«Kazakh Tourism» ۇيىمداستىرۋىمەن الماتىدان جاساقتالعان 25 تاجىريبەلى شاباندوز الداعى ۋاقىتتا ارنايى كارتاسىن سىزىپ, تۋريستىك باعىتتاردى انىقتايتىن بولادى. الماتىدان شىققان ەكسپەديتسيا باتان, وي-قاراعاي شاتقالدارى, اسسى اسۋى, قارا-ارشا شاتقالى, جىڭىشكە وزەنى, امانجول ءۇستىرتى, كولساي, قايىڭدى كولدەرى مەن قايىڭدى وزەنى ماڭىنداعى اۋماقتاردى ارالاپ, كۇنىنە 10-16 شاقىرىمدى ءجۇرىپ ءوتىپ, جول بويى نۇسقاۋلىقتار ورناتىپ, سۋرەتكە, بەينە تاسپاعا ءتۇسىرۋ جۇمىستارىن دا جۇرگىزەتىن بولادى.
ەكسپەديتسيا مۇشەسى ۇكىجان مانەكينانىڭ ايتۋىنشا, اتتى تۋريزم الماتى وبلىسىندا جاقسى جولعا قويىلعان. ەكسپەديتسيانىڭ باعىتىنان كەڭىرەك مالىمەت بەرىپ وتكەن مامان ءتۋريزمدى دامىتۋ ءۇشىن ايماقتاردا قانداي جۇمىستار ىستەۋ كەرەكتىگىن, تۇرعىنداردىڭ ءتۋريزمدى دامىتۋداعى ۇلەسى قانداي بولاتىندىعى, ت.ب. ماسەلەلەرگە ساراپتاما جاساپ, ەكسپەديتسيا ءجۇرىپ وتكەن اۋماقتار بويىنشا بەينە-فوتوبانك جاساقتالاتىندىعىنان حاباردار ەتتى. ادام اياعى سيرەك باراتىن اۋماقتاردان تاجىريبەلى فوتوگرافتار تۇسىرگەن سۋرەتتەر مەن بەينە توپتامالار قازاقستان ءتۋريزمىنىڭ جارناماسىن جاساۋعا ىقپال ەتۋ ماقساتىندا Kazakh TV كانالىندا Across Central Asia باعدارلاماسىندا كورسەتىلەتىن بولادى. ەكسپەديتسيا مۇشەلەرى تاياۋدا اقمولا وبلىسىنان ورالدى. ال وتكەن جىلى شىعىس قازاقستان, سارىارقا, باتىس قازاقستاندا, سونداي-اق الماتى وبلىسىنىڭ بىرقاتار جەرلەرىن ارالاپ, كارتاسىن جاساقتاعان. بۇگىندە قىتايدان, كۋۆەيتتەن, ەۋروپا, ت.ب. ەلدەردەن كەلگەن تۋريستەردىڭ الەۋمەتتىك پاراقشالارىندا قازاقستاندى ناسيحاتتاۋ جۇمىستارى دا قولعا قويىلىپ كەلەدى.
«Outdoor Kazakhstan» باعدارلاماسىنىڭ اۆتورى ءارى جۇرگىزۋشىسى ماكسيم لەۆيتين اتاپ وتكەنىندەي, ەلىمىزدە اتتى ءتۋريزمدى دامىتۋعا تولىققاندى جاعداي بار. بۇگىندە تۋريزم قارقىندى دامىعان ەلدەردىڭ وزىندىك برەندى قالىپتاسقان. مىسالى, تۇركيا, تايلاند سياقتى ەلدەر تەڭىزىمەن تارتىمدى بولسا, قازاقستان تاۋلارىمەن, عاجايىپ ولكەلەرىمەن كورىكتى. سان عاسىرلىق تاريحى بار ەلىمىزدە كەز كەلگەن تاۋلى وڭىردە اتتى ءتۋريزمدى دامىتۋ اسا قيىندىق تۋعىزا قويمايدى. بۇگىندە قىرعىزستان, مونعوليا سياقتى ەلدەر باسەكەلەسى بولىپ تابىلاتىن قازاقستاندىق اتتى تۋريزم بيىك تاۋلى قىراتتاردى باعىندىرۋعا زور مۇمكىندىك بەرەدى. سونداي-اق, ماكسيم لەۆيتين الماتى وبلىسى مەن شىعىس قازاقستان تاۋلارىندا, تابيعاتىندا ۇقساستىق بولعانىمەن, ينفرقۇرىلىمى مەن لوگيستيكادا نازار اۋداراتىن ماسەلەلەر بار ەكەندىگىن ايتادى. سونداي-اق وڭتۇستىك قازاقستان وڭىرىندەگى ءتۋرزيمدى دامىتۋعا دا بارىنشا كوڭىل بولگەن ءجون.
سولتۇستىك تيان-شانعا قاراي باعىت العان ەكسپەديتسيا بىرنەشە كۇن بويى اۋىل-ايماقتارداعى تۇرعىندارمەن كەزدەسىپ, تۋريستەردى قابىلداۋ ءتارتىبى جايىندا اقپارات الماسىپ, ء تۋريزمدى دامىتۋ مۇمكىندىكتەرىن ساراپتاپ قايتاتىن بولادى. بۇگىندە اتتى ءتۋريزمدى دامىتۋ تاۋ ەتەگىندە ورنالاسقان ەلدى مەكەندەر ءۇشىن تابىس كوزى بولىپ تابىلادى. شاعىن كاسىپكەرلىك نىساندارىن دامىتۋ ارقىلى, تۋريستەرگە ساپالى دا قولايلى قىزمەت تۇرلەرىن ۇسىنۋ تىپتەن ايماق ەكونوميكاسىن دامىتۋعا دا ىقپال ەتەتىنى ءسوزسىز. بۇل جاعدايدا جەرگىلىكتى اكىمدىكتەردىڭ شاعىن جانە ورتا بيزنەستى قولداۋداعى شارالارعا نازار اۋدارۋى اسا ماڭىزدى.