تابيعات جاناشىرىنىڭ ايتۋىنشا, ەكولوگيالىق جاعىنان تازا, قۇستارى كوپ (اسىرەسە, دالا ۇيرەكتەرى), اقسۋاتتىقتاردىڭ سۇيىكتى دەمالىس ورنىنا اينالعان وزەننىڭ سۋى 5-6 جىل بۇرىن بۇزىلىپ, سۋعا ءتۇسكەن ادامداردىڭ دەنەلەرى ءبورتىپ شىعا كەلىپتى. «سودان كەيىن جەرگىلىكتى تۇرعىنداردىڭ سۇراۋى بويىنشا كول سۋىن الىپ, اۋداندىق سەس مەكەمەسى ارقىلى وسكەمەننىڭ زەرتحاناسىنا جىبەرگەنىمىزدە سۋدىڭ قۇرامىندا زياندى زاتتاردىڭ بارلىعى انىقتالىپ, قوسكولدىڭ سۋىنا ادامدار تۇسۋگە بولمايدى دەگەن قورىتىندى بەردى. وتكەنگە ءسال شەگىنىس جاساساق, قوسكولدىڭ سۋى كەڭەس زامانىندا قۇرعاقشىلىق جىلدارىندا ءبىر مارتە تارتىلىپ قالعان بولاتىن. مىنە, سول كەزدە اۋداندىق پارتيا كوميتەتىنىڭ ءبىرىنشى حاتشىسى تۇرسىنعازى قوباەۆ تابيعات قورعاۋعا ۇلكەن ۇلەسىن قوسىپ, امانگەلدى (قازىرگى كوكجىرا) سوۆحوزىنا تاپسىرما بەرىپ, قارىمساق توعانىنان سۋ اكەلدىرىپ, كولدىڭ كوزىن اشتىرىپ, قوسكولدى قالپىنا كەلتىرىپ, امان الىپ قالىپ ەدى. بۇل جۇمىسقا مارقۇم سەيسەكە ناعىمجانوۆ بەل شەشە كىرىسكەن ەدى. ەندى مىنە, وسىنداي يگىلىكتى ءىستى اۋدانىمىزعا جاڭا كەلگەن اكىم سەرىكقازى قۇسايىن ۇلى جالعاستىرىپ, ۇزاق ۋاقىت پايدالانۋعا جارامسىز بولىپ قالعان كولگە سۋ تارتقىزىپ, قالپىنا كەلتىرۋ جۇمىسىن باستاپ جىبەردى. 23 ءساۋىر كۇنى قارىمساق توعانىنان قوسكولگە سۋ تارتقىزدى. تۋرا سول كۇننەن باستاپ قوسكولدىڭ ارناسى تولا باستادى. وسىنداي جاقسىلىقتى ەستىگەننەن كەيىن اۋداندىق ءماسليحات حاتشىسى ساۋمەن جاقاەۆ, ءماسليحاتتىڭ اپپارات باسشىسى دانيار جاناتپەن بىرگە قوسكولدىڭ باسىنا بارىپ, ءوز كوزىمىزبەن كورىپ قايتتىق. بۇل ىسكە اتسالىسقان ساتباەۆ اۋىلىنىڭ ازاماتتارىنا, دەمەۋشى بولعان كاسىپكەر رۇستەم ىقىباەۆقا, «كوكجىرا» كووپەراتيۆىنىڭ ءتوراعاسى باعدات مىرزاعا, دەپۋتات كەنجەبەك شىنىباەۆقا اۋىل تۇرعىندارى العىستارىن ايتۋدا. كول باسىندا ساتباەۆ اۋىلىنىڭ تۇرعىنى شۇكىرات قۇلمانوۆپەن كەزدەسكەنىمىزدە بىزگە وزەنگە يە بولاتىن قوجايىن كەرەكتىگىن ايتىپ: «سوندا كولگە كەلگەندەر ماشينالارىن جۋمايدى, قوقىس شاشپايدى» دەگەن ءوتىنىشىن جەتكىزدى», – دەيدى ە.قۇتتىباەۆ.
شىعىس قازاقستان وبلىسى,
تارباعاتاي اۋدانى