ورال قالاسىنىڭ ىرگەسىندەگى “رەچفلوت” اق-تىڭ كەمە شارۋاشىلىعى ايماعىنا تاياۋ ورمان القابىندا قورلاپ ءولتىرۋ بەلگىلەرى بار بەلگىسىز قىز بالانىڭ ءمايىتى تابىلدى.
جالاڭاش جاتقان قىز دەنەسىنەن وعان جاسالعان قورلىقتى بىردەن اڭعارۋعا بولار ەدى. سوت-مەديتسينالىق ساراپتاما قورىتىندىسى بويىنشا قىز باسسۇيەگىنىڭ سىنىپ, جارالانۋىنان كوز جۇمعان. پوليتسيا قىزمەتكەرلەرى قىزدىڭ قالا ءدامحانالارىنىڭ بىرىندە بولعان وتىرىستان شىعىپ, حابار-وشارسىز كەتكەن 1990 جىلى تۋعان دينارا ەكەنىن انىقتادى.
ىزدەستىرۋ جۇمىستارىن جۇرگىزگەن وبلىستىق ىشكى ىستەر دەپارتامەنتى جانە ورال قالالىق ءىىب كريمينالدىق پوليتسياسى قىزمەتكەرلەرىنىڭ ەكى اپتا بويعى ەڭبەكتەرىنىڭ ارقاسىندا ايۋاندىقپەن جاسالعان قىلمىس اشىلدى.
وقيعا بولعان ءتۇنى ارالارىنداعى بىرەۋىنىڭ تۋعان كۇنىن “يانتار” ءدامحاناسىندا تويلاپ, كورشى ۇستەلدە وتىرعان جىگىتتەرمەن جانە ءدامحانا كۇزەتشىلەرىمەن توبەلەسىپ, سول جەردەن تاڭعى ساعات 4-تە ماس كۇيلەرىندە جاڭا “قىزىق” ىزدەپ “سابانتوي” ءدامحاناسىنا اتتانعان جەلاەۆ جانە زاشاعان اۋىلدارىنىڭ بەس تۇرعىنى ۇستالدى. بەستىكتىڭ “باسشىسى” – 20 جاستاعى جىگىت ب.“سابانتوي” ءدامحاناسىنان شىعىپ كەلە جاتقان دينارانى كورە سالا, “بۇل قىز – قۇربان!” دەگەن قاتال شەشىمگە كەلەدى. كەيىن گاگارين كوشەسىندەگى “وكتان” جانار-جاعارماي قۇيۋ ستانساسىنىڭ قاسىندا كەتىپ بارا جاتقان قىزدى قۋىپ جەتىپ, بويجەتكەندى ءوتىپ بارا جاتقان تاكسيستەر مەن ولاردىڭ جولاۋشىلارىنىڭ كوزىنشە سوعا باستايدى. قاشىپ قۇتىلعىسى كەلگەن ەش قاۋقارسىز قىز سىرتقى كيىمسىز قالادى. اقىرىندا دينارانى كولىككە سۇيرەپ مىنگىزىپ العان ماس جىگىتتەر قالا شەتىندەگى ورمان القابىنا جول تارتادى. جولدا قىزدان جىنىستىق قىزمەت ەتۋىن تالاپ ەتىپ, سوققىنىڭ استىنا الادى.
بەس جىگىتتىڭ بىرەۋى “سابانتوي” ءدامحاناسىنىڭ قاسىندا قالىپ قويىپ, تاعى بىرەۋى جولداستارىنىڭ ايۋاندىق ارەكەتتەرىنە, قىزعا كورسەتكەن قورلىقتارىنا شىداي الماي, وقيعا ورنىنان بوي تاسالايدى. قىزدى زورلاعىسى كەلگەن بۇزاقىلاردىڭ باسشىسى باسقالارىنىڭ كوزىن باقىرايتىپ قويىپ, تاس پەن تاياقتى قارۋ قىلىپ, بايعۇس قىزدى ءولتىرىپ تىنادى.
قىزدىڭ ولگەنىنە كوزى جەتكەن قانىشەرلەر ەشتەڭە بولماعانداي ۇيلەرىنە ورالىپ, جايباراقات ءومىر سۇرە بەرگەن. الايدا, باتىسقازاقستاندىق پوليتسيا قىزمەتكەرلەرى تىرنەكتەپ جيناعان ايعاقتى دالەلدەردىڭ نەگىزىندە قىلمىستى ۇيىمداستىرىپ, ادام ولتىرگەن جىگىت ۇستالدى. قىلمىسقا بىرگە قاتىسقان ونىڭ 20 جانە 21 جاستاعى سىبايلاستارى اسا اۋىر قىلمىستى بۇركەمەلەگەنى ءۇشىن جاۋاپكەرشىلىككە تارتىلۋدا.
فاتيحوللا ماشتاقوۆ, پوليتسيا پولكوۆنيگى. باتىس قازاقستان وبلىسى.