– قازاق ءۇشىن جىلقىنىڭ ورنى ەرەكشە. تاريحىمىزعا كوز سالساق, بابالارىمىز وسىناۋ ۇلان-عايىر اتىراپتى ات ۇستىندە ءجۇرىپ قورعاپ قالعان. بۇگىنگى بۋىن بابادان قالعان مۇراعا ادالدىق تانىتىپ, اتقا ءمىنۋ مادەنيەتىن ۇيرەنىپ جاتقانى قۋانتادى. جاستار جىلىندا بالاۋسا تولقىندى ءتالىم-تاربيەگە باۋلىپ جاتقان اقجايىقتىقتاردىڭ بۇل باستاماسى كوپكە ۇلگى. «قۇلاگەر» ات سپورتى كەشەنى – وبلىسىمىزداعى وسىنداي بەسىنشى ات سپورتى مەكتەبى. اۋداننىڭ باسقا دا وكرۋگتەرىندە ات سپورتى ءۇيىرمەلەرىن اشۋ قولعا الىنىپ جاتىر ەكەن. ەرجۇرەك تە ەلجاندى ۇرپاق ءتاربيەلەۋدەگى باستامالارىڭىز باياندى بولسىن, – دەدى ميرجان مۇنايدار ۇلى.
جاڭا كەشەندە ۇرپاق ساناسىنا ۇلتتىق قۇندىلىقتار ءسىڭىرىلىپ, اتادان بالاعا ميراس بولعان كوكپار, قىز قۋ, تەڭگە ءىلۋ, اۋدارىسپاق سىندى حالىقتىق ويىنداردى دامىتۋ قولعا الىنباق.
– بىزگە قازىردىڭ وزىندە 30-عا تارتا بالعىن سپورتشى ءتىركەلدى. ولارعا اتتارىمىز دا دايىن. اتقورامىزدا 5 ءبايگە اتى, كوكپارعا ارنالعان 20 ات, سەرۋەندەۋگە ارنالعان 5 قىلقۇيرىق بار. بىلىكتى ەكى باپكەرىمىز دە ساقاداي ساي. ءبىراز جىل بۇرىن قۇرىلعان «قۇلاگەر» كوكپار كومانداسى تالاي جەردە ولجا سالىپ ءجۇر. سول شاباندوزداردىڭ ءىزىن باساتىن جاس سپورتشىلاردى دايىنداماقپىز. بايگەگە قوساتىن شاباندوزدارىمىز ءبىر توبە. سونىمەن قاتار كەشەندە سال اۋرۋىنا شالدىققان بالالارعا ارنالعان اتپەن سەرۋەندەۋ – يپپوتەراپيا ۇيىرمەسى قىزمەت كورسەتەدى. بۇل جەرگە كەز كەلگەن ادام كەلىپ, اقى ءتولەپ اتپەن سەرۋەندەۋىنە دە بولادى. دەمالىسسىز جۇمىس ىستەيدى, – دەيدى كەشەننىڭ اتقارۋشى ديرەكتورى نۇرالى كەنجەمۇرات.
اشىلۋ قۇرمەتىنە وراي ۇيىمداستىرىلعان « ۇلى دالا ويىندارى» وبلىستىق اشىق ءتۋرنيرى جوعارى دەڭگەيدە ءوتتى. كوكپار, تاي جارىس, قۇنان جارىس, اۋدارىسپاق, تەڭگە ىلۋدەن بولعان باسەكەلەر تارتىستى بولدى. بولات اتكەەۆكە اقجايىق اۋدانى اكىمىنىڭ العىسحاتى تابىستالدى.
باتىس قازاقستان وبلىسى