IT-بلوگەر ەرلان وسپاننىڭ ايتۋىنشا, ترامپتىڭ «قارا تىزىمىنە» ەنگەن كومپانيامەن جۇمىس ىستەۋ كەز كەلگەن كومپانيا ءۇشىن قاۋىپتى. سوندىقتان امەريكانىڭ سانكتسياسىنا ۇشىراماۋ ءۇشىن بيزنەس الەمى الدەقاشان ەكى قادام الدا جۇرۋگە ادەتتەنگەن. دەمەك, Huawei-ءدىڭ سمارتفوندارىنان باستاپ, نوۋتبۋك پەن جەلى جابدىقتارى ءوندىرىسى بيزنەسىنە كادىمگىدەي قاتەر ءتوندى دەي بەرۋگە بولادى.
– ايتالىق, بۇرىن Huawei نوۋتبۋكتارىنا پروتسەسسوردى Intel-دەن الاتىن. ال ونىڭ سمارتفوندارىنا Qualcomm پروتسەسسور بەرەتىن ەدى. ەندى ەكەۋى دە كومەكتەسپەيدى, وعان مۇمكىندىك جوق. بىراق سوعان قاراماستان قىتايلىق hi-tech الپاۋىتى بەرىلمەۋگە تىرىسۋدا. قالاي بولعان كۇندە دە Huawei-ءدىڭ 2020 جىلعا قاراي «الەمنىڭ ۇزدىگى بولامىز» دەگەن ۇرانىنىڭ ورىندالۋى ەكىتالاي. سەبەبى HiSilicon-نىڭ, جالپى قىتايدىڭ عىلىمي-تەحنولوگيالىق الەۋەتىن جاھاندىق جەتىستىكتەردەن ءبولىپ قاراۋ قيىن, – دەيدى ول.
ەرلان وسپان ايتقانداي, بۇل جەردە قارابايىر قيسىنعا سالساق, قىتاي ميكروندىق تەحنولوگيا مەن توپولوگيا سالاسىندا باتىستان وزسا – سىرتتان ساتىپ الۋدى الدەقاشان توقتاتار ەدى. سوندىقتان, قىتاي تاراپىنىڭ مالىمدەمەلەرىنە قاراماستان Huawei-گە تەحنولوگيالىق تۇرعىدان ارتتا قالۋ قاۋپى ءتونىپ تۇر. مىسالى, اقپاراتتىق تەحنولوگيالار مەن تەلەكوممۋنيكاتسيا سالاسىنداعى تاعى ءبىر الپاۋىت – كورەيالىق Samsung قاراپ جاتپايدى, وسى وقيعانى پايدالانىپ قالۋعا تىرىسادى. Google-ءدىڭ Huawei تەحنيكالارىن قولداۋدى توقتاتۋى تۋرالى حابار گادجەتسۇيەر جۇرتتى ءبىراز دۇرلىكتىرگەنى بەكەر ەمەس دەۋگە بولادى.– ال Android جۇيەسىنەن ايىرىلۋدىڭ زاردابى ءوز الدىنا بولەك اڭگىمە. مەنىڭشە, Huawei-ءدىڭ SOS جۇيەسىن ءوزىمىز جاساپ الدىق, سىناقتان وتكىزىپ جاتىرمىز دەگەن مالىمدەمەلەرى شىندىقتان گورى, «ارىعىن ءبىلدىرمەي, سىرتقا ءجۇنىن قامپايتۋعا» كوبىرەك ۇقسايدى. ءيا, ءتىپتى جۇيەنى جاساپ الۋعا دا بولادى. بىراق وعان قوسىمشا جازاتىن ميلليونداعان باعدارلاماشىلاردى تەز ارادا تاربيەلەپ الا قويۋ مۇمكىن بە؟ مەنىڭشە, مۇمكىن ەمەس. Android – كودەرلەر ءۇشىن «اۋرۋى» ابدەن بەلگىلى بولعان «اتىسپاققا جاقسى ەسكى جاۋ». ەكىنشىدەن, ەشكىم امەريكا نارىعىندا ساتىلماۋى مۇمكىن قوسىمشا جاساۋدى ۇيرەنە قويمايتىن شىعار, – دەيدى IT-بلوگەر.
سونىمەن Huawei سمارتفونىن ساتىپ الاتىن اعايىن ءۇشىن ەندى Android-تىڭ جاڭعىرتۋلارى جابىق. Googl Play دۇكەنى مەن Gmail ەلەكتروندى پوشتاسىن دا قولدانا المايدى.
Blumberg-ءتىڭ حابارلاۋىنشا, قىتايلىق كومپانيا قانشا جەردەن قۋاتتى بولسا دا, امەريكالىق كومپانيالارعا تاۋەلدى. قازىردىڭ وزىندە ءۇش-اق ايعا جەتەتىن قوسىمشا بولشەكتەرى قالعان Huawei ودان كەيىن شىعىنعا باتۋى ابدەن مۇمكىن. سوعان قاراماستان, كومپانيا باسشىسى ەشقانداي كۇردەلى ماسەلە جوق ەكەنىن ايتۋدان تانار ەمەس. اقش ۇكىمەتىنىڭ شەشىمىنەن كەيىن ىلە-شالا ءباسپاسوز ءماسليحاتىن ءوتكىزگەن كومپانيا باسشىسى:
– ءسوز جوق, ءبىز كليەنتتەرىمىزگە لايىقتى قىزمەت كورسەتۋدى جالعاستىرا بەرەمىز. ءبىزدىڭ سەريالىق وندىرىستە وراسان زور كۇش-قۋاتىمىز بار, دۇنيەجۇزىلىك نارىقتا باسەكەگە قابىلەتتى بولىپ قالا بەرەمىز. ءوسىم قارقىنى ءتومەندەۋى مۇمكىن, بىراق بۇل سونشالىقتى جوعارى بولمايدى. بيىل ءبىرىنشى توقسانداعى ءبىزدىڭ وپەراتسيالىق تابىستارىمىز بىلتىرعىمەن سالىستىرعاندا 30 پايىزعا جوعارىلادى, ءساۋىر ايىندا 25 پايىزعا تومەندەدى. بالكىم, جىل سوڭىنا دەيىن بۇل كورسەتكىش تاعى دا تومەندەيتىن شىعار, بىراق مينۋسقا كىرمەيمىز, – دەدى ول.
Huawei اقپاراتتىق تەحنولوگيالار مەن تەلەكوممۋنيكاتسيا سالاسىنداعى اسا ءىرى كومپانيالاردىڭ ءبىرى سانالادى. الەمنىڭ 170 ەلىندە جۇمىس ىستەيتىن, 180 مىڭنان استام ادام قىزمەت ەتەتىن كومپانيانىڭ بىلتىرعى تابىسى 108,5 ميلليارد اقش دوللارىنان اسىپ ءتۇستى. بۇگىنگى تاڭدا جەر شارىنداعى حالىقتىڭ ۇشتەن ءبىر بولىگىنە جۋىعى وسى كومپانيانىڭ ونىمدەرىن تۇتىنادى دەگەن دەرەك بار. قىتايلىق كومپانيانىڭ قازاقستانداعى ەنشىلەسى «حۋاۆەي تەكنولودجيز قازاقستان» كومپانياسى 2007 جىلى اشىلعان بولاتىن.