وبلىستىق سوتتىڭ قىلمىستىق ىستەر جونىندەگى سوت القاسىنىڭ ۇيىمداستىرۋىمەن وتكەن ءىس-شارانىڭ باستى ماقساتى – قىلمىستىق ءىس جۇرگىزۋدە زاڭبۇزۋشىلىقتىڭ الدىن الۋ, سونىمەن قاتار قاتىسۋشىلار ۇلتتىق قىلمىستىق-پروتسەستىك جۇيەنىڭ ەۋروپالىق دەموكراتيالىق جۇيەمەن سايكەستىگىن دە تالقىلادى.
جيىنعا قاتىسقان وبلىستىق سوتتىڭ توراعاسى ەرجان داۋليەۆ اتالعان دوڭگەلەك ۇستەل باسىندا وڭىردە قوردالانعان ماسەلەلەردى شەشۋگە ىقپال ەتۋ كەرەكتىگىن اتاپ ايتتى. قىلمىستىق پروتسەسس تۋرالى ايتقان ول قازىرگى ۋاقىتتا باسى ارتىق تالاپتار مەن ەرەجەلەردەن ارىلىپ, ازاماتتار مەن زاڭدى تۇلعالاردىڭ قۇقىعى مەن بوستاندىعىن تولىق ءارى ساپالى قورعاۋدىڭ باستى مىندەت ەكەنىنە توقتالدى.
قىلمىستىق ىستەر جونىندەگى سوت القاسىنىڭ توراعاسى ەرجان قاراباەۆ سوت جۇيەسىن تسيفرلاندىرۋ كورسەتكىشتەرىن, سونىڭ ىشىندە ەلەكتروندى قىلمىستىق ىستەر مەن قىلمىستىق سوت بۇيرىعىن ارتتىرۋ كەرەكتىگى تۋرالى باياندادى. ول قىلمىستىق پروتسەستە تاراپتاردىڭ باسەكەلەستىگى مەن تەڭقۇقىلىعىن قامتاماسىز ەتۋ قىلمىستىق پروتسەستىڭ مىندەتتى كومپونەنتى ەكەنىن اتاپ ايتتى.
دوڭگەلەك ۇستەلگە قاتىسۋشىلار قىلمىستىق ىستەردى پروكۋراتۋراعا قايتارۋ, سوتتالۋشىلاردى اقتاۋعا سەبەپ بولاتىن زاڭ نورمالارىنىڭ سوتقا دەيىنگى تەرگەۋ ورگاندارى تاراپىنان بۇزىلۋى, باستى سوت تالقىلاۋىندا ايىپتى وزگەرتۋدىڭ نەگىزگى سەبەپتەرى, زاڭ بۇزۋشىلىقتاردىڭ قايتالانۋى ءۇشىن شىعارىلاتىن جەكە سوت قاۋلىلارى تۋرالى ماسەلەلەردى جان-جاقتى تالقىلاپ, وي-پىكىرلەرىن ورتاعا سالدى.
قاتىسۋشىلار جيىندى قورىتىندىلاي كەلە, زاڭ بۇزۋشىلىقتاردىڭ الدىن الۋ جانە سوتقا دەيىنگى تەرگەپ-تەكسەرۋدە كەمشىلىكتەرگە جول بەرىلەتىن ماسەلەلەردى جويۋ تۋرالى بىرقاتار ۇسىنىمداردى بەكىتتى.
ماڭعىستاۋ وبلىسى