«استانا». ەۋرودودالاردىڭ سوڭعى ءتورت ماۋسىمىندا توپتىق كەزەڭدە ونەر كورسەتىپ جۇرگەن ەلوردانىڭ «استانا» كومانداسى بيىل چەمپيوندار ليگاسىنىڭ العاشقى ىرىكتەۋ كەزەڭىنەن وتە الماي, ەۋروپا ليگاسىنا ءتۇسىپ قالدى. تاريحقا كوز جۇگىرتسەك, «استانا» ەۋروپا ليگاسىنىڭ ىرىكتەۋى كەزەڭىندە تەك 2014 جانە 2015 جىلعى ماۋسىمدا عانا ويناعان-دى. ەندى اراعا ءتورت جىل سالىپ, ەۋروپا ليگاسىنا قايتا ورالدى. اتالعان ءتۋرنيردىڭ ەكىنشى ىرىكتەۋ كەزەڭىندە ەل چەمپيوندارى اندوررانىڭ «سانتا-كولوما» كلۋبىمەن كەزدەسەدى. ەۋروپا ليگاسىنىڭ ەرەجەسى بويىنشا, العاشقى ماتچ 25 شىلدەدە, ياعني الداعى بەيسەنبى كۇنى ءوتۋى كەرەك بولعان. الايدا, «استانا» ەل چەمپيوناتىنىڭ اياسىندا 26 شىلدەدە كەزەكتى ويىنىن وتكىزەتىندىكتەن, ءوزارا كەلىسىم بويىنشا ءبىرىنشى ماتچ 23 شىلدەدە وينالاتىن بولدى. قارىمتا ماتچ بەلگىلەنگەن ۋاقىت بويىنشا 1 تامىزدا «استانا ارەنادا» وتەدى.
«قايرات». الماتىنىڭ كومانداسى ەۋروپا ليگاسىنداعى العاشقى ىرىكتەۋ كەزەڭىن ءساتتى باستادى. بوسنيا جانە گەرتسەگوۆينانىڭ «شيروكي-بريەگ» كلۋبىمەن كەزدەسكەن «قايرات» ءوز الاڭىندا دا, سىرت الاڭدا دا 2:1 ەسەبىمەن جەڭىسكە جەتتى. ەكىنشى كەزەڭدە ءيزرايلدىڭ «حاپوەل» (بەەر-شەۆا) ۇجىمىمەن كەلەسى باسەكەنىڭ جولداماسىن ساراپقا سالادى. «حاپوەل» ءتۋرنيردىڭ ءبىرىنشى كەزەڭىندە البانيانىڭ «لياچي» كلۋبىمەن كەزدەسىپ, ەكى ويىن قورىتىندىسى بويىنشا 2:1 ەسەبىمەن جەڭىپ, ەكىنشى راۋندقا وتكەن بولاتىن.
ەكىنشى ىرىكتەۋدە «قايراتقا» وڭاي قارسىلاس تاپ كەلدى دەپ ايتا المايمىز. «حاپوەل» 2014/2015 جىلعى ماۋسىمنان بەرى ەۋروكۋبوك ويىندارىنا قاتىسىپ كەلسە, سونىڭ ىشىندە 2016/2017 جانە 2017/2018 جىلعى ماۋسىمدا ەۋروپا ليگاسىنىڭ توپتىق كەزەڭىندە ونەر كورسەتكەن. ءتىپتى توپتىق كەزەڭنىڭ العاشقى ماۋسىمىندا ەكىنشى ورىن يەلەنىپ, پلەي-وفف كەزەڭىنە دەيىن جەتكەن. بىلتىر ەۋروپا ليگاسىنىڭ ءۇشىنشى اينالىمىندا كيپردىڭ اپوەل كومانداسىنان جەڭىلىپ, جارىستان ەرتە شىعىپ كەتتى. «قايرات» تا بىلتىرعى ماۋسىمدى ءۇشىنشى كەزەڭنەن اياقتاۋعا ءماجبۇر بولعان-دى. چەحيانىڭ «سيگما» كلۋبىمەن كەزدەسىپ, ەكى ويىن قورىتىندىسى بويىنشا 1:4 ەسەبىمەن جەڭىلدى. بيىل ەكى ۇجىمنىڭ ماقساتى – ەۋروپا ليگاسىنىڭ توپتىق كەزەڭىنە شىعۋ. ەكى كوماندا اراسىنداعى العاشقى كەزدەسۋ 24 شىلدەدە يزرايلدە, قارىمتا ماتچ ءبىر اپتادان سوڭ قازاقستاندا وتەدى.
