جۇما, 29 ناۋرىز 2013 0:41
الماتىدا رەسپۋبليكا سارايى الدىنداعى الاڭقايدا قالا تۇرعىندارى ءۇشىن دۇنيەجۇزىلىك تۋبەركۋلەزگە قارسى كۇرەس كۇنىنە ارنالعان پرومو-اكتسيا ءوتتى. ءىس-شارا شەڭبەرىندە تۇرعىندار تەگىن فليۋوروگرافيالىق تەكسەرۋدەن ءوتىپ, فتيزياتر مامانداردان كەڭەس الدى. جينالعاندارعا تۋبەركۋلەز دەرتىنە قاتىستى ساۋالنامالار تاراتىلدى. جۇلدەگەرلەرگە سىيلىقتار تاپسىرىلىپ, سوڭى كونتسەرتتىك باعدارلاماعا ۇلاستى.
جۇما, 29 ناۋرىز 2013 0:41
الماتىدا رەسپۋبليكا سارايى الدىنداعى الاڭقايدا قالا تۇرعىندارى ءۇشىن دۇنيەجۇزىلىك تۋبەركۋلەزگە قارسى كۇرەس كۇنىنە ارنالعان پرومو-اكتسيا ءوتتى. ءىس-شارا شەڭبەرىندە تۇرعىندار تەگىن فليۋوروگرافيالىق تەكسەرۋدەن ءوتىپ, فتيزياتر مامانداردان كەڭەس الدى. جينالعاندارعا تۋبەركۋلەز دەرتىنە قاتىستى ساۋالنامالار تاراتىلدى. جۇلدەگەرلەرگە سىيلىقتار تاپسىرىلىپ, سوڭى كونتسەرتتىك باعدارلاماعا ۇلاستى.
دۇنيەجۇزىلىك تۋبەركۋلەزگە قارسى كۇرەس كۇنىنە وراي وتكىزىلگەن بيىلعى ايلىق اياسىنداعى بۇل ءىس-شارانىڭ بارىسىندا حالىقپەن ەتەنە جاقىن ارالاسىپ, قاۋىپتى كەسەلدىڭ كەساپاتى جايلى ءتۇسىندىرۋ, الدىن الۋ جۇمىستارى جۇرگىزىلدى. تاعى ءبىر ايتا كەتەرلىگى, تۋبەركۋلەزگە قارسى مەكەمەلەر وكىلدەرىنەن باسقا دا ەمحانالار مەن مەكتەپ ۇجىمدارى, ونەر ادامدارى, تۋبەركۋلەزگە قارسى شيپاجايلار مەن سالاماتتى ءومىر سالتىن قالىپتاستىرۋ پروبلەمالارى ورتالىعىنىڭ, سونىمەن قاتار, حالىقارالىق ۇيىمدار مەن باق وكىلدەرىنىڭ دە كۇش بىرىكتىرۋگە ۇمتىلىسىنىڭ كۋاسى بولدىق.
كەڭ كولەمدى شارا وتپەس بۇرىن تاڭەرتەڭگىلىك تۋبەركۋلەز پروبلەمالارى ۇلتتىق ورتالىعىندا ۇكىمەتتىك ەمەس حالىقارالىق ۇيىمداردىڭ قولداۋىمەن جۋرناليستەرگە ارنالعان ءباسپاسوز ءماسليحاتى ۇيىمداستىرىلىپ, وندا قازاقستانداعى تۋبەركۋلەزدىڭ ەپيدەميولوگيالىق جاعدايىن مەملەكەتتىك, ۇكىمەتتىك ەمەس حالىقارالىق جانە قوعامدىق ۇيىمدار اراسىنداعى قارىم-قاتىناستى كۇشەيتۋ ارقىلى تۇراقتاندىرۋ, ت.ب. بىرقاتار ماسەلەلەر ءسوز بولدى.
ال الاڭقايعا تاقىرىپتىق ماتەريالدار جازىلعان بيلبوردتار, تۇرعىندارعا ارنالعان جادىناما, تۋبەركۋلەز اۋرۋىنىڭ الدىن الۋ تۋرالى اقپاراتتار, پلاكاتتار قويىلدى. جيىندى تۋبەركۋلەز پروبلەمالارى ۇلتتىق ورتالىعىنىڭ ديرەكتورى, پروفەسسور ت.ابىلداەۆ اشىپ, كوكتەم شىعا كۇش الاتىن كوح تاياقشاسىنىڭ ادام اعزاسىنا كەلتىرەتىن زيانى, اۋرۋدى جۇقتىرۋدىڭ امالدارى, سونداي-اق, ەلىمىزدە تۋبەركۋلەزدەن سىرقاتتانۋ دەڭگەيىنىڭ تومەندەپ وتىرعانىنا توقتالا كەلە, بۇگىندە قۇرت اۋرۋىنىڭ الدىن الۋ جانە ەمدەۋ 2011-2015 جىلدارعا ارنالعان «سالاماتتى قازاقستان» دەنساۋلىق ساقتاۋ سالاسىن دامىتۋدىڭ مەملەكەتتىك باعدارلاماسىنىڭ باسىم باعىتتارىنىڭ ءبىرى بولىپ تابىلاتىنىن جەتكىزدى.
– ەگەر ءبىز وسىدان بەس جىل بۇرىن وسى دەرت بويىنشا كوشباسشى ەلدەردىڭ قاتارىندا تۇرساق, بۇگىنگى تاڭدا ەلىمىزدە قارقىندى جۇرگىزىلىپ جاتقان جۇمىستاردىڭ ناتيجەسىندە, بۇل كورسەتكىشتى تومەندەتۋگە قول جەتكىزدىك. تۋبەركۋلەز تەك جۇقپالى اۋرۋ عانا ەمەس, الەۋمەتتىك دەرت. وسىعان وراي سىرقاتتاردى الەۋمەتتىك قولداۋ ماسەلەلەرى دە قولعا الىنۋدا. ماسەلەن, 2011 جىلى 257 ملن. تەڭگەگە الەۋمەتتىك كومەك كورسەتىلسە, 2012 جىلى بۇل سوما 335 ملن.-عا جەتتى, – دەدى تىلەۋحان ابىلداەۆ.
اكتسيانى ۇيىمداستىرۋشىلاردىڭ ءبىرى الماتى قالالىق تۋبەركۋلەزگە قارسى كۇرەس ديسپانسەرى ۇجىمى اكەلگەن فليۋكار رەنتگەن-فليۋوروگرافيالىق جىلجىمالى ساندىق كرف-112 كەشەنىنە قالا تۇرعىندارى كەلىپ, ءتۇسىپ جاتتى. «جاستار دەنساۋلىقتارىنا سونشالىقتى ءمان بەرمەي جۇرە بەرەدى عوي. بالام ەكى ايدان بەرى جوتەلىپ جۇرگەن. ستۋدەنتتەردىڭ ەمحاناسىنا بار دەسەم, كەزەك كوپ دەپ تۇسە الماي كەلىپتى. وسىنداي اكتسيا ءجۇرىپ جاتقانىن ەستىپ, بالامدى ەرتىپ اكەلىپ, رەنتگەنگە ءتۇسىردىم ءارى ارنايى مامانعا كورسەتىپ الدىم. رەنتگەن قورىتىندىسى ءبىر-ەكى ءان تىڭداعانشا دايىن بولدى. بالام قۇرت اۋرۋىنان تازا بولىپ شىعىپ, كوڭىلىم ورنىنا ءتۇسىپ كەتىپ بارامىن, دەدى ءوزىن زەينەتكەرمىن دەپ تانىستىرعان گۇلجاۋعاش التىنبەكوۆا اپاي.
سونداي-اق, اتالمىش ءىس-شارا اياسىندا الماتى قالاسى بويىنشا دارىگەرلەر اراسىندا وتكەن «تۋبەركۋلەز تۋرالى ەڭ ۇزدىك بىلىمگە يە» اتتى بايقاۋدىڭ جەڭىمپازدارىن قۇتتىقتاپ, باعالى سىيلىقتار تاپسىردى.
گۇلزەينەپ سادىرقىزى,
«ەگەمەن قازاقستان».