ەلباسىنىڭ بەس الەۋمەتتىك باستاماسى اياسىندا جىل سايىن ءبولىنەتىن 54 مىڭ گرانتقا قوسىمشا 2018-2019 وقۋ جىلىندا تاعى 20 مىڭ گرانت ءبولىندى. ونىڭ 11 مىڭى تەحنيكالىق ماماندىقتار بويىنشا باكالاۆرلىق ءبىلىم بەرۋگە تيەسىلى. بۇل ءتورتىنشى ونەركاسىپتىك رەۆوليۋتسيا جاعدايىنداعى جاڭا ەكونوميكادا زور سۇرانىسقا يە بولاتىن مىڭداعان جاڭا ماماندى دايارلاۋعا ءمۇمكىندىك بەرەدى. ياعني, ينجەنەرلەر, اقپاراتتىق تەحنولوگيا, روبوت تەحنيكاسى, نانوتەحنولوگيا سالاسىنا قاجەتتى ماماندار دايارلانادى.
بۇل – جاستارعا جاسالعان مەملەكەت قامقورلىعىنىڭ ايقىن كورىنىسى. سونىمەن بىرگە تەحنيكالىق جانە اۋىل شارۋاشىلىعى ماماندىقتارى بويىنشا بارلىق جوعارى وقۋ ورىندارى گرانتتارىنىڭ قۇنى ۇلتتىق جوعارى وقۋ ورىندارىنىڭ گرانتتارى دەڭگەيىنە دەيىن كوتەرىلدى.
وبلىستىق ءبىلىم سالاسىن باقىلاۋ دەپارتامەنتىنىڭ باسشىسى ەرلان قارابالاەۆتىڭ ايتۋىنشا, وتكەن جىلدىڭ I جارتىجىلدىعىندا 4 تەحنيكالىق جانە كاسىپتىك ءبىلىم بەرۋ, 11 جالپى ورتا ءبىلىم بەرۋ جانە 5 مەكتەپكە دەيىنگى ءبىلىم بەرۋ ۇيىمدارىنا ءىشىنارا تەكسەرۋ جۇرگىزىلگەن. تەكسەرۋ قورىتىندىسىمەن بارلىق 20 ءبىلىم بەرۋ ۇيىمىنا اكىمشىلىك ءىس قوزعالىپ, اكىمشىلىك ايىپپۇلدار سالىندى. سونىمەن قاتار اتالعان ءبىلىم ۇيىمدارىنىڭ قورىتىندى اكتىلەرىندەگى مالىمەتتەر ۇلتتىق ءبىلىم بەرۋ دەرەكتەر قورىنا ەنگىزىلگەن مالىمەتتەرمەن سايكەستەندىرىلدى. باسقوسۋدا وبلىستاعى ورتا مەكتەپ جانە جوعارى جانە ورتا ارناۋلى وقۋ ورىندارى جەتەكشىلەرى دە اتقارىلعان جۇمىستاردى جان-جاقتى باياندادى.
– سوڭعى ەكى جىلدا وبلىس اكىمدىگىنىڭ قولداۋىمەن 6 كوللەدجدىڭ وقۋ عيماراتتارى, وقۋ-ءوندىرىستىك شەبەرحانالارى مەن جاتاقحانالارىنا كۇردەلى, اعىمداعى جوندەۋ جۇمىستارى ءجۇرگىزىلىپ, پايدالانۋعا بەرىلدى. اعىمداعى جىلى جەرگىلىكتى بيۋدجەت قارجىسى ەسەبىنەن 429 ملن تەڭگەگە قارماقشى اۋدانىنداعى اگرارلى-تەحنيكالىق كوللەدجىنىڭ جاتاقحاناسىنا كۇردەلى جوندەۋ جۇمىستارى جۇرگىزىلمەك. جالپى, جاتاقحاناعا قاجەتتىلىك 1375 ورىندى عانا قۇراپ وتىر, – دەدى وبلىستىق ءبىلىم باسقارماسىنىڭ باسشىسى مايرا مەلدەبەكوۆا.
بۇگىندە, وبلىستا 10772 ستۋدەنت ءبىلىم الىپ وتىرعان 3 جوعارى وقۋ ورنى, 20985 ستۋدەنتى بار 29 كوللەدج جۇمىس ىستەيدى. سونىڭ ىشىندە 11 كوللەدجدىڭ ستۋدەنتتەرىنە 1375 ورىندى قامتيتىن جانە قىزىلوردا مەديتسينالىق جوعارى كوللەدجىنە قوسىمشا 1 جاتاقحاناعا قاجەت.
– جالپى, 2018-2019 وقۋ جىلى بويىنشا ۋنيۆەرسيتەتتىڭ كۇندىزگى بولىمىندە 3345 ستۋدەنت ءبىلىم الادى. ونىڭ 607-ءسى گرانتتىق نەگىزدە وقيدى. وبلىس اكىمىنىڭ گرانتى بويىنشا 361 ستۋدەنت ءبىلىم الۋدا. بۇل گرانت وڭىردەگى ءبىلىم, ەكونوميكا, مادەنيەت, ەلەكترەنەرگەتيكاسى, اقپاراتتىق جۇيەلەر جانە تاعى باسقا سالالاردى كادرلىق الەۋەتپەن قامتاماسىز ەتۋ ماقساتىندا سۇرانىسقا يە ماماندىقتارعا ءبولىنىپ وتىر, – دەدى قورقىت اتا اتىنداعى قىزىلوردا مەملەكەتتىك ۋنيۆەرسيتەتى رەكتورى باقىتجان ابدىكارىموۆ.
قىزىلوردا وبلىسى