كەشە پارلامەنت سەناتىنىڭ توراعاسى, الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى قاسىم-جومارت توقاەۆ ميتروپوليت مەفوديدى ونىڭ ءوتىنىشى بويىنشا قابىلدادى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
كەزدەسۋ بارىسىندا ق.توقاەۆ ءبىزدىڭ ەلىمىزدەگى ميتروپوليت وكرۋگىنىڭ بۇرىنعى باسشىسىنا قازاقستان قوعامداستىعىنداعى ۇلتتىق بىرلىك پەن دىنارالىق كەلىسىمدى قامتاماسىز ەتۋ ىسىنە زور ۇلەس قوسقانى ءۇشىن ريزاشىلىق ءبىلدىرىپ, ونىڭ الەمدىك جانە ءداستۇرلى دىندەر ليدەرلەرى سەزىنىڭ جۇمىسىنا بەلسەندى تۇردە قاتىسقانىن اتاپ ءوتتى.
ق.توقاەۆتىڭ ايتۋىنشا, قازاقستان باسشىلىعىنىڭ ەلىمىزدى جاڭعىرتۋ مەن ىلگەرىلەتۋ بارىسىنداعى ىشكى تۇراقتىلىقتى قامتاماسىز ەتۋ ماقساتىنداعى كۇش-جىگەرىمەن ورىس پراۆوسلاۆيە شىركەۋىنىڭ قىزمەتى دە ۇيلەسىپ وتىر. توراعا سونداي-اق ورىس پراۆوسلاۆيە شىركەۋىنىڭ پاتريارحى كيريللدىڭ تاياۋداعى قازاقستانعا ساپارى مەن ونىڭ پرەزيدەنت ن.نازارباەۆپەن كەلىسسوزدەرىنىڭ ماڭىزدىلىعىن اتاپ ءوتتى.
ميتروپوليت مەفودي ءدىنارالىق ۇنقاتىسۋ جونىندەگى جوعارعى دەڭگەيدەگى كەزدەسۋلەر ءوتكىزۋ ءجونىندەگى بىرلەسكەن جۇمىستارى ءۇشىن سەنات توراعاسى ق.توقاەۆقا العىس ايتتى.
“مەن ورىس پراۆوسلاۆيە ءشىركەۋىنىڭ وكىلى رەتىندە قازاقستاندا جۇمىس ىستەۋ مۇمكىندىگىنە يە بولعانىمدى ماقتانىش ەتەمىن. مەن قازاقستان مەن ونىڭ حالقىن شىنايى جاقسى كوردىم”, – دەدى ميتروپوليت.
ميتروپوليت مەفودي كيەلى سينودانىڭ شەشىمىمەن بيىلعى 5 ناۋرىزدا پەرم جانە سوليكامسك ەپارحياسىنىڭ باسقارۋشىسى بولىپ تاعايىندالدى.
* * *
كەشە سەنات توراعاسى ءبىزدىڭ ەلىمىزدە وتكەن الەمدىك جانە ءداستۇرلى دىندەر ليدەرلەرى سەزىنە بەلسەندى قاتىسۋشى, عۇلاما عالىم شەيح مۋحامماد سايد تانتاۋيدىڭ مەزگىلسىز قايتىس بولۋىنا بايلانىستى ەگيپەت اراب رەسپۋبليكاسىنىڭ ۋاقىفتار جانە يسلام ىستەرى جونىندەگى ءمينيسترىنە كوڭىل ايتۋ جەدەلحاتىن ءجىبەردى