ونداعى ەلدەر دە قازاقستان باسىمدىقتارىنا قولداۋ بىلدىرۋدە
ەقىۇ-نىڭ ءىس باسىنداعى توراعاسىنىڭ ارناۋلى وكىلى, قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى كونستانتين جيگالوۆتىڭ وڭتۇستىك-شىعىس ەۋروپا ەلدەرىنە ساپارى ودان ءارى جالعاسۋدا.
بۇدان بۇرىن ونىڭ البانياعا بارعان ساپارى تۋرالى ايتقان ەدىك. تيرانادان كەيىن ونىڭ ساپارى چەرنوگوريا استاناسى پودگوريتسەدە جالعاستى. مۇندا كونستانتين جيگالوۆ وسى ەل پرەمەر-ءمينيسترىنىڭ ورىنباسارى سۆەتوزار ماروۆيچ, سىرتقى ىستەر ءمينيسترى ميلان روچەن جانە پارلامەنت سپيكەرىنىڭ ورىنباسارى ريفات راستودەرمەن كەزدەستى.
ءوزىنىڭ تاۋەلسىزدىگىن جاريالاعانىنا ءتورت-اق جىل بولعان جاس مەملەكەت بۇل كۇندەرى ەۋروپامەن ينتەگراتسيالانۋعا باعىتتالعان رەفورمالاردى قىزۋ جۇرگىزۋدە. وسى ماقساتتا وعان ەقىۇ-نىڭ قولداۋى اۋاداي قاجەت. قازىر ەلدىڭ استاناسىندا ۇيىمنىڭ دالالىق وكىلدىگى ورنالاسقان. ەندى ءىس باسىنداعى توراعانىڭ ارنايى وكىلىنىڭ كەلۋى ەلدىڭ دەموكراتيالىق رەفورمالاردى دامىتا تۇسۋىنە ەلەۋلى ىقپال ەتەر دەگەن سەنىم بار.
كەزدەسۋلەر بارىسىندا ۇيىم مەن چەرنوگوريا جانە قازاقستان مەن چەرنوگوريا اراسىنداعى قارىم-قاتىناستاردىڭ كەيبىر پەرسپەكتيۆالارى تالقىلاندى. ك.جيگالوۆ ۇيىم شەڭبەرىندە وتكىزىلەتىن بولاشاق شارالار تۋرالى بايانداپ, ولارعا چەرنوگوريا وكىلىنىڭ قاتىسۋىن قالايتىنىن جەتكىزدى.
بۇرىنعى يۋگوسلاۆيانىڭ بەلگىلى قالالارىنىڭ ءبىرى, كەزىندە قىسقى وليمپيادالاردىڭ ءبىرى وتكەن ساراەۆو قالاسى – قازىر تاۋەلسىز بوسنيا مەن گەرتسەگوۆينانىڭ استاناسى. ءىس باسىنداعى توراعا ارناۋلى وكىلىنىڭ ساپارى بالقان تۇبەگىندەگى وسى قالادا جالعاستى. بوسنيا مەن گەرتسەگوۆينا سوڭعى جىلدارعا دەيىن وسى تۇبەكتەگى عانا ەمەس, ەۋروپا قۇرلىعىنا اتى شىعىپ تۇرعان تۇراقسىزدىق پەن قاۋىپتىڭ وشاعى بولىپ كەلدى. تاۋەلسىزدىككە ۇمتىلعان ەلدىڭ ىشىندە تۇراقسىزدىق وتىن تۇتاتۋعا تالپىنعان ىشكى-سىرتقى كۇشتەر از ەمەس ەدى. سوندىقتان دا, ەقىۇ بۇل ەلدەگى بەيبىت قۇرىلىستىڭ تەزىرەك اياقتالۋىنا بەلسەندى تۇردە كىرىسىپ كەلەدى. ءىس باسىنداعى توراعانىڭ وكىلىن جىلى قارسى الۋدىڭ سەبەبى دە سول بولاتىن.
قازاقستاندىق ديپلومات مۇندا بوسنيا مەن گەرتسەگوۆينا پارلامەنتى تورالقاسىنىڭ توراعاسى حاريس سيلادجيچپەن, سىرتقى ىستەر ءمينيسترىنىڭ ورىنباسارى ا.تريشيچ-بابيچپەن جانە ەۋرووداقتىڭ جوعارعى جانە ارناۋلى وكىلى ۆالەنتين ينتسكومەن كەزدەسىپ, ەكىجاقتى كەلىسسوزدەر جۇرگىزدى. ك.جيگالوۆتىڭ سوزىنە قاراعاندا كونستيتۋتسيالىق رەفورمالاردى تابىستى جۇرگىزۋ ءۇشىن ەلدەگى بارلىق ساياسي كۇشتەردىڭ ۇنقاتىسۋ بارىسىندا قابىلدانعان كونسەنسۋستىق شەشىمدەرىنە قول جەتكىزۋ كەرەك. مۇنداي وركەنيەتتى ۇنقاتىسۋ وسى جىلدىڭ قازان ايىندا ەلدە بولاتىن سايلاۋدىڭ قارساڭىندا اسىرەسە وزەكتى.
وسى قاتاردا ەقىۇ-نىڭ 56 مۇشەسى دە ءبىراۋىزدان بوسنيا مەن گەرتسەگوۆينانىڭ وكىلى دۋنيا ءمياتوۆيچتى ۇيىمنىڭ باق ماسەلەلەرى جونىندەگى جاڭا وكىلى ەتىپ سايلاعانىن ايتا كەتۋ كەرەك. وسىنىڭ وزىنەن-اق ەقىۇ-نىڭ بارلىق مۇشەلەرگە تەڭ قاتىناس جاسايتىنىن كورۋگە بولادى.
جالپى العاندا, قازاقستاندىق دەلەگاتسيانىڭ بالقان تۇبەگى ەلدەرىنە جاساعان ساپارى تابىستى بولدى.
تالعات جۇماعۇلوۆ – ساراەۆودان.