كەڭەستە شارۋالاردى ساپالى تۇقىمدارمەن, جانار جاعارمايمەن, اۋىل شارۋاشىلىعى تەحنيكاسىمەن قامتاماسىز ەتۋ, سۇرانىسقا يە اۋىل شارۋاشىلىعى داقىلدارىنىڭ اۋداندارىن ءارتاراپتاندىرۋ, سۋبسيديالاۋ ماسەلەلەرى قارالدى.
اۋىل شارۋاشىلىعى ءمينيسترى ساپارحان وماروۆ قازىرگى تاڭدا بارلىق ءوڭىر كوكتەمگى ەگىس جۇمىستارىن جۇرگىزۋگە كىرىسكەنىن, ال وڭتۇستىك وڭىرلەردە ەگىس جۇمىستارى اياقتالۋعا تاقاپ قالعانىن ايتتى. ونىڭ ايتۋىنشا, ەگىستىڭ جالپى اۋدانى 22,3 ملن گەكتاردى, ونىڭ ىشىندە كوكتەمگى ەگىس اۋماعى 19 ملن گەكتاردى قۇرايدى.
̶ ءداندى داقىلدار 14,5 ملن گا القاپقا ەگىلەدى. شارۋالاردىڭ تۇقىمعا دەگەن قاجەتتىلىكتەرى 100% قامتاماسىز ەتىلدى. بيىلعى ەگىنگە شامامەن 2,5 ملن توننا تۇقىم سەبىلدى. بۇل كورسەتكىش وتكەن جىلعىدان 100 مىڭ تونناعا ارتىق, – دەدى مينيستر.
س.وماروۆ جاساعان باياندامادا زيانكەستەر مەن ارامشوپتەردەن قورعاۋ ماقساتىندا قاجەتتى قورەكتىك زاتتار مەن وڭدەۋگە ارنالعان پرەپاراتتار ساتىپ الىنعانى دا ايتىلدى. بۇگىندە 267,1 مىڭ توننا تىڭايتقىش تيەلسە, ونىڭ 60%-ى وتاندىق وندىرۋشىلەردەن الىنعان.
بەلگىلى بولعانداي, بىلتىر اۋىل شارۋاشىلىعى تەحنيكالارى 3,5%-عا جاڭارتىلدى. جالپى العاندا, جۇمىسقا 147 مىڭ تراكتور, 4 مىڭ بىرلىك ونىمدىلىگى جوعارى ەگىس جيىنتىقتارى تارتىلعان. مەملەكەتتىك قولداۋ شارالارىنىڭ اياسىندا 50,6 ملرد تەڭگە سوماسىنا 1770 اۋىل شارۋاشىلىعى تاۋار ءوندىرۋشىسى قارجىلاندىرىلدى.
ءوز كەزەگىندە ەنەرگەتيكا ءمينيسترى قانات بوزىمباەۆ شارۋالاردى جانار-جاعارماي ماتەريالدارىمەن قامتاماسىز ەتۋ بارىسى تۋرالى باياندادى. ونىڭ ايتۋىنشا, ناۋرىز-ماۋسىم كەزەڭىندە كوكتەمگى دالا جۇمىستارىن جۇرگىزۋگە 380 مىڭ توننا ديزەل وتىنى بولىنگەن. بۇگىنگى تاڭدا قاجەتتىلىك كولەمىنىڭ 81%-ى تيەلدى.
̶ بەلگىلەگەن ديزەل وتىنىنىڭ باعاسى ليترىنە 160 تەڭگەنى قۇرايدى (193 مىڭ تەڭگە/توننا), وپەراتورلاردىڭ جەتكىزۋ باعالارىن ەسكەرگەندە وڭىرلەردەگى ورتاشا باعاسى – 174 تەڭگە/ليتر, بۇل نارىقتىق باعادان 18 تەڭگەگە ارزان, – دەدى ق.بوزىمباەۆ.
ۇكىمەت باسشىسى ا.مامين جاۋاپتى ۆەدومستۆولار مەن ايماقتارعا كوكتەمگى ەگىس جۇمىستارىن ۋاقتىلى اياقتاۋدى تاپسىردى.
̶ جالپى, ەگىس جۇمىستارى دۇرىس ۇيىمداستىرىلىپ جۇرگىزىلىپ جاتىر. قارقىن كوڭىلدەن شىعادى. بۇل ماسەلەنىڭ كۇندەلىكتى باقىلاۋدا تۇرعانىن اتاپ وتكىم كەلەدى. اۋىل شارۋاشىلىعى مينيسترلىگى ايماقتارمەن بىرگە ەگىس ناۋقانىن لايىقتى دارەجەدە ءارى ۋاقتىلى جۇرگىزەدى دەگەن ۇمىتتەمىن. بارلىق ۇيىمداستىرۋشىلىق جانە قارجىلىق باعىتتاعى جۇمىستار اياقتالدى دەسە دە بولادى. جانار-جاعارمايمەن قامتۋدا دا ەنەرگەتيكا مينيسترلىگى جاعدايدى رەتتەدى. سول سەبەپتى, بارلىق ماسەلە شەشىلدى دەپ ەسەپتەيمىن, – دەدى ول.
جيىندا تۇركىستان, الماتى, جامبىل وبلىستارىنىڭ باسشىلارى جانە سولتۇستىك وڭىرلەر – اقمولا, قوستاناي, سولتۇستىك قازاقستان وبلىستارىنىڭ اكىمدەرى وڭىرلەردە ەگىس ناۋقاندارىن جۇرگىزۋ تۋرالى باياندادى. بارلىق وڭىرلەر تۇقىمداردىڭ قاجەتتى كولەمىمەن قامتاماسىز ەتىلگەنى دە ايتىلدى.