قىزىلورداعا قوڭسى قونعان ءتۇركىستان وبلىسىنىڭ سايرام اۋدانىنداعى قارابۇلاق اۋىلىن مۇقىم جۇرت بىلەدى. رەسپۋبليكامىزدىڭ ءتورت وبلىسىنا مال بورداقىلاپ, ەت ساتادى. الاقانداي عانا اۋىل. قاراسۋدى جاعالاپ قونعان اۋىلدىڭ جايىلىمى جوققا ءتان. بورداقىعا بايلانعان ءمۇيىزدى ءىرى قارالار ورىسكە شىعىپ, اياعىمەن جايىلۋ دەگەندى بىلمەي-اق كەتەدى. كورەگى – قۇراماجەم. قوڭىنا قاراساڭ ورىسكە جايىلعان وگىزگە قاراعاندا ساۋىرىنان ماسا تايىپ جىعىلادى. تارازىعا سالساڭ ورىستەگى ەكى سيىردىڭ سالماعىن باسادى. ياعني, مال باعاتىن اعايىننىڭ پايداعا شىققىسى كەلسە قۇراماجەمسىز كۇنى جوق.
قىزىلوردا وبلىسىنىڭ كاسىپكەرلەرى بۇل سالاعا قاتتى كوڭىل ءبولىپ جاتىر. ىسكەر ازاماتتار بەل شەشىپ كىرىسىپ كەتتى. سونىڭ ءبىرى – قارماقشى اۋدانىنىڭ تۇرعىنى ليۋدميلا المەرەنوۆا. ول ءۇيىنىڭ جانىنان قۇراماجەم دايىندايتىن شاعىن تسەح اشىپ الدى.
ءتورت ت ۇلىگىنەن اركىم-اق پايدا كورگىسى كەلەدى. ەت, ءسۇت باعاسى جىل ساناپ ءوسىپ بارادى. سەمىز مالدىڭ قۇنى جوعارى. وسىنىڭ ءبارىن وي ەلەگىنەن وتكىزگەن ليۋدميلا مەملەكەتتىك قولداۋ اياسىندا اشىلعان ارنايى كۋرستا ءدارىس الادى. ماماندىعى تەحنولوگ كەلىنشەك وتاعاسىمەن بىرلەسە وتىرىپ, قۇراما جەم دايىنداۋعا قاجەت نۇسقاۋلىق وقۋلىقتاردى وقيدى. وسىلايشا قۇراما جەم دايىندايتىن تسەح قوندىرعىسىن رەسەيدەن ساتىپ الىپ, جۇمىسىن باستاپ كەتتى.
شاعىن تسەحتىڭ ازىرگە ايىنا 1 مىڭ 500 كەلى قۇراما جەم دايىنداۋعا مۇمكىندىگى جەتەدى. بويىندا مال سەمىرتۋگە قاجەت دارۋمەنگە باي ازىقتى ساتىپ العىسى كەلەتىندەر كوپ بولعاندىقتان كاسىپكەر مەملەكەتتىك قولداۋ ارقىلى جەڭىل نەسيە الماق. وسىلايشا كاسىبىنىڭ اياسىن كەڭەيتپەك.
بيداي ۇنتاعى, كۇنجارا, جوڭىشقا مەن كالتسي فوسفاتى قوسىلعان قۇراماجەم ساۋىن سيىر مەن بورداقىداعى وگىز ءۇشىن قۇنارلى تاعام. سوندىقتان دا سۇرانىس كوپ. وسىندايدا ەسكە ءتۇسەدى. دۇنيە جۇزىنە ەكسپورتقا مرامور ەتىن دايىنداپ بەرىپ وتىرعان وڭتۇستىك كورەياداعى مال بورداقىلاۋ كونتسەرنىنىڭ باسشىلارى قۇراماجەم دايىندايتىن ءشوپ, داقىلداردى امەريكا, كانادا سياقتى مەملەكەتتەردەن ساتىپ الادى ەكەن. ءويتكەنى, وزدەرىندە بوس جەر جوق. ءار ايماقتا قۇراما جەم دايىندايتىن ورتالىقتار بار, ولار مال بورداقىلايتىن الىپ فەرمالاردى دارۋمەندەرمەن قامتاماسىز ەتىپ وتىرادى. قازاقستان سىرتتان جەم-ءشوپ ساتىپ الاتىن جاعدايدا ەمەس. مال بورداقىلاۋ ءىسىن جولعا قويىپ السا, تاسى ورگە دومالايدى. قىزىلوردالىق كاسىپكەرلەر مۇنىڭ باعامىن جاقسى ءبىلىپ وتىر.
قىزىلوردا وبلىسى