باستى ماقساتىمىز – ساياسي ناۋقاننىڭ زاڭ تالاپتارىنا ساي ءوتۋىن قامتاماسىز ەتۋ. 11 مامىردان باستالاتىن سايلاۋالدى ۇگىت-ناسيحات جۇمىستارىنا بەلسەنە كىرىسەتىن بولامىز. كانديداتتى قولداۋعا 10 مىڭنان استام قول جينالىپ, 26 ساۋىردە اياقتالعانىن ايتا كەتكىم كەلەدى, دەدى سويلەسكەنىمىزدە پرەزيدەنتتىكككە ءۇمىتكەر قاسىم-جومارت توقاەۆتى قولداۋ جونىندەگى ايماقتاعى قوعامدىق شتابتىڭ جەتەكشىسى ۆلاديمير بۋبەنكو.
ونىڭ ايتۋىنشا, Nur Otan پارتياسى قالالىق, اۋداندىق فيليالدارىنىڭ سەنىمدى وكىلدەرى قاجەتتى ازىرلىكتەردەن وتكەن. شتابتىڭ قۇرامىنا وبلىستىڭ قۇرمەتتى ازاماتى قۇدايبەرگەن قاليەۆ, «زەنچەنكو جانە ك» كومانديتتىك سەرىكتەستىگىنىڭ باس ديرەكتورى, وبلىستىق ءماسليحاتتىڭ دەپۋتاتى گەننادي زەنچەنكو, پارتيا ارداگەرى يۆان چيركالين, كاسىپقوي بوكستان الەم چەمپيونى جانات جاقيانوۆ سەكىلدى تانىمال تۇلعالار تارتىلعان. بارلىعى 200-دەن استام بەلسەندى جۇمىلدىرىلعان. ءساۋىردىڭ 15-ءى مەن ماۋسىمنىڭ 7-ءسى ارالىعىن قامتيتىن كەشەندى جۇمىس كەستەسى ءتۇزىلىپ, ەڭبەك ۇجىمدارىمەن كەزدەسۋلەر, ءتۇرلى اكتسيالار مەن فورۋمدار وتكىزۋ بەلگىلەنگەن. 1300-دەن استام نۇروتاندىقتار سايلاۋالدى ۇگىت-ناسيحات جۇرگىزۋ شارالارىنا ارالاسىپ, بارلىق سايلاۋ ۋچاسكەلەرىن باراتىن بولادى.
«ەلباسىنىڭ ستراتەگيالىق باعىتى جالعاسىپ, الەۋمەتتىك باعدارلامالار دايەكتىلىكپەن ورىندالىپ كەلەدى. مەن ءار سولتۇستىكقازاقستاندىقتىڭ ازاماتتىق بەلسەندىلىك تانىتۋىنا شاقىرامىن. ادال, اشىق, ءادىل سايلاۋ وتكىزۋ – ءوز قولىمىزدا», دەيدى ەل ازاماتى قۇدايبەرگەن قالي ۇلى.
بۇگىندە وبلىستا 600-دەن اسا سايلاۋ ۋچاسكەسى قۇرىلعان.
ءوڭىر جۇرتشىلىعىنا الداعى سايلاۋ بارىسىن قوعامدىق قاداعالاۋعا نەگىزدەلگەن «امانات» ازاماتتىق تۇعىرناماسى دا تانىستىرىلدى. ارنايى توپ ءمۇشەلەرى ەڭبەك ۇجىمدارىندا كەزدەسۋلەر وتكىزىپ, قۇقىق, ادىلدىك پەن اشىقتىقتى قامتاماسىز ەتۋ, ىنتىماقتاستىق جانە دايىندىق شارالارىن ورتاعا سالدى. «امانات» قازاقستاندىقتاردىڭ تاۋەلسىز ەرىكتى بىرلەستىگى سانالادى. سايلاۋدىڭ نەگىزگى بەس باعىتى بويىنشا مونيتورينگ جۇرگىزىلەدى. باسەكەلەستىكتىڭ تەڭ بولۋى, ەشكىمگە ارتىقشىلىق بەرىلمەۋى, اقپاراتتاردىڭ, سايلاۋ ۋچاسكەلەرىنىڭ قولجەتىمدىلىگى باستى نازارعا الىنادى, دەگەن «قىزىلجار» ءبىلىم ورتالىعىنىڭ جەتەكشىسى جانات مۇحامەدجانوۆ سايلاۋ وتەتىن ءار ۋچاسكەدە ۇيىم اتىنان ءبىر ادام وكىلدىك ەتەتىنىن جەتكىزدى. كوماندا قۇرامىنا جۋرناليستەر, ساراپشىلار, قوعامدىق ۇيىم وكىلدەرى ىرىكتەلىپ, وقۋ ترەنينگتەرى ۇيىمداستىرىلماق.
سايلاۋ بارىسىن قاداعالاۋعا جەرگىلىكتى زاڭ كونسۋلتانتتارى تاۋەلسىز پالاتاسىنىڭ باسقارما توراعاسى ەۆگەني كينتسەل دە اتسالىسقالى وتىر.
سولتۇستىك قازاقستان وبلىسى