قالاداعى بەلگىلى مەتسەناتتار ءامىرجان نابيەۆ, ۆياچەسلاۆ بانششيكوۆ جانە قايىرجان ميميكەنوۆتىڭ دەمەۋشىلىگىمەن اشىلعان Open Space قاعيداسى بويىنشا بىرنەشە ايماققا بولىنگەن جاڭا جاستار ورتالىعىندا IT station, 1000 ادەبيەتتى كىتاپحاناسى بار Reading platform, سەمينارلار, ترەنينگتەر وتەتىن Meeting room ورنالاسقان.
ورتالىقتىڭ اشىلۋىنا قاتىسىپ, قۇتتىقتاۋ ءسوزىن ارناعان الماتى اكىمى باۋىرجان بايبەك جاستار يدەيالارى مەن ۇسىنىستارىنا قولداۋ كورسەتۋ ەل پرەزيدەنتى قاسىم-جومارت توكاەۆتىڭ باستى ماقساتتارىنىڭ ءبىرى ەكەنىن اتاپ ءوتتى. بۇرىندارى مۇنداي قالالىق كوۆوركينگ-ورتالىقتار الاتاۋ جانە ناۋرىزباي اۋداندارىندا اشىلىپ, جاستار ءۇشىن شەبەرلىك سىنىپتارى, ءتۇرلى ترەنينگتەر, سىرتتان كەلگەن جاستاردىڭ جۇمىسقا ورنالاسۋىنا قاتىستى كەڭەستەر وتكىزىلىپ كەلەدى. جامبىل اتىنداعى جاسوسپىرىمدەر كىتاپحاناسى جاستاردىڭ زياتكەرلىك ورتالىعى بار. بۇرىنعى ترامۆاي دەپوسىنىڭ بازاسىندا جاس الماتىلىقتار ءۇشىن لوفت-ورتالىقتىڭ ەكىنشى كەزەڭى «Depo Evolution Park» اشۋ جوسپارلانعان.
الماتى جاستارعا قولداۋ كورسەتۋدە تىڭ جوبالارمەن ەرەكشەلەنىپ كەلەدى. ەلباسىنىڭ بەس الەۋمەتتىك باستاماسى بويىنشا قالادا 20 مىڭ ورىندى 38 جاتاقحانا سالۋ جوسپارلانعان بولسا, قازىردىڭ وزىندە ءتورت جاتاقحانا ىسكە قوسىلعان. جاقىن ارادا تاعى ءبىر جاتاقحانا ءوز تۇرعىندارىن قابىلدايتىن بولادى.
ەكى جىل ىشىندە 200 جاس وتباسى «الماتى جاستارى» قالالىق باعدارلاماسى بويىنشا پاتەر الدى. كاسىبي جانە تەحنيكالىق بىلىمگە ەرەكشە نازار اۋدارىلۋدا. بۇگىنگى كۇنى 30 مىڭنان استام جاستار جۇمىسشى جانە سەرۆيستىك ماماندىقتاردى تەگىن الۋدا.
بۇگىن جاڭا كوۆوركينگ-ورتالىقتا «Nur Otan» پارتياسى قالالىق فيليالىنىڭ توراعاسى باۋىرجان بايبەك بىرلەستىكتىڭ جاڭا مۇشەلەرىنە جاڭا پارتيا بيلەتتەرىن تاپسىردى. ولاردىڭ قاتارىندا قازاق ءتىلى كلۋبىنىڭ باسشىسى مارينا فالەەۆا, قازاقستان مەن پاراليمپيا ويىندارىنىڭ بىرنەشە دۇركىن چەمپيونى ازامات ورازبەك, جاس كومپوزيتور عالامات بەيسەقوجا, سينگاپۋرداعى «مەديتسينا سالاسىنداعى 100 ستارتاپ-جوبا» جۇلدەگەرى الينا اچيلوۆا, «L-Generation» جەتەكشىسى ەدۋارد لي, تەلەجۇرگىزۋشى ديانا سكاتوۆا, «ارلان» تەاترىنىڭ اكتەرى جانە پانكراتيون بويىنشا ەل چەمپيونى شالقار قۇدايبەرگەن بار.
الماتى