«ورداباسى». شىمكەتتىڭ كلۋبى اراعا ءبىر جىل سالىپ ەۋروپا ليگاسىنا قايتا ورالدى. بىلتىرعى ماۋسىمعا قارجىلىق جاعدايىنا بايلانىستى قاتىسا الماي, ورنىنا پاۆلوداردىڭ «ەرتىس» كومانداسى ويناعان بولاتىن. «ورداباسى» ەۋروپا ليگاسىنىڭ العاشقى ىرىكتەۋ كەزەڭىنەن ەش قيىندىقسىز ءوتتى. گرۋزيانىڭ «تورپەدو» كلۋبىمەن كەزدەسكەن جەرلەستەرىمىز, ەكى ويىننىڭ قورىتىندىسى بويىنشا 3:0 ەسەبىمەن كەلەسى كەزەڭگە جولداما الدى.
شىمكەنتتىڭ كومانداسى ەكىنشى كەزەڭدە چەحيانىڭ «ملادا-بولەسلاۆ» كومانداسىمەن كەزدەسەدى. ەۋروپا رەيتينگىندە چەحيانىڭ جوعارى ورىندا تۇرۋىنا بايلانىستى بۇل ەلدىڭ كوماندالارى ىرىكتەۋدى ەكىنشى كەزەڭنەن باستايدى. «ملادا-بولەسلاۆ» ءوز ەلىندە تيتۋلدى كوماندا سانالمايدى جانە ەۋروكۋبوك باسەكەلەرىندە دە ناتيجەسى جاقسى ەمەس. جوعارىدا ايتقانىمىزداي, ىرىكتەۋ ساتىسىن ۇنەمى ەكىنشى كەزەڭنەن باستاپ, ءۇشىنشى كەزەڭنەن ءارى اسا الماي كەلەدى. قوس كوماندا اراسىنداعى العاشقى كەزدەسۋ 23 شىلدەدە چەحيادا, قارىمتا ماتچ 1 تامىزدا قازاقستاندا وتەدى.
«توبىل». قازاقستاندىق كوماندالار اراسىنداعى ەڭ ناشار ناتيجە كورسەتكەن جانە ءبىرىنشى اينالىمنان اسا الماعان قوستانايدىڭ «توبىل» كومانداسى بولدى. ليۋكسەمبۋرگتىڭ جارتىلاي كاسىپقوي كوماندالارىنىڭ ءبىرى «جەننەس» كلۋبىن جەڭە المادى. سىرت الاڭدا 0:0 ەسەبىمەن تەڭ ويناپ, «استانا ارەنادا» وتكەن قارىمتا ماتچتا دا 1:1 ەسەبىمەن تەڭ ءتۇستى. قوناقتار سىرت الاڭدا سوققان جالعىز گولىنىڭ ارقاسىندا كەلەسى كەزەڭگە جولداما الدى. كەزدەسۋدەن كەيىنگى ءباسپاسوز ءماسليحاتىندا «جەننەس» باس باپكەرى نيكولاس حەيسمان كلۋبتىڭ جىلدىق بيۋدجەتى 500 مىڭ ەۋرو ەكەنىن, ءتىپتى فۋتبولشىلارى كۇندىز قوسىمشا جۇمىس ىستەيتىنىن ايتتى. «ءبىزدىڭ بيۋدجەتىمىز «توبىلدان» التى ەسە كەم دەپ ويلايمىن. سەبەبى ءبىزدىڭ جىلدىق بيۋدجەتىمىز 500 مىڭ ەۋرو. ءبىزدىڭ كوماندا وسىدان 13 كۇن بۇرىن جينالىپ جاتتىعۋ جۇمىستارىن باستادى. ولاردىڭ كوبىسى كۇندىز ءوز جۇمىستارىندا جۇرەدى دە, كەشكە جاتتىعۋعا كەلەدى. سوندىقتان دا بىزدە «توبىلعا» قارسى دايىندالۋعا كوپ مۇمكىندىك بولمادى», دەيدى ول.
وسىلايشا, «توبىل» فۋتبولشىلارى وزدەرىنەن تومەن دەڭگەيدەگى كوماندانى جەڭە الماي, بۇكىل ەۋروپاعا جانە قازاقستاندىق جانكۇيەرلەرگە ماسقارا بولعان جايى بار.