دەسەك تە, قالا سىرتىندا ورنالاسقان ۇشاقتار كەنتىنىڭ پروبلەمالارى دا جەتەرلىك. اۋىز سۋ مەن ەلەكتر ەنەرگياسىنىڭ جوقتىعىنا مىنە, ونشاقتى جىلدىڭ ءجۇزى بولىپتى. ون جىلدان بەرى قاراڭعىلىقتا وتىرعان حالىقتىڭ زارىن تىڭداۋعا سەمەي قالاسىنىڭ اكىمى ەرماك ءسالىموۆ بۇل جولى ءوزى ارنايى باردى. «سۋ جوق, جارىق جوق قالاي ءومىر سۇرمەكپىز» دەپ نازالاندى اكىمدى كورگەن حالىق.
-قالا اكىمىنىڭ ەڭبەگىن جوققا شىعارعىمىز كەلمەيدى, سىزدەر جاڭا مەكتەپ سالىپ بەردىڭىزدەر, وعان ۇلكەن راحمەت,-دەدى ۇشاقتار كەنتىنىڭ تۇرعىنى سەليحا قاليەۆا,-بىراق, ويلاڭىزدارشى وزدەرىڭىز, جاڭا تەحنولوگيالى مەكتەپتى سالدىڭىزدار. قالانىڭ ورتالىعىندا مۇنداي مەكتەپ جوق, دەپ ماقتانا الامىز. مەكتەپتىڭ وزىق تاپسىرمالارىن ورىنداۋ ءۇشىن بالالارىمىز, نەمەرەلەرىمىز ۇيگە كەلەدى. كەلسە «سۆەت»جوق! كومپيۋتەر قوسا المايدى. تۇستەن كەيىن وقيتىندارعا ءتىپتى قيىن. قىستا قاراڭعىدا قايتادى. كەلسە جارىق جوق. قىستا تاڭ كەش اتادى. ۇلگەرمەيدى ساباق قاراپ, كىيمدەرىن جيناپ, شاشتارىن تاراپ. مىنە, وسىدان كەيىن سىزدەر, بالا نەگە ناشار وقيدى دەيسىزدەر؟! سۋ تاعى جوق. جاقىندا عانا بىرنەشە ءۇي بىرىگىپ, ءوز كۇشىمىزبەن سۋ كىرگىزگەندەي بولدىق. قالعان ۇيلەر توسىپ وتىر. قۇبىرلار بار. بىراق, ولار بىزدەن شەتكەرى تۇستا, يۋنوست اۋدانى تۇسىندا عانا تۇر.
تۇرعىندارمەن كەزدەسۋگە كەلگەن «سمف مەحكولوننا №59» جشس باس ديرەكتورى پەتر رادەنكوۆ الەۋمەتتىك ينفراقۇرىلىمدىق ماسەلەلەر بويىنشا كەلىسىمشارت تەز ارادا جاسالسا, پروبلەمالار قاراشا ايىنا دەيىن شەشىلىپ قالاتىندىعىن, قۇرىلىس جۇىستارىنا كەم دەگەندە بەس-التى اي قاجەتتىگىن ايتتى. پ. رادەنكوۆ قالا باسشىسى ەرماك ءسالىموۆ ءوزى تىكەلەي كەلىپ, ەلمەن جۇزدەسىپ وتىرعاندىقتان دا پروبلەمالارىڭىز بۇل جولى نازاردان تىس قالمايدى دەپ سەندىردى.
قالا اكىمى ەرماك ءسالىموۆ بولسا, بيۋدجەتتەن تۇرعىنداردىڭ الەۋمەتتىك جاعدايىن جوندەۋ ءۇشىن قاراجات قاراستىرىلعاندىعىن ايتىپ ءوتتى. تۇرعىنداردىڭ تاعى ءبىر رەنىشتەرى, اۆتوبۋس قاتىناسى ناشار. بەكىتىلگەن ءبىر-ەكى اۆتوبۋس ايالداماعا جەتپەي, بۇلاردى سىرت اينالىپ كەتە بارادى ەكەن. سودان بالالار مەكتەپكە جەتە المايدى.
-وقۋ جىلى باستالىسىمەن سەمەيدە قۇراستىرىلىپ, جاڭادان پايلالانۋعا بەرىلىپ جاتقان اۆتوبۋستار سىزدەرگە دە ناقتى جۇمىس كەستەسىمەن ءجۇرىپ, كەلەتىن بولادى,-دەدى قالا اكىمى ەرماك ءسالىموۆ,-قاراشا ايىندا سۋ مەن جارىق ماسەلەسى دە وڭتايلى شەشىمىن تابادى دەپ سەنىڭىزدەر.
اكىمنىڭ ۋادەسىن ەستىگەن حالىق «توسقاننان باسقا امالىمىز قايسى» دەستى. كەزدەسۋدە تاعى دا باسقا كوپتەگەن پروبلەمالار قوزعالدى.
راۋشان نۇعمانبەكوۆا
سەمەي