانى كۇشەيتۋ قاجەت. قازا تاپقان ق.نۇرتازينوۆ ماراپاتتالاتىن بولادى. اڭشى س.وسپانوۆتىڭ ساۋىعىپ كەتۋىن تىلەيمىن», دەپ جازدى.
ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ تا Twitter-دەگى پاراقشاسىندا براكونەرلەردى ۇستاۋ كەزىندە قازا تاپقان قانىش نۇرتازينوۆتىڭ وتباسىنا قايعىرا كوڭىل ايتىپ, بارلىق قاجەتتى كومەكتىڭ كورسەتىلەتىنىن جازدى.
ال كۇدىكتىلەردى ىزدەستىرۋ جۇمىستارىمەن اقمولا وبلىسى, جارقايىڭ اۋدانىنىڭ پوليتسيا ءبولىمى اينالىسىپ جاتىر. «اقمولا وبلىسىندا «وحوتزووپروم» ءوب» رمقك ينسپەكتورلارىنا شابۋىل جاساۋ فاكتىسى بويىنشا قىلمىستىق كودەكسىنىڭ 99-بابى 1-ءبولىمى (كىسى ءولتىرۋ) بويىنشا قىلمىستىق ءىس قوزعالۋدا. قازىرگى ۋاقىتتا ارنايى قۇرىلعان جەدەل-تەرگەۋ توپتارى كۇدىكتىلەردى ۇستاۋ بويىنشا كەشەندى ءىس-شارالار جۇرگىزىپ جاتىر. پوليتسيا قىزمەتكەرلەرى ۇستاۋ جوسپارىن ازىرلەپ, بۇعان جارقايىڭ, ەسىل جانە جاقسى اۋداندىق پوليتسيا بولىمدەرىنىڭ جەكە قۇرامى جۇمىلدىرىلدى. كۇدىكتىلەردىڭ اۆتوكولىگىن باعدارلاۋ بارلىق پاترۋلدىك قىزمەت ناريادتارىنا تاپسىرىلىپ, جارقايىڭ جانە كورشىلەس اۋدانداردىڭ اۋماعىنا 10 بەكەت بلوگى قويىلدى. جەدەل ىزدەستىرۋ شارالارى جالعاسۋدا», دەپ حابارلادى اقمولا وبلىسى پوليتسيا دەپارتامەنتىنىڭ ءباسپاسوز قىزمەتى.
ءدال وسىنداي وقيعا جىل باسىندا تىركەلىپ, قاراعاندى وبلىسى نۇرا اۋدانىندا كيىك اتقان براكونەرلەر ەكى ينسپەكتوردى جاراقاتتاعان ەدى. اۋىر جاراقاتتان ەس جيماستان ەرلان نۇرعاليەۆ 15 قاڭتاردا نۇر-سۇلتان قالاسىندا №1 اۋرۋحانادا كوز جۇمعان. ول دا «وحوتزووپروم» ينسپەكتورى ەدى. كوپ ۇزاماي ارنايى وپەراتسيا بارىسىندا ءىىم كريمينالدىق پوليتسيا دەپارتامەنتىنىڭ جەدەل قىزمەتكەرلەرى قىزىلورداداعى جەكە ءۇيلەردىڭ بىرىندە وسى وقيعاعا قاتىستى ءۇش كۇدىكتىنى ۇستادى. قازىر قاراعاندى وبلىسىندا تەرگەۋ جۇمىستارى جۇرگىزىلىپ جاتىر. قازاقستان پرەزيدەنتىنىڭ 31 قاڭتارداعى جارلىعىمەن قىزمەتتىك بورىشىن اتقارۋ ۇستىندە كورسەتكەن ەرجۇرەكتىگى مەن جانقيارلىعى ءۇشىن اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ «وحوتزووپروم» ءوب» رمقك ورتالىق ءوڭىرلىك فيليالىنىڭ ينسپەكتورلارى ەرلان نۇرعاليەۆ (مارقۇم) پەن پەتر نيتسىك ءىىى دارەجەلى «بارىس» وردەنىمەن ناگرادتالدى.