اسىرەسە شىلىڭگىر شىلدەدە شىبىن جاندارىن شۇبەرەككە تۇيە ءجۇرىپ, بارلىق ۇلكەندى-كىشىلى ءىستىڭ باسىندا قۇراق ۇشا جۇگىرگەن جاستاردىڭ بەلسەندىلىگى مەن باۋىرمالدىعى, قايىرىمدىلىعى جان ءسۇيسىنتتى. بۇل – قازاقتىڭ تۇتاستىعىن تانىتتى, سىن ساعاتتاردا ۇيىسا قالاتىن ۇلتجاندىلىعىن بايقاتتى.
ماڭعىستاۋلىقتار ءۇشىن كۇننىڭ ىستىعى مەن جەر شالعايلىعى ەش كەدەرگى بولا العان جوق. ارىس جۇرتشىلىعىنا قولداۋ كورسەتۋ ماقساتىندا Nur Otan پارتياسىنىڭ وبلىستىق, اۋداندىق فيليالدارىندا, سونىمەن قاتار «جاستار» رەسۋرستىق ورتالىقتارىندا, قازاقستان حالقى اسسامبلەياسى جانىنداعى «قوعامدىق كەلىسىم» جانە «ءبىز ادامبىز – ءبىز بىرگەمىز» قايىرىمدىلىق قورى بازاسىندا ارنايى گۋمانيتارلىق كومەك جيناۋ پۋنكتتەرى اشىلىپ, اپات ورىن العاننان كەيىن اراعا ءبىر-ەكى كۇن سالىپ ماڭعىستاۋلىقتار ارىس تۇرعىندارىنا 40 ملن تەڭگە اۋدارىپ, ازىق-ت ۇلىك, جەكە گيگيەنا قۇرالدارى, ماتراس, ءدارى-دارمەك, كيىم-كەشەك جانە ءبىرىنشى كەزەكتە قاجەتتى زاتتاردان قۇرالعان 6 توننا گۋمانيتارلىق جۇكتى جولعا سالدى. ايماقتىڭ مەملەكەتتىك قىزمەتشىلەرى, دارىگەرلەرى مەن مۇعالىمدەرى, مۇنايشىلار مەن ءىرى كاسىپورىندارى جارىلىس سالدارىنان زارداپ شەككەن تۇرعىندارعا كومەك رەتىندە ءبىر كۇندىك جالاقىسىن اۋداردى. ءوڭىردەگى ءىرى جانە ورتا كاسىپكەرلىك سۋبەكتىلەرى بارىنشا قارجىلاي كومەك كورسەتۋگە كىرىستى.
قازىرگى تاڭدا ماڭعىستاۋ وبلىسى ارىستى قالپىنا كەلتىرۋ جۇمىستارىنا ءوز كۇش-كومەكتەرىن قوسۋدا. مۇنايلى ءوڭىر ارىستاعى سەگىز كوشەنى قالپىنا كەلتىرۋ جۇمىستارىن موينىنا الدى.
بۇل جاۋاپتى جۇمىسقا وبلىستا تالاي تۇرعىن ءۇي مەن نەبىر الەۋمەتتىك عيماراتتاردى تۇرعىزعان تانىمال «وڭداسىن ستروي», «اق جول قۇرىلىس», «اليانس لتد», «اكتاۋ بس ستروي», «اس قۇرىلىس», «ايكوم لتد», «شەبەر قۇرىلىس» جاۋاپكەرشىلىگى شەكتەۋلى سەرىكتەستىكتەرى سىندى 8 ءىرى قۇرىلىس كومپانياسى اتسالىسپاق. ءتيىستى ورىنداردىڭ ءمالىمەتىنشە, قاجەتتى تەحنيكامەن قامتاماسىز ەتىلىپ, جۇمىستارىنا ارىس قالاسىنىڭ جۇمىسسىز تۇرعىندارى تارتىلعان قۇرىلىس قارقىن الۋدا. ناقتىراق ايتقاندا, 5 كوشەنىڭ 12 ءۇيىن جوندەۋ جانە 1 تۇرعىن ءۇيدى قايتا سالۋ جۇمىستارى باستالدى. ازىرگە جۇمىلدىرىلعان جۇمىسشىلار سانى 50 ادامدى قۇراپ وتىر جانە ادامدار سانى كۇن سايىن قاجەتتى كولەمگە دەيىن كوبەيە بەرمەك. قالپىنا كەلتىرۋگە قاجەتتى ماتەريالدار, سونىڭ ىشىندە 12 000 شارشى مەتر شاتىر جابىندىسى, 140 تەكشە مەتر اعاش جانە باسقا دا ءبىرىنشى كەزەكتە شاتىرلاردى جوندەيتىن قۇرىلىس جابدىقتارى الىنعان. سونىمەن قاتار 5 كوشەدە ورنالاسقان ۇيلەردىڭ تەرەزەلەرىنىڭ ولشەمدەرى الىنىپ, دايىندالۋدا. ەندى از ۋاقىتتا العاشقى كوشەنىڭ تۇرعىندارى ۇيلەرىنە ورنالاسادى.
– ارىس قالاسىن قالپىنا كەلتىرۋ بويىنشا ەل پرەزيدەنتى قاسىم-جومارت توقاەۆ ۇكىمەتكە جانە وبلىس اكىمدەرىنە ارنايى تاپسىرما بەرگەن بولاتىن. ماڭعىستاۋ وبلىسى ءنومىرى 4-ءشى سەكتورعا جاۋاپتى رەتىندە بەكىتىلگەن. بۇل اۋماقتا 8 كوشە, 331 ءۇي ورنالاسقان. ال جوندەۋگە جاتاتىن ۇيلەردىڭ سانى – 275, جوندەۋگە كەلمەيتىن, ياعني بۇزىپ, جاڭا ءۇي سالۋدى قاجەت ەتەتىن ۇيلەر سانى – 3. بۇل ۇيلەردىڭ بارلىعى دا جەكە تۇرعىن ۇيلەر. بۇل جۇمىستارعا جاۋاپتى رەتىندە وبلىس اكىمىنىڭ ورىنباسارى قيلىباي نۇرداۋلەت بەكىتىلدى. وڭىردەن اتتانعان 9 ساراپشىلىق مەكەمەنىڭ 18 وكىلى زارداپ شەككەن تۇرعىن ۇيلەردىڭ تولىقتاي دەفەكتىلىك اكتىلەرىن ءازىرلەدى. جوندەۋ جۇمىستارى تامىز ايىنىڭ بىرىنە دەيىن اياقتالادى دەپ جوسپارلانۋدا, دەدى ءوڭىر باسشىسى س.ترۇموۆ بۇل جايىندا وڭىرلىك كوممۋنيكاتسيالار قىزمەتى الاڭىندا وتكەن بريفينگتە. سونداي-اق ارىس قالاسىنىڭ 150 بالاسى ءۇشىن كاسپي جاعالاۋىنداعى لاگەرلەردە تەگىن دەمالىس ۇيىمداستىرىلۋدا. شىلدەنىڭ 16-30 ارالىعىندا اقتاۋداعى «بالداۋرەن» بالالار لاگەرىندە ارىس قالاسىنىڭ 50 بالاسىنا, «الاۋ» لاگەرىندە 100 بالاعا جازعى دەمالىس ۇيىمداستىرۋ جوسپارلانۋدا. ماڭعىستاۋلىقتار ارىستاعى اعايىنعا كومەك قولىن سوزۋدا قالىس قالماق ەمەس. ماڭعىستاۋ وبلىسى