جاپون اكتەرى, كاسىپكەر يۋيچي يشي 38 جاستا. ول – تۋىستار مەن دوستاردى جالعا بەرەتىن فيرمانىڭ يەسى. ايتۋىنشا, بۇل يدەيا وسىدان 14 جىل بۇرىن اياقاستى پايدا بولعان. بالاباقشاعا ۇلىن ورنالاستىرعىسى كەلگەن تانىسى ۋاقىتشا «كۇيەۋى» بولا تۇرۋىن وتىنگەن ەكەن. وسىلايشا «اكە» رولىنەن باستالعان شاعىن ساحنا كىشىگىرىم تابىس كوزىنە اينالىپ جۇرە بەرگەن.
ورتا ەسەپپەن جىلىنا 200 مىڭ اجىراسۋ تىركەلەتىن جاپونيا حالقى شىنايى سەزىمىن كورسەتۋدى, سىرتقا شىعارۋدى قۇپ كورمەيدى. جەكە باسىنىڭ قادىر-قاسيەتى, ابىرويى كەيدە شىندىقتان دا باسىم ءتۇسىپ جاتاتىنى وسىدان بولسا كەرەك. ءيۋيچيدىڭ ايتۋىنشا, قازىر كومپانيادا 2200 شتاتتان تىس قىزمەتكەر جۇمىس ىستەيدى. اقىسىن تولەسەڭىز بولعانى اتا-اجە, اكە-شەشە, دوسى, اتالاس تۋىسى, جاماعايىنى دەگەندەي كەرەمەتتەي رولدەرمەن كوڭىلىڭىزدەن شىعادى. ال ءيۋيچيدىڭ ءوزى شامامەن 35 رەت «اكە» بولىپ, جيىرما بەس رەت «ۇيلەنگەن», ودان بولەك جۇزدەگەن ايەل ءتۇرلى رولدەرگە جالداپ ساتىپ العان. سونداي-اق جالعان تۋىسى نەمەسە تانىسى ەسەبىندە 69 اداممەن ۇنەمى بايلانىستا. رولدەرگە كىرۋ ءۇشىن, رومانتيكالىق كومەديالار مەن سەريالداردى قاراپ جاتتىعادى. «باراتىن كەزدە وتباسى تۋرالى مالىمەتتەردى قايتا پىسىقتاپ الامىن. بارلىق اقپاراتتار كىتاپشاما جازىلعان, جاڭىلىپ قالعان كەزدە تاساعا بارىپ قاراپ الامىن», دەيدى. كليەنتتەر دوس, نە تۋىس ادامدى جالعا الۋ ءۇشىن ءتورت ساعاتتىق كەزدەسۋگە 20 مىڭداي يەن (180 دوللار) تولەيدى.
«قازىر ادال دوس تابۋ قيىن. سوندىقتان ادامدار بىزگە جۇگىنەدى. ولارمەن سەرۋەندەۋگە, سويلەسىپ, سىر اقتارۋعا دايىنبىز», دەيدى يۋيچي The Atlantic باسىلىمىنا بەرگەن سۇحباتىندا. ونىڭ ايتۋىنشا, ارا-تۇرا قارتتار جالعىزدىقتان قۇتىلۋ ءۇشىن «نەمەرەلەردى» جالدايدى. دەسە دە, «اكەگە» سۇرانىس وتە جوعارى.