ول قىسقى ازيا ويىندارىنا ازىرلىكتىڭ قانداي دەڭگەيدە ەكەنىن كورسەتتى
قىسقى سپورت تۇرلەرىنەن كەنجەلەپ قالعانىمىزدى كۇنى كەشە ۆانكۋۆەردە وتكەن اق وليمپيادا ويىندارى تايعا تاڭبا باسقانداي ايقىنداپ بەردى. اتاقتى شاڭعىشى ۆ.سميرنوۆتىڭ بۇدان بۇرىنعى وليمپيادالارداعى ءبىر التىن, ەكى كۇمىس, ءبىر قولاسى مەن كونكيشى ل. پروكاشەۆانىڭ ءبىر قولاسىنا كاناداداعى ءدۇبىرلى جارىستا عايىپتان ە. حرۋستالەۆانىڭ جەڭىپ العان ءبىر كۇمىسىن قوسقاندا كوماندالىق جالپى ەسەپتە 26-شى ورىندا تۇر ەكەنبىز. الدا – سوچي وليمپياداسى. ونىڭ الدىندا الماتى مەن استانادا جالاۋىن كوتەرەتىن ءVىى قىسقى ازيا ويىندارى وتپەك. وعان نەبارى 11 اي قالىپتى. از ۋاقىتتا نە تىندىرامىز؟
جاقىندا كەندى التايدا ەلىمىزدەگى جوعارى وقۋ ورىندارى اراسىندا ءىىى قىسقى ۋنيۆەرسيادا بولىپ ءوتتى. ول ون كۇنگە سوزىلىپ, ەلىمىزدىڭ وتىزدان استام جوعارى وقۋ ورىندارىنان كەلگەن ستۋدەنتتەر شاڭعى, بياتلون, شايبالى حوككەي, شاعىن فۋتبول, قىسقى سپورتتىق باعدارلاۋ, گىر سپورتى, قىسقى پرەزيدەنتتىك كوپسايىس, ارمرەستلينگ, پاۋەرليفتينگ سياقتى سپورتتىڭ 16 ءتۇرى بويىنشا مەدالداردى ساراپقا سالدى.
ۋنيۆەرسيادانىڭ سالتاناتتى اشىلۋى ريددەر قالاسىندا ءوتتى. بۇل جولعى ۋنيۆەرسيادانىڭ ەرەكشەلىگى, بارلىق جوعارى وقۋ ورىندارىنىڭ ساڭلاقتارى ءبىر جەرگە توپتالىپ, ونەر كورسەتتى. وبلىس اكىمىنىڭ ورىنباسارى ءتۇسىپحان تۇسىپبەكوۆ سپورتشىلار الدىندا سويلەگەن سوزىندە: “ۋنيۆەرسيادا – وليمپيادالىق رەزەرۆ ءۇشىن جاڭا تالانتتاردىڭ ەسىمدەرىن انىقتاۋدىڭ تاماشا مۇمكىندىگى. ريددەردىڭ تالانتتى ۇل-قىزدارى ا.پولتورانين, س.چەرەپانوۆ, س.مالاحوۆا-شيشكينا, يۋ.روديونوۆا, يا.ساۆيتسكي, تاعى باسقالار ۆانكۋۆەردە نامىستى قولدان بەرگەن جوق. ەگەر وقىستا قۇلاپ قالماعاندا الەكسەي پولتورانين كەم دەگەندە ءبىر قولانى الاتىن ەدى. نەسى بار, سوچيدە جەرلەستەرىمىز جەرگە قاراتپايدى دەگەن ويدامىز”, دەسە, س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ رەكتورى, فيلولوگيا عىلىمدارىنىڭ دوكتورى, پروفەسسور بەيبىت مامراەۆ ءوز بايانداماسىندا بۇل جولعى قىسقى ۋنيۆەرسيادانىڭ جەڭىمپازدارى قازاقستاننىڭ نامىسىن العاش رەت تمد اۋماعىندا – استانا مەن الماتىدا وتەتىن 2011 جىلعى ازيا ويىندارىندا قورعايتىنىن تىلگە تيەك ەتتى.
حوش, سونىمەن سپورتتىڭ 16 ءتۇرى بويىنشا مەدالداردى ساراپقا سالۋ ريددەر مەن وسكەمەننىڭ سپورت سارايلارىندا دۇبىرلەپ ءوتتى. شايبالى حوككەيدە شىعىس قازاقستان مەملەكەتتىك ۋنيۆەرسيتەتى 12 ۇپايمەن توپ جاردى. شىعىس قازاقستان مەملەكەتتىك تەحنيكالىق ۋنيۆەرسيتەتى – ەكىنشى, ال قازاق-امەريكان ەركىن ۋنيۆەرسيتەتى ءۇشىنشى ورىنداردى ءبولىستى. فۋتزالدا دا پروفەسسور ب. مامراەۆ جەتەكشىلىك ەتەتىن ۋنيۆەرسيتەت الدارىنا جان سالمادى. فۋتزالدان قىزدار اراسىندا كازاست ءبىرىنشى, شقمۋ, قارمۋ ۋنيۆەرسيتەتتەرى ودان كەيىنگى جۇلدەلى ورىندارعا تابان تىرەدى. پاۋەرليفتينگتە ەرلەر مەن ايەلدەر اراسىنداعى جارىستا شقمتۋ الدارىنا جان سالمادى. گىر سپورتىندا سولتۇستىك قازاقستان مەملەكەتتىك ۋنيۆەرسيتەتى توپ باستاسا, قول كۇرەسىندە وسكەمەندىكتەر الدان كورىندى. ونىڭ ءجونى بار. سەبەبى, اتالمىش جوعارى وقۋ ورنىنىڭ قول كۇرەسىنىڭ شەبەرلەرىن ۇزاق جىلدار بويى ەسىمى ەلگە جاقسى تانىس ساتىپالدى قىدىرحانوۆ باپتاپ كەلەدى. بۇل سايىستا تورەلىك ەتكەن ساتىپالدىعا جارىستى وتكىزۋشىلەر العىستارىن ايتتى. ايگۇل قىدىرباەۆا, نازەركە ەگىنباەۆا, اينۇر قونىسباەۆا, ازامات ماناباەۆ, ەرنات قيزاميتدينوۆ قول كۇرەسىندە ەشكىمگە دەس بەرمەي التىننان القا تاقتى.
ريددەردەگى بياتلون جارىسىندا شىعىس قازاقستان مەملەكەتتىك ۋنيۆەرسيتەتىنىڭ رەكتورى بەيبىت مامراەۆ باسقاراتىن كوماندا (ەركەكتەر مەن ايەلدەر) قارسىلاستارىنىڭ بارلىعىن ايقىن باسىمدىقپەن جەڭدى. وسى وقۋ ورنىنىڭ تۇلەگى ولگا پولتورانينا سپرينت, پاسيۋت جانە ەستافەتالىق جارىستا ءۇش بىردەي التىندى قورجىنعا سالدى. شاڭعى جارىسىندا دا ب. مامراەۆتىڭ سايىپقىراندارى كىلەڭ ءبىرىنشى ورىنداردى يەلەندى. قىسقى باعدارلامادا تەحنيكا عىلىمدارىنىڭ دوكتورى عالىم ءمۇتانوۆ باسقاراتىن شىعىس قازاقستان مەملەكەتتىك تەحنيكالىق ۋنيۆەرسيتەتى قىزدار جانە ەركەكتەر اراسىندا ەشكىمگە دەس بەرمەدى. شقمۋ – ەكىنشى, سولتۇستىكقازاقستاندىقتار ءۇشىنشى ورىندارعا تۇراقتادى.
وڭداسىن ەلۋباي, شىعىس قازاقستان وبلىسى.