27 مامىردا كاسپي تەڭىزىنىڭ جاعالاۋىندا حالىقارالىق اۆتوموبيل فەدەراتسياسىنىڭ (FIA) راللي-رەيدتەن «راللي قازاقستان 2019» الەم كۋبوگىنىڭ ءتورتىنشى كەزەڭى باستالادى. بۇل تۋرالى قازاقستان رەسپۋبليكاسى اۆتوموتوسپورت فەدەراتسياسىنىڭ ءباسپاسوز اگەنتتىگى حابارلادى.
اقتاۋدان باستاۋ الىپ, وسى قالادا ءوز مەجەسىنە جەتەتىن جارىستىڭ جالپى قاشىقتىعى 2500 شاقىرىمنان اسادى. قازاقستانداعى دودا بيىلعى الەم بىرىنشىلىگىنىڭ ەڭ قاشىق كەزەڭى بولىپ تابىلادى. اۆتوشاباندوزدار التى كۇن بويى ماڭعىستاۋ ولكەسىندە تاس پەن قۇم, سور مەن جولسىز دالاداعى سايىستا ءوز باعىن سىناماق. الەم اۆتوسپورتى ۇزدىكتەرىنىڭ سايىسى قازاقستاننىڭ باتىسىندا 1 ماۋسىمعا دەيىن جالعاسادى.
«راللي قازاقستان 2019» دوداسىنا ىشىندە بەلگيا, برازيليا, گەرمانيا, كاتار, يسپانيا, يتاليا, نيدەرلاندى, پورتۋگاليا, رەسەي, ساۋد ارابياسى, سلوۆاكيا, تۇركمەنستان, چەحيا, چيلي جانە فرانتسيا ەلدەرى بار – بارلىعى 17 ەلدەن 28 ەكيپاج قاتىسۋعا نيەت بىلدىرگەن. ولاردىڭ ىشىندە. قازاقستاننىڭ نامىسىن رالليدە بىرنەشە سپورتتىق ەكيپاج قورعايدى.