«جايسىز حابار جەتكەننەن-اق توبىل ءوڭىرىنىڭ جۇرتشىلىعى قينالعان اعايىنعا قولداۋ ءبىلدىرىپ, قول ۇشىن بەرۋگە اسىقتى.ولار جەدەل تەلەفونعا حابارلاسىپ, كومەك بەرگىسى كەلەتىن ۇسىنىستارىن ايتىپ جاتىر. جەكەلەگەن ادامدار Nur Otan پارتياسىنىڭ فيليالى جانىنان قۇرىلعان ارنايى بەكەتكە بارا الادى. سىن ساتتە ىنتىماق تانىتۋ ماڭىزدى» دەيدى «Nur Otan» پارتياسى قوف توراعاسىنىڭ ءبىرىنشى ورىنباسارى جاڭاباي بيسيمباەۆ.
كەشە ارىس قالاسىنداعى ازاماتتارعا كومەك كورسەتۋ ماقساتىندا 20 توننا ۇن, 7 توننا ماكارون مەن 3 توننا كونديتەرلىك ونىمدەرى اۆتو كەرۋەنى جولعا شىقتى.
«Nur Otan» پارتياسىنىڭ مۇشەلەرى مەن مەكەمە قىزمەتكەرلەرى ءبىر كۇندىك ەڭبەك جالاقىسىن ارىس تۇرعىندارىنا كومەك ءۇشىن ارنايى شوتقا اۋداردى. قارجىلاي كومەك كورسەتكەندەردىڭ اراسىندا قوستانايلىق بيزنەس وكىلدەرى دە بار. مىسالى, جەرگىلىكتى كاسىپكەر, «Nur Otan» پارتياسىنىڭ مۇشەسى سەرگەي بلوك جاعدايدى ەستىگەن بويدا ءبىر ميلليون تەڭگە, «Nur Otan» پارتياسى ساياسي كەڭەسىنىڭ مۇشەسى, قازاقستاننىڭ ەڭبەك ەرى ازامات تۇرسىنوۆ جانە ول باسشىلىق ەتەتىن «قاراسۋ» كومپانياسىنىڭ قىزمەتكەرلەرى 3,5 ميلليون تەنگە اۋداردى. 20 توننادان استام ۇندى «ولجا- اگرو» جاۋاپكەتشىلىگى شەكتەۋلى سەرىكتەستىگى ارنايى كولىككە تيەپ جونەلتتى.
«ولجا-اگرو» سەرىكتەستىگى مۇنىمەن شەكتەلمەيدى, اپتانىڭ سوڭىنا دەيىن تاعى 40 توننا ۇن جونەلتەتىن بولامىز» دەيدى شارۋاشىلىق باسشىسى ايداربەك حودجانازاروۆ. «Nur Otan» پارتياسى وبلىستىق فيليالى «جاس وتان» جاستار قاناتىنىڭ بەلسەندىلەرى قابىلداۋ بەكەتىندە كۇندىز-ءتۇنى جۇمىس ىستەيدى.
«كوپتەگەن قوستانايلىقتار ازىق-ت ۇلىك, باسقا دا تۇرمىستىق ءبىرىنشى قاجەتتى كەرەك-جاراقتار اكەلەدى. وبلىستىڭ قالالارى مەن اۋداندارىنان, كاسىپكەرلەردەن تۇسكەن ازىق-ت ۇلىكتەر بەكەت باسىندا ءبىراز جۇككە اينالدى» دەيدى پارتيا فيليالى «جاس وتان» جاستار قاناتىنىڭ توراعاسى ءادىل ديكەتاەۆ.
ارىستاعى جاعداي تۇراقتالعانشا قوستانايداعى كومەك بەكەتىنىڭ جۇمىسى جالعاسا بەرەدى.