قازاقستاندىق عالىم ايەلدەر قوعامىنىڭ پرەزيدەنتى, فيلولوگيا عىلىمىنىڭ دوكتورى, پروفەسسور تاڭات اياپوۆا شارانىڭ نەگىزگى باعىت-باعدارىمەن تانىستىرىپ ءوتىپ, عالىم رەتىندە قوعامعا ۇلەس قوسۋ, ۇلتتىق تاربيەگە, قوعامىمىزداعى كوكەيتەستى ماسەلەلەرگە ارنالعان عىلىمي زەرتتەۋلەر, مادەني, الەۋمەتتىك ءىس-شارالاردىڭ وتكىزىلۋىن ۇيىمداستىرۋ بارىسىنا توقتالدى.
قازاقستاندىق عالىم ايەلدەر قوعامى وتباسى مەن گەندەرلىك ساياسات جونىندە عىلىمي-تاجىريبەلىك زەرتتەۋلەردى جۇزەگە اسىرۋعا مۇمكىندىك بەرەتىن جوبالاردى ازىرلەۋمەن قاتار ۇلتتىق سانانى قالىپتاستىرۋداعى انا ءتىلىنىڭ, ءتول مادەنيەتتىڭ جانە وتباسىنىڭ ءرولى, جاھانداعى زاماناۋي ۇلتتىق مادەنيەتتى دامىتۋ ماسەلەلەرىنە ەرەكشە كوڭىل ءبولىپ كەلەدى. بۇگىندە قوعامدى ىزگىلەندىرۋگە باعىتتالعان بىرنەشە جوبالاردى ازىرلەگەن قوعام مۇشەلەرى جاستار ءۇيى ورتالىعىنىڭ جۇمىسىنا دا بەلسەنە قاتىساتىن بولادى. ورتالىقتا بەلگىلى عالىمدار, ۇلگىلى وتباسى مۇشەلەرى ارنايى ساباقتار وتكىزىپ, ۇلگىلى وتباسىن قۇرۋعا بايلانىستى شىعارماشىلىق سەمينارلار, فورۋمدار وتكىزەتىن بولادى.
وسى شاراعا ارنايى شاقىرىلعان قازاقستان عالىمدار وداعىنىڭ پرەزيدەنتى, قر ۇيا اكادەميگى, ەكونوميكا عىلىمدارىنىڭ دوكتورى, پروفەسسور ورازالى سابدەن ايەل عالىمدار باسقوسۋىنا قولداۋ ءبىلدىرىپ, وركەنيەت باسپالداعىندا تۇرعان مەملەكەت ءۇشىن تالانتتاردى بىرىكتىرۋ قاجەتتىگىن العا تارتتى. «ايەلدىڭ ءرولى وتباسىندا عانا ەمەس, قوعامنىڭ بارلىق سالاسىندا ماڭىزدى. بۇگىندە الەم جاڭا وركەنيەت باسپالداعىندا تۇر. ايەل ەر ادامدارمەن قاتار ۇلتتىڭ يممۋنيتەتىن قالىپتاستىرۋشى كۇش. كەشەگى تاريحىمىزداعى تۇمار, ۇماي, دومالاق انالار رۋحىن جانداندىراتىن كەزەڭ تۋدى. قوعامعا جاڭا سەرپىلىس تۋدى. وي-سانا قورى قوسىلعاندا عانا ەل العا جىلجيدى. سوندىقتاندا ايەل عالىمداردىڭ پوتەنتسيالىن جاقسىلاپ پايدالانۋ كەرەك» دەگەن اكادەميك قوعامنىڭ جۇمىسىنا ءسات-ساپار تىلەدى.
فورۋمعا قاتىستى پىكىرىمەن بولىسكەن فيلولوگيا عىلىمدارىنىڭ كانديداتى ءاليما ىسقاعيەۆا ۇلتتىق قۇندىلىقتارىمىزدى جوعالتپاي تازا سويلەۋگە ۇيرەتۋ, بالالاردىڭ سويلەۋ مادەنيەتىن ارتتىرۋ, انا ءتىلىمىزدى كوركەيتىپ, حالىقىمىزدىڭ سالت-ءداستۇرى مەن تاربيەسىن بالا بويىنا سىڭىرۋدەگى مىندەتتەرگە توقتالىپ وتسە, فيلوسوفيا عىلىمدارىنىڭ دوكتورى زامزا قودار گەندەرلىك ساياساتقا قاتىستى پىكىرىن ءبىلدىردى. ايەلدەر بۇگىندە وتباسىندا عانا ەمەس, قوعامنىڭ بارلىق سالاسىندا جوعارى جاۋاپكەرشىلىككە يە. «ءبىز ءوز مەنتاليتەتىمىزگە ساي ەر ادامدى سىيلاۋ, ۇلكەن ادامدى قۇرمەتتەۋ, قىز بالا تاربيەسىنە ۇقىپتى قاراۋ سياقتى ەرەكشە قۇندىلىقتارىمىز بار. وركەنيەت باسپالداعىندا تۇرعان قازاقستان وسىنداي قۇندىلىقتارىن دامىتا وتىرىپ, ايەل ادامداردىڭ قوعامعا قوساتىن ۇلەسىنىڭ قوماقتى ەكەنىنە كوز جەتكىزە تۇسەمىز», دەپ اتاپ ءوتتى عالىم.
فورۋم بارىسىندا سونىمەن قاتار «اتامەكەن» ۇكپ ادامي كاپيتالدى دامىتۋ ءبولىمىنىڭ باسشىسى ۆەرا تسزين, قوعام قايراتكەرى اسىلى وسمان, ت.ب. عالىمدار ءوز پىكىرلەرىمەن ءبولىسىپ, ايەل عالىمداردىڭ جاھاندانۋ زامانىندا ۇلتتىق قۇندىلىقتاردى دارىپتەۋگە, دامىتۋعا قوساتىن ۇلەسى تۋرالى ۇسىنىستارىن ورتاعا سالدى.
الماتى