سايىس ەكى تۋردان تۇردى. ءبىرىنشى كەزەڭدە قاتىسۋشىلار ءتىلدىڭ B1/B2 دەڭگەيىنەن تىڭدالىم, لەكسيكا-گرامماتيكا جانە وقىلىم بويىنشا تەست تاپسىرسا, ەكىنشى تۋردا «بۇگىنگى جاس – ەرتەڭگى بولاشاق» (Today’s Youth – Tomorrow’s Future) تاقىرىبىندا جوبا قورعادى. تەستىلەۋگە 2 ساعات بولىنسە, ەكىنشى كەزەڭدەگى ءار پرەزەنتاتسياعا 5 مينۋت ۋاقىت بەرىلگەن.
وليمپياداعا قاتىسۋشى ەرسۇلتان ومار سۇلتانماحمۇت تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ «ساۋلەت-قۇرىلىس» فاكۋلتەتىندە وقيدى. «وسىعان دەيىن وبلىستىق وقۋشىلار اراسىندا وتكەن تىلدىك وليمپياداعا قاتىستىم. رەسپۋبليكالىق دەڭگەيدەگى بايقاۋعا العاش كەلىپ تۇرمىن. ءبىرىنشى تۋردا بۇرىننان تانىس تەستىلەۋ بولدى. مەن ءۇشىن ەكىنشى كەزەڭ قىزىق بولىپ تۇر. ويتكەنى وندا ءتىلدى قالاي مەڭگەرگەنىڭ عانا ەمەس, يدەياڭ, ويىڭ جانە ونى جەتكىزۋ قابىلەتىڭ سىنعا تۇسەدى», دەدى ەرسۇلتان.
قاتىسۋشىلاردى عانا ەمەس, ءبىزدى دە قىزىقتىرعان ەكىنشى كەزەڭدە ىرىكتەلىپ شىققان 26 بالا ءوز يدەيالارىن بەلگىلەنگەن مەجەدە قورعاپ شىقتى. بارلىعى ويىن اعىلشىن جانە نەمىس تىلدەرىندە ەركىن جەتكىزدى. سونىڭ ءبىرى, ەۋرازيا ۇلتتىق ۋنيۆەرسيتەتىنىڭ ستۋدەنتى دىنمۇحامەد باياندىنى قازىلاردىڭ توسىن سۇراقتارى وزگەلەردەي توسىرقاتپاي, كەرىسىنشە قولداۋ بولىپتى. «امەريكالىق قازى يدەيام تۋرالى سۇراعاندا كەڭىنەن اشىلا ءتۇستىم. جەتپەگەن ۋاقىتتى تولىقتىرۋعا كومەكتەستى. مەن پرەزەنتاتسيامدا كەلەشەككە قاجەتتى داعدىلاردى كورسەتتىم», دەيدى بولاشاق بيولوگ. وليمپيادا قورىتىندىسى بويىنشا ەۋرازيا ۇلتتىق ۋنيۆەرسيتەتى, س.سەيفۋللين اتىنداعى قازاق اگروتەحنيكالىق, ياساۋي اتىنداعى حالىقارالىق جانە سولتۇستىك قازاقستان, پاۆلودار, قاراعاندى, شىعىس قازاقستان مەملەكەتتىك ۋنيۆەرسيتەتتەرىنىڭ ستۋدەنتتەرى جۇلدەلى ورىندارعا يە بولدى. ولارعا جوعارىدا اتالعان ەلشىلىكتەردىڭ قۇندى, ءتىل ۇيرەتۋ كىتاپتارى تابىس ەتىلدى.