قازىرگى تاڭدا ااك-ءتى 285 مىڭ وتباسى نەمەسە 1,4 ملن قازاقستاندىق الدى, سونىڭ ىشىندە 900 مىڭى – بالالار. ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرى بويىنشا, بۇگىندە ااك الۋشىلار قاتارىنان 393 مىڭ ادام – ەڭبەككە قابىلەتتى. ولاردىڭ 81 مىڭى مىندەتتى تۇردە جۇمىسقا ورنالاستىرىلۋى ءتيىس. دەگەنمەن, ولاردىڭ تەك 38 مىڭى جۇمىس ىستەيدى. 30 مىڭ ادام الەۋمەتتىك كەلىسىمشارتقا قول قويدى.
«بۇل – وتە تومەنگى كورسەتكىش. ءبىزدىڭ ەڭ باستى مىندەتىمىز – ااك الاتىن وتباسىدا ەڭبەككە قابىلەتتى ادامدار بولسا, وندا ولار جۇمىس ىستەۋى ءتيىس. سوندىقتان دا ءبىز وڭىرلەردىڭ اكىمدەرىنە الەۋمەتتىك كەلىسىمشارتقا قول قويۋ قاجەت ەكەنىن ايتامىز, ودان كەيىن مىندەتتى تۇردە جۇمىسقا ورنالاستىرۋ قاجەت. ەگەر ازامات جۇمىس ىستەمەسە, وندا ءبىز ااك تولەۋدى توقتاتامىز. وسىنداي تالاپ پەن زاڭ بار», — دەدى مينيستر.
سونىمەن قاتار, ب. ساپارباەۆ جۇمىس سۇرايتىن ادامدار از ەكەنىن اتاپ ءوتتى. بارلىعى ااك العىسى كەلەدى. بۇل ماسەلەدە, ءمينيستردىڭ ايتۋىنشا, ماسىلدىققا جول بەرمەۋ قاجەت.
«ەڭ باستىسى – ءبىز ماسىلدىققا جول بەرمەۋىمىز كەرەك. اقتاۋدا قاسىم-جومارت كەمەل ۇلى: «ءبىز ماسىلدىق پەن مۇقتاجدىقتى ايىرا ءبىلۋىمىز كەرەك» دەپ ايتتى. ادامداردىڭ ۇيدە جاتىپ, 100 مىڭ تەڭگە نەمەسە 180 مىڭ تەڭگە كولەمىندە ااك الۋىنا مۇمكىندىك بەرمەۋ كەرەك. سوندىقتان دا, زاڭ بۇزۋشىلىقتار انىقتالعان جاعدايدا, ااك تولەۋدى قىسقارتامىز», — دەدى ب. ساپارباەۆ.
مەملەكەت ءوز تاراپىنان جۇمىسپەن قامتۋدى قولداۋ شارالارىن ۇسىنادى. بىرىنشىدەن, 505 مىڭ تەڭگە سوماسىنا پايىز بەن كوميسسياسىز تەگىن قايتارىمسىز گرانتتار بەرىلەتىن بولادى. ەكىنشىدەن, 6% مولشەرىندە شاعىن نەسيە بەرىلەدى. ۇشىنشىدەن, ەگەر ازاماتتىڭ ماماندىعى جوق بولسا, وندا ول قىسقا مەرزىمدى كۋرستاردان ءوتىپ, ماماندىق الا الادى. ماماندىعىن العاننان كەيىن جانە سەرتيفيكات بەرىلگەن سوڭ, ول ءوزىنىڭ بيزنەس-جوسپارىن جاساپ, ءوز ءىسىن باستاي الادى. مۇمكىندىكتەرى شەكتەۋلى بالالاردى تاربيەلەپ وتىرعان انالارعا الەۋمەتتىك جۇمىس ورىندارىن اشۋ جوسپارلانىپ وتىر. بۇل ءۇشىن قوسىمشا قاراجات بولىنەدى.
«ەگەر جۇمىس بەرۋشىلەر مۇمكىندىكتەرى شەكتەۋلى بالالاردى تاربيەلەپ وتىرعان انالارعا جۇمىس ورىندارىن اشاتىن بولسا, وندا ءبىز ولارعا 35% سۋبسيديا تولەيتىن بولامىز», — دەدى مينيستر.