كەلىسىمگە كەلۋ بارىسىندا داۋدى شەشۋدىڭ بالاما تۇرلەرى, سونىڭ ىشىندە مەدياتسيانى قولدانۋ اياسىن كەڭەيتۋ, ساپالى سوت تورەلىگىن قامتاماسىز ەتۋ, حالىقتىڭ سوت جۇيەسىنە دەگەن سەنىمىن ارتتىرۋ ماسەلەلەرى ءسوز بولدى.
- بۇگىنگى تاڭدا سوتقا دەيىن جانە سوت تارتىبىندە داۋلاردى شەشۋدىڭ بالامالى تاسىلدەرى كەڭىنەن قاراستىرىلعان. بيلەر كەڭەسىمەن بىرىگىپ, ولاردىڭ قولدانىسىن ارتتىرۋعا بارىنشا كۇش جۇمساۋىمىز كەرەك. بۇل باعىتتا بيلەردىڭ جۇمىسىن قوعامدىق-قۇقىقتىق ينستيتۋت رەتىندە دامىتۋ جانە ناسيحاتتاۋعا باعىتتالعان ءىس-شارالار وتكىزۋدى, بالامالى ادىسپەن ىستەر قاراۋدى جۇزەگە اسىرامىز, دەدى ەرجان داۋليەۆ.
وسىدان سوڭ, بيلەر كەڭەسى تولىق قۇرامدا اقتاۋ قالاسىنىڭ №2 سوتىنا تۇسكەن بىرنەشە تالاپ ارىزدى قارادى.
سوتقا جازعان تالاپ ارىزىندا ازاماتشا ب. ءوزىنىڭ اتىنداعى پاتەرگە بۇرىنعى زاڭدى نەكەدەگى كۇيەۋى مەن ونىڭ ءىنىسىنىڭ ەشقانداي ۇلەسى جوق ەكەنىن ايتىپ, پاتەرگە مەنشىك قۇقىعىن تانۋدى سۇراعان. سوت تاراپتاردىڭ وكىلدەرىنە ءىستى مەدياتسيا ارقىلى قاراۋدى ۇسىندى. ناتيجەسىندە قورعاۋشىلار ءوز قورعاۋىنداعى ازاماتتارعا مەدياتيۆتىك كەلىسىمگە كەلۋ ارقىلى ارتىق شىعىنعا ۇشىراماي, ءىستى جىلدام ءارى بىتىمگەرلىكپەن اياقتاۋعا بولاتىنىن, بۇل ءۇشىن ءىستى بيلەر كەڭەسىنىڭ قاراۋىنا بەرۋ كەرەكتىگىن ءتۇسىندىردى.
بيلەر كەڭەسى تالاپ ارىزدى قاراپ, تاراپتارعا ءوز قۇقىقتارى مەن مىندەتتەرىن تۇسىندىرگەن سوڭ, ازاماتشا تالاپ ارىزىنان باس تارتىپ, ال جاۋاپكەرلەر بۇدان بىلاي پاتەردى ءبولىسۋ تۋرالى داۋ قوزعاماۋعا كەلىستى. ەكى جاق قول الىسىپ, مەدياتيۆتىك كەلىسىم بەكىتىلدى.
ءبىر كۇندە بيلەر كەڭەسىنىڭ قاراۋىنداعى 2 ءىس بويىنشا كەلىسىم بەكىتىلىپ, ءبىر ءىس بويىنشا تاراپتار كەلىسىمگە كەلۋ ءۇشىن قوسىمشا ۋاقىت سۇرادى.