كەشە مەملەكەتتىك حاتشى – سىرتقى ىستەر ءمينيسترى قانات ساۋداباەۆ قازاقستانعا ءوزىنىڭ شاقىرۋى بويىنشا كەلگەن ەۋروپا كەڭەسى پارلامەنتتىك اسسامبلەياسىنىڭ (ەكپا) جاڭا توراعاسى مەۆليۋت چاۆۋشوگلۋمەن كەزدەستى.
مەۆليۋت چاۆۋشوگلۋ – ەكپا توراعاسى بولىپ سايلانعان تۇڭعىش تۇرىك ازاماتى. ول اتالمىش قىزمەتكە ۇستىمىزدەگى جىلدىڭ قاڭتار ايىندا عانا سايلانعان بولاتىن.
كەزدەسۋ كەزىندە مەملەكەتتىك حاتشى – سىرتقى ىستەر ءمينيسترى قانات ساۋداباەۆ مەيماندى وسىناۋ قۇرمەتتى لاۋازىمعا سايلانۋىمەن قۇتتىقتادى. ودان ءارى ەكىجاقتى قارىم-قاتىناستاردىڭ وزەكتى ءماسەلەلەرى تۋرالى پىكىر الماسىلدى.
قازاقستان مەن ەكپا اراسىنداعى ىنتىماقتاستىق 2004 جىلى قول قويىلعان ەكىجاقتى كەلىسىم-شارتتىڭ نەگىزىندە ىسكە اسۋدا. تاراپتار ونىڭ ورىندالۋ بارىسىن تالقىلاي كەلىپ, ەكىجاقتى قاتىناستاردى الداعى ۋاقىتتاردا نىعايتا ءتۇسۋدىڭ جاڭا پەرسپەكتيۆالارى تۋرالى ءسوز قوزعادى. قانات ساۋداباەۆ قوناقتى ەقىۇ توراعالىعىنا بايلانىستى قازاقستان باستامالارى جانە “ەۋروپاعا جول” باعدارلاماسىنىڭ ورىندالۋ بارىسى تۋرالى حاباردار ەتتى. ءوز كەزەگىندە مەۆليۋت چاۆۋشوگلۋ قازاقستانعا كەلۋى لاۋازىمدى قىزمەتكە سايلانعاننان بەرگى ءوزىنىڭ ەڭ العاشقى ساپارلارىنىڭ ءبىرى ەكەندىگىن ايتتى. ءبىز قازاقستاننىڭ ايماقتىق قانا ەمەس, عالامدىق تۇراقتىلىق پەن بەيبىتشىلىكتىڭ ساقتالۋىنا وڭ ىقپال ەتە الاتىن ەل رەتىندە كورىنە باستاعانىنا قۋانىشتىمىز, دەدى ول. سونىمەن بىرگە, ەكپا قازاقستاننىڭ ەقىۇ ەلدەرى باسشىلارىنىڭ ءسامميتىن وتكىزۋ تۋرالى باستاماسىن قولدايتىنىن جەتكىزدى.
كەزدەسۋ ەكىجاقتى ءتۇسىنىستىككە, جارقىن پىكىر الماسۋ تۇرىندە ءوتتى.
جاقسىباي سامرات.