قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” اتتى حالىققا جولداۋى ەلىمىزدىڭ دامۋ باعىتىن ايقىنداپ, بولاشاقتى ناقتى بولجاۋىمەن قۇندى. جاس ۇرپاقتىڭ ءتاربيەسى مەن بولاشاعىنا بەيجاي قارامايتىن ۇستاز رەتىندە مەنى ونداعى ءبىلىم, عىلىم سالاسىندا ورىن الاتىن جاڭا باعىتتار قۋانتتى. قانداي مەملەكەت بولسا دا ءبىلىمى, عىلىمى دامىمايىنشا العا جىلجىمايدى.
ەلباسىنىڭ ءبىلىم ساپاسى ەڭ جوعارى حالىقارالىق تالاپتارعا جاۋاپ بەرۋى ءتيىس دەگەن مىندەتى ونىڭ الەمدىك دەڭگەيگە شىعۋىنا مۇمكىندىك تۋعىزىپ وتىر. ەگەمەن ەلىمىزدىڭ توپ جارىپ, باسەكەگە قابىلەتتى ءبىلىمى مەن عىلىمىن تانىتقانى, ارينە, قۋانىشتى. دەمەك, الەمدىك وزىق ءبىلىم ۇلگىلەرىن ەنگىزىپ, ساراپتاپ, ءتيىمدىسىن الىپ جاتساق, ونىڭ سالانى دامىتۋداعى ۇلەسى زور دەۋگە بولادى.
ايتىلعان مىندەتتەردى ءىس جۇزىنە اسىرۋدا ءوزىم باسشىلىق جاسايتىن جامبىل اۋدانىنداعى ش.ءۋاليحانوۆ اتىنداعى ورتا مەكتەپتىڭ ۇجىمى قۇندى قۇجاتتى وقىپ, تالقىلاپ, وسى بويىنشا شاكىرتتەردىڭ ءبىلىم دەڭگەيىن كوتەرۋ ءۇشىن جۇمىلا ەڭبەك ەتۋدە. وتكەن وقۋ جىلىن تابىستى قورىتىندىلاساق, بيىل ودان دا جوعارى كورسەتكىشتەرگە جەتۋگە ۇمتىلىپ وتىرمىز.
جولداۋدا كاسىپتىك جانە تەحنيكالىق ءبىلىم بەرۋ كاسىبي ستاندارتتارعا نەگىزدەلىپ, قاتاڭ تۇردە ەكونوميكانىڭ قاجەتتىلىكتەرىمەن ءوزارا بايلانىستىرىلۋى كەرەك دەلىنگەنى دە كوڭىلگە قونىمدى, بۇگىنگى نارىقتىق قاتىناستىڭ شىرقاۋ شىڭىنا شىعۋداعى العىشارت. ويتكەنى, ەلىمىزدە كاسىبي ءبىلىم كەنجەلەپ, ءوندىرىسكە قاجەتتى مامان تاپشىلىعى تۋىنداعانىن سەزىنۋدەمىز. دەمەك, كاسىپتىك-تەحنيكالىق ءبىلىمدى جانداندىرۋ باستى ماقسات. ول قۇندى قۇجاتتاعى ون ەكى جىلدىق وقىتۋمەن شەشىمىن تاباتىنى دا بەلگىلى. وقۋشىلار مەكتەپتە ءبىلىم الۋمەن قاتار, بەلگىلى ءبىر كاسىپتى مەڭگەرىپ شىقسا, ولاردىڭ جۇمىسپەن قامتىلۋىنا جول اشىلادى.
الداعى ونجىلدىقتا ءبۇلدىرشىندەردى مەكتەپالدى دايارلىقپەن, ياعني بالاباقشامەن قامتۋ ءۇشىن “بالاپان” باعدارلاماسىنىڭ جۇزەگە اساتىندىعى دا قۋانىشتى. ويتكەنى, ءبىلىم نەگىزى بالاباقشادا قالانادى. دايارلىقتان وتكەن بالا دەر كەزىندە وزىنە قاجەتتى ءبىلىم نارىمەن سۋسىنداپ, مەكتەپ پارتاسىنا دايىن بولادى. بۇل الداعى ءبىلىم الۋىنا زور ءمۇمكىندىك اشادى. باستاۋىش تابالدىرىعىن اتتاعان بۇلدىرشىندەردىڭ اراسىندا وسى ايىرماشىلىق ايقىن سەزىلەتىنىن كورىپ ءجۇرمىز. بۇل – باستاپقىدا ايتىلعان حالىقارالىق ستاندارتتار نەگىزىندە ءبىلىم الىپ, بولاشاققا نىق قادام جاسايتىن رۋحى بيىك, ءبىلىمدى, ساپالى تۇلعا تاربيەلەۋ دەگەن ءسوز. جولداۋ جولدارىن وقىعان سايىن وركەنيەت تورىنە وزۋعا جاسالعان نىق قادام, بەرىك بايلامعا كوز جەتكىزە تۇسكەندەيمىز.
زويا قىرعىزباەۆا, ش.ءۋاليحانوۆ اتىنداعى ورتا مەكتەپ ديرەكتورى, ءبىلىم بەرۋ ءىسىنىڭ ۇزدىگى.
الماتى وبلىسى.