كەشە پرەمەر-مينيستر كارىم ءماسىموۆتىڭ توراعالىعىمەن ۇكىمەت وتىرىسى بولىپ ءوتتى. وندا ۇكىمەت باسشىسى الماتى وبلىسىنداعى سۋ تاسقىنىنان زارداپ شەككەن اۋىلدارعا ارنالىپ اشىلعان قورعا جەدەل ءتۇردە وبلىس اكىمدەرىنە 50 ملن. تەڭگەدەن, ال ۇلتتىق كومپانيالار ەسەبىنەن جالپى سوماسى 500 ملن. تەڭگە اۋدارۋدى تاپسىردى. سونداي-اق وتىرىستا ۇكىمەتتەگى كادرلىق ورىن اۋىسۋلار جونىندە حابارلانىپ, ەلىمىزدىڭ ءبىلىم سالاسىندا جەتكەن جەتىستىكتەرى جايىندا بايانداما تىڭدالدى.
ۇكىمەت وتىرىسى بارىسىندا الماتى وبلىسىنا ۇكىمەت تاراپىنان بولىنگەن 474 ملن. 600 مىڭ تەڭگە تولىق اۋدارىلىپ, قالعان قاراجات ەندى اۋدارىلاتىندىعى بەلگىلى بولدى. ەستەرىڭىزدە بولسا, ءدۇيسەنبىدە ك.ءماسىموۆ ۇكىمەت قورىنان 599 ملن. 838 مىڭ تەڭگە كولەمىندە قاراجات ءبولۋدى تاپسىرعان بولاتىن. ونىڭ ىشىندە 499 ملن. 838 مىڭ تەڭگە قىزىلاعاش جانە ەگىنسۋ اۋىلدارىنىڭ تۇرعىندارىنا ماتەريالدىق كومەك رەتىندە, سۋ قۇبىرلارىن جوندەۋگە جانە ۇيلەردى ءجوندەۋگە بەرىلسە, 100 ملن. تەڭگە جاڭا ءۇيلەر سالۋعا بولىنەتىن بولادى. “مەن تاڭەرتەڭ وبلىس اكىمدەرىمەن سويلەستىم. ءدال بۇگىن العاشقى كومەك رەتىندە اقشا جيناپ, جيناقتالعان سومانى ەرتەڭگە قالدىرماي زارداپ شەككەن اۋىلدارعا اۋداراتىن بولىڭىزدار”, دەگەن پرەمەر-مينيستر بۇل جۇمىستى “سامۇرىق-قازىنا” ۇاق” اق باسقارما توراعاسى قايرات كەلىمبەتوۆكە تەز ارادا قولعا الۋدى تاپسىردى.
قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگىنىڭ توراعاسى سەرىك نوكين قىزىلاعاش ەلدى مەكەنى 228 گەكتار اۋماقتا ورنالاسقاندىعىن, ونداعى 470 پاتەردە 2 مىڭ 240 ادام تۇراتىندىعىن اتاپ ايتتى. اباي كوشەسىندەگى ەكى پاتەرلى, پانەلدى 6 ءۇيدى كۇردەلى جوندەۋدەن وتكىزۋ كەرەك, بۇل 12 پاتەر سەيسميكالىق جاعدايعا جارامسىز كۇيدە. 13 تۇرعىن ءۇي ناقتى تەكسەرىستەن وتكىزىلۋگە جاتادى. قالعان 467 ءۇي تولىقتاي بۇزىلاتىن بولادى. ال 8 قوعامدىق عيماراتقا كۇردەلى جوندەۋ جاسالىنۋى كەرەك, دەدى ول. س. نوكيننىڭ ايتۋىنشا, بۇگىندە بۇل جۇمىستارعا قۇرىلىس جوباسىمەن اينالىساتىن 47 ۇيىم تارتىلعان, سونداي-اق ءبۇگىنگى كۇنى اۋماقتى تازارتۋ جۇمىستارى جۇرگىزىلۋدە. اگەنتتىك توراعاسىنىڭ حابارلاعانىنداي, الماتى وبلىسىنداعى 3 ەلدى مەكەن, ەگىنسۋ, اقتوعاي جانە الاجيدە ستانساسىندا سۋعا كەتكەن ۇيلەر بار كورىنەدى. ەگىنسۋدا – 111, اقتوعايدا – 102, الاجيدەدە 77 تۇرعىن ءۇي سۋ باسقان جاعدايدا تۇر, ولاردىڭ 31-ءى بۇزىلعان.
توتەنشە جاعدايلار ءمينيسترى ۆلاديمير بوجكو ءوز كەزەگىندە جىلى جاۋىندار جانە تەمپەراتۋرانىڭ كوتەرىلۋى بارلىق سۋ قويمالارىنداعى جاعدايدى اپاتتى كۇيگە تۇسىرۋدە ەكەندىگىن ايتتى. ونىڭ ايتۋىنشا, قازىر شىعىس قازاقستانداعى جاعداي دا قاۋىپ تۋدىرۋدا. كەيبىر ايماقتاردا 6 جىلدىق جاۋىن-شاشىن نورماسى تۇسۋىنەن وزەندەردەگى سۋ 1 مەتردەن جوعارى قاتىپ قالعان. سوندىقتان جاعالاۋدى بەكىتۋمەن, قاردى تازالاۋ, سونداي-اق جولداعى جاعدايلارعا بايلانىستى جۇمىستار ءجۇرگىزىلمەك.
پرەمەر-مينيستر كارىم ءماسىموۆ كۇن جىلىنۋىنا بايلانىستى جاڭا تۇرعىن ۇيلەر سالۋدى جىلدامداتۋدى تاپسىردى. اكىمدىكتەرمەن حابارلاسىپ, قۇرىلىسشىلاردىڭ جەتكىلىكتى ەكەندىگىن, تسەمەنتتىڭ جەتىسپەي جاتقاندىعىن ايتتى. سونداي-اق قاۋىپ توندىرەتىن بوگەتتەرگە قاراۋىلدار قويىلۋىن نىقتاپ تاپسىردى. ال قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگىنىڭ توراعاسى سەرىك نوكين سۋ تاسقىنى شايىپ كەتكەن ۇيلەردى قايتادان تۇرعىزۋ جۇمىستارىن جازعى ۋاقىت ىشىندە تولىق بىتىرۋگە ۋادە بەردى.
ۇكىمەت وتىرىسى سوڭىندا ۇلتتىق قور قارجىسىن قالىپتاستىرۋ جانە ونى پايدالانۋ تۇجىرىمداماسى مەن قازاقستاننىڭ بولون ۇدەرىسىنە قوسىلۋى تالقىلاندى. بۇل تۋرالى ەكونوميكالىق دامۋ جانە ساۋدا ءمينيسترى جانار ايتجانوۆا مەن ءبىلىم جانە عىلىم مينيسترى جانسەيىت تۇيمەباەۆ تانىستىردى. ەلىمىزدىڭ ەۋروپا جوعارى ءبىلىم كەڭىستىگىنە 46 ەلدىڭ ءبىر اۋىزدان كەلىسىمىمەن 47-ءشى ەل بولىپ ەنگەندىگىن اتاپ ايتقان ج.ءتۇيمەباەۆ ەندىگى جەردە ەل ماماندارى ەۋروپادا دا مويىندالاتىنىن جەتكىزدى.
ۆەنەرا تۇگەلباي.