استانادا مەملەكەتتىك حاتشى – سىرتقى ىستەر ءمينيسترى قانات ساۋداباەۆ بوسنيا جانە گەرتسەگوۆينانىڭ سىرتقى ىستەر ءمينيسترى سۆەن الكالايمەن كەزدەسىپ, ەكى ەلدىڭ ارىپتەستىك بايلانىسىن جانداندىرۋ ماسەلەسىن تالقىلادى.
قازاقستان مەن بوسنيا جانە گەرتسەگوۆينا اراسىنداعى ديپلوماتيالىق بايلانىستىڭ نەگىزى 1996 جىلدىڭ 20 جەلتوقسانىندا قالانعان بولاتىن. سول ۋاقىتتان بەرى سان سالانى قامتيتىن ءارىپتەستىك تەتىگى ءوز دەڭگەيىندە ورنىققان. دەگەنمەن, ەۋروپاداعى شاعىن عانا ەلدىڭ ەكونوميكالىق الەۋەتى شەكتەۋلى. وعان تومەندەگى ءمالىمەت ءدالەل. ماسەلەن, قازاقستاننىڭ ستاتيستيكا اگەنتتىگىنىڭ مالىمەتتەرىنە سۇيەنسەك, 2009 جىلى ەكى مەملەكەت اراسىنداعى ساۋدا اينالىم 137,7 مىڭ اقش دوللارىن قۇراعان ەكەن. ونىڭ 0,7 مىڭ اقش دوللارى – ەكسپورت, 137,0 مىڭ اقش دوللارى يمپورت بولىپ تابىلادى.
ەكىجاقتى كەزدەسۋ كەزىندە مەملەكەتتىك حاتشى – سىرتقى ءىستەر ءمينيسترى قانات ساۋداباەۆ پەن بوسنيا جانە گەرتسەگوۆينا سىرتقى ىستەر ءمينيسترى سۆەن الكالاي قوس مەملەكەتتىڭ ءوزارا ىنتىماقتاستىق بايلانىسىن نىعايتاتىن كوپتەگەن ماسەلەلەردى جان-جاقتى تالقىلادى. “بۇل ماسەلەلەردىڭ ماڭىزى قازاقستاننىڭ ەقىۇ سياقتى حالىقارالىق بەدەلدى ۇيىمعا توراعالىعى كەزىندە ءتىپتى ارتا تۇسپەك. بۇل رەتتە ءبىز ءوز تاراپىمىزدان بارىنشا قولداۋ كورسەتۋدەمىز. ارينە, ەكونوميكالىق جانە ساياسي ءماسەلەلەردەگى ءارىپتەستىكتى دامىتۋدىڭ ءرولى ايرىقشا. سەبەبى, ەكى مەملەكەت ۇزاق جىلداردان بەرى دوستىق قارىم-قاتىناستى بەرىك ۇستانىپ كەلەدى. مۇنداي بايلانىس كەڭەستىك كەزەڭنەن باستاۋ العان”, دەدى س.الكالاي. سونداي-اق, ول قازاقستان پرەزيدەنتىنىڭ ەقىۇ سامميتىن ءوتكىزۋ تۋرالى باستاماسىن قولدايتىنىن جەتكىزدى.
ءلايلا ەدىلقىزى